2018 ގައި ވީ ވައުދުގެ %90އަށްވުރެ ގިނަ ކަންކަން އެދަނީ ހިނގަމުން، ނިމެމުން: ރައީސް ޞާލިހު

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު، 2018 ވަނަ އަހަރު ވެރިކަމަށް ވަޑައިގަންނަވަން ވެވަޑައިގެންނެވި ވައުދުގެ %90 އަށްވުރެ ގިނަ ކަންކަން މިހާރު ހިނގަމުންދާ ކަމަށް އެމަނިކުފާނު ވިދާޅުވެއްޖެއެވެ.

ރިޔާސީ ކެމްޕެއިނަށް ށ އަތޮޅަށް ކުރައްވަމުންދާ ދަތުރުފުޅުގެ ތެރެއިން، ކެންޕެއިން ރަސްމީކޮށް ފެއްޓެވުމަށް ފޯކައިދޫގައި މިރޭ ބޭއްވި ޖަލްސާގައި ވާހަކަ ދައްކަވަމުން ރައީސް ޞާލިހް ވަނީ، މި ސަރުކާރު ވެރިކަމަށް ވަޑައިގެންނެވުމާއިއެކު، ސީޔާސީ ލީޑަރުންނަށާއި ނޫސްވެރިންނަށްވެސް މިނިވަންކަން ލިބިފައިވާ ކަމަށް ވިދާޅުވެފަ އެވެ. އަދި އޭގެ އިތުރުންވެސް އެމަނިކުފާނު ވެވަޑައިގެންނެވި ގިނަ ވައުދުތަކުގެ ލިސްޓު ކިޔާލައްވަމުން އެކަންކަމުގެ ބޮޑުގައި ނިމިފައި، ނުވަތަ ހިނގަމުންދާ ކަމަށް ވިދާޅުވި އެވެ.

"ރައްޔިތުން ބޭނުންވާ އަސާސީ ޚިދުމަތްތައް ތަފާތު ކުރުމެއްނެތި އެދަނީ ފޯރުކޮށްދެމުން. ފެނާއި ނަރުދަމާ. ބަނދަރާއި ކަރަންޓް. އާރްޓީއެލްގެ ދަތުރުފަތުރު. ފަސޭހަ ވައިގެ ދަތުރު. ސިއްހީ ޚިދުމަތް. ޓާޝިއަރީ ހޮސްޕިޓަލްތަކުގެ މަސައްކަތްތައް، ބާރަށް އެދަނީ ކުރިއަށް. ހިލޭ ޑިގްރީ. ސްކޯލާޝިޕް. ސްޓޫޑެންޓް ލޯން. ހުރިހާ ދަރިވަރުންނަށް އޮތީ ހުޅުވާލާފައި. މިނިމަމްވޭޖް ކަނޑައެޅިއްޖެ. ސާވިސް ޗާޖު ކަށަވަރު ކުރެވިއްޖެ. ތައުލީމީ ދާއިރާއާއި ސިއްހީ ދާއިރާގެ މުސާރަތައް ބޮޑު ކުރެވިއްޖެ. ނުކުޅެދުންތެރިކަން ހުންނަ މީހުންގެ އެލަވަންސް އިތުރު ކުރެވިއްޖެ. އިމާމުންނަށް ޑިގްރީ ފެންވަރަށް ކިޔަވައިދޭން ފެށިއްޖެ. އެތައް އިމާމުންނެއް ޑިގްރީ ހާސިލް ކޮށްފި."

"އައްޑުއަށް އެ އަންނަ ބޮޑު ބަދަލު ވިސްނަވާ. ހަނިމާދޫ އާއި އެކު މުޅި ބޮޑުތިލަދުންމައްޗަށް، އާ ދިރުމެއް އަންނަން އެވަނީ ފަށާފައި. މާލޭގައި އޮރް ޒަމާންވީ ބޯހިޔާވަހިކަމާ، ގެދޮރުގެ ދަތިކަމަށް އެ އަންނަނީ ރަނގަޅު ހެޔޮ ބަދަލެއް. މިހެންގޮސް މި ލިސްޓު އަޅުގަނޑަށް މިރޭ ވަރަށް ދިގުކޮށްވެސް ކިއިދާނެ. ގާތްގަނޑަކަށް 2018 ވަނައަހަރު އަޅުގަނޑުމެން ވީ ވައުދު ތަކުގެ 90 ޕަސެންޓަށް ވުރެ ގިނަ މަސައްކަތް އިރާދަކުރެއްވިޔާ މިހާރު އެދަނީ ހިނގަމުން، ނިމެމުން."

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު

ރައީސް ޞާލިހު ވިދާޅުވީ މި ސަރުކާރުން ކުރި ހުރިހާ ކަމެއްވެސް ކޮށްފައިވަނީ ކޮވިޑްގެ ޢާލަމީ ވަބާގެ ތެރޭގައި ކަމަށެވެ. އަދި އެކަންކަން ކުރުމަށް ހޯދަންޖެހުނީވެސް ބޭރު ގައުމުތަކުގެ އެހީކަން އެމަނިކުފާނު ފާހަގަކުރެއްވިއެވެ.

ރައީސް ޞާލިހުގެ ވައުދު ތަކުގެ 90 އިންސައްތަ ނިމިފައިވާ ކަމަށް އެމަނިކުފާނު ވިދާޅުވާއިރު، މި ސަރުކާރުގެ އެންމެ ބޮޑު ވައުދު ކަމުގައިވާ ތިލަމާލޭ ބުރިޖުގެ މަސައްކަތް ދައުރު ނިމޭއިރުވެސް ނުނިންމޭނެ ކަމަށް ސަރުކާރުން ވަނީ ބުނެފައެވެ.

އަދި ބޯހިޔާ ވަހިކަމުގެ މައްސަލަ ހައްލު ކޮށްދެވިގެންދާ ކަމަށް ވިދާޅުވާ އިރު ބިންވެރިޔާ ސްކީމްގެ ދަށުން ހޯތި ލިބޭ މީހުންނަށް ގޯތި ދޭން ނިންމާފައިވާ ގިނަ ތަންތަން އަދި ހިއްކާވެސް ނުނިމެއެވެ.

މީގެ އިތުރުން ވެސް މި ސަރުކާރުން މަސްވެރިންނަށް ވީ ވައުދުވެސް ނުފުއްދި، މަސްވެރިކަން އިންތިހާއަށް ދަށަށް ގޮސްފައިވާ ކަމަށް ގިނަ މަސްވެރިން އަންނަނީ ބުނަމުންނެވެ.