އައްޑޫ ރައްޔިތުންނަށް އެނގޭ މަޝްރޫޢުތައް ކުރިއަށް ގެންދެވޭނީ ރައީސް ޞާލިހަށްކަން: ޝަރީފު

އައްޑޫ ސިޓީގެ ތަރައްޤީއާއި ގުޅުންހުރި މަޝްރޫޢުތައް ކުރިއަށް ގެންދެވޭނެ ބޭފުޅަކީ ރައީސުލްޖުމްޙޫރިއްޔާ އިބްރާޙިމް މުޙައްމަދު ޞާލިހުކަން އައްޑޫ ރައްޔިތުންނަށް އެނގޭކަމަށް އައްޑޫ މަރަދޫ ދާއިރާގެ މެމްބަރު އިބްރާހިމް ޝަރީފު (މަވޯޓާ) ވިދާޅުވެއްޖެ އެވެ.

ޝަރީފު ކުރެއްވި ޓްވީޓެއްގައި ދިވެހިރާއްޖޭގެ ތަރައްގީއާއި އައްޑޫ ސިޓީގެ ތަރައްގީ ގުޅި ލާމެހިފައިވާއިރު، އެ ސިޓީ ތަރައްޤީކުރުމަށް ރައީސް ޞާލިހު ގިނަ މަޝްރޫއުތަކެއް ފައްޓަވާފައިވާކަމަށް ޝަރީފު ވިދާޅުވި އެވެ. އަދި އައްޑޫގެ ތަރައްގީއަށް މި ސަރުކާރުން ބޮޑު އިންވެސްޓުމަންޓެއް ކޮށްފައިވާކަންވެސް އޭނާ ފާހަގަކުރެއްވި އެވެ.

"އައްޑޫ ބިން ހިއްކުމާ، ގަން އެއާޕޯޓު ތަރައްގީކުރުމަށް 200 މިލިއަން ޑޮލަރާއި، ހައްކެޑެ ތަރައްގީ ކުރުމަށް 145 މިލިއަން ޑޮލަރަށްވުރެ ގިނަ ފައިސާ ހިމެނޭ މަޝްރޫއުތައް އިބްރާހިމް މުޙައްމަދު ޞާލިހުގެ މި ވެރިކަމުގައި ފަށާ ކުރިއަށް އެބަދޭ"

މަރަދޫ ދާއިރާގެ މެމްބަރު އިބްރާހިމް ޝަރީފު (މަވޯޓާ)

އެކަންކަން ފާހަގަކުރައްވާ ޝަރީފު ވިދާޅުވީ އެ މަޝްރޫއު ނުހުއްޓި ކުރިއަށް ގެންދެވޭނީ ރައީސް ޞާލިހަށްކަން އައްޑޫ ސިޓީގެ ރައްޔިތުން ޤަބޫލުކުރާ ކަމަށެވެ. އަދި އެ ސިޓީއަށް ލިބެން އޮތް ކުރިއެރުން ހުއްޓޭނެފަދަ އެއްވެސް ގޮތަކަށް އައްޑޫ ރައްޔިތުން އަމަލު ނުކުރާނެކަމަށް ޝަރީފު ވިދާޅުވި އެވެ.

"އައްޑޫ މީހުންނަށް އެނގޭ މިހާރު އައްޑޫގައި ހިނގަމުންދާ ޕްރޮޖެކްޓުތަކާއި ޕައިޕްލައިނުގައި ރޭވިފައި ހުރި ތަރައްގީގެ ޕްރޮޖެކްޓުތައް ހުއްޓާނުލާ ކުރިއަށް ގެންދެވޭނެ ވެރިޔަކީ ރައީސް ޞާލިހުކަން. އެހެން މީހުން މިހާރުވެސް ދައްކަނީ ދަރަނި ބޮޑުވެގެން މަޝްރޫއުތައް ހުއްޓާލާ ވާހަކަކަން"

މަރަދޫ ދާއިރާގެ މެމްބަރު އިބްރާހިމް ޝަރީފު (މަވޯޓާ)

ޝަރީފު އެ ވިދާޅުވީ ރައީސް ޞާލިހަށް ދެވަނަ ދައުރެއް ނުލިބިއްޖެކަމަށް ވާނަމަ އައްޑޫގައި ފަށާފައިވާ މަޝްރޫއުތައް ކުރިއަށް ނުގެންދާނެ ވާހަކައެވެ.

ޝާރިފު އިތުރަށް ވިދާޅުވީ ސަރުކާރުގެ ދަރަނި ބޮޑުވެދާނެތީ މަޝްރޫއުތައް ކުރިއަށް ނުގެންދިއުމަށް ސަރުކާރުގެ ވާދަވެރިން ކެނޑިނޭޅި ގޮވާލާފައިވާއިރު، ކޯވިޑް-19 ގެ އެންމެ ހިތްދަތި ވަގުތުގައިވެސް ރައީސް ޞާލިހު ރާއްޖޭގެ އެކި ކަންކޮޅުތަކުގައި ބިޔަ މަޝްރޫއުތައް ކުރިއަށް ގެންގޮސްފައިވާ ކަމަށެވެ.

އެމަނިކުފާނަކީ ކޯވިޑް މެނޭޖުކުރުމުގައިވެސް ނަމޫނާ ދައްކަވާފައިވާ ބޭފުޅެއްކަން ފާހަގަކުރައްވާ ޝަރީފު ވިދާޅުވީ އައްޑޫ ސިޓީގެ ތަރައްގީއަށް ވެސް އެންމެ ބޮޑު ހޭދައެއް ކުރައްވާފައިވަނީ ރައީސް ޞާލިހު ކަމަށެވެ. އަދި އެކަން އައްޑޫ ސިޓީގެ ރައްޔިތުން ޤަބޫލުކުރާ ކަމަށެވެ.