"ސިޔާސީ ކަސްތޮޅުން ރައީސް ޔާމީން މިނިވަންކުރާނީ ސިޔާސީ ބާރުވެރިކަން ހޯދައިގެން"

ޕީޕީއެމްގެ ރައީސް އަބްދުالله ޔާމީން އަބްދުލްގައްޔޫމު ހައްޔަރުކޮށްފައި ހުންނެވީ، ސިޔާސީ ހުކުމެއްގައި ކަމަށާއި، އެ ހުކުމުން އެމަނިކުފާނު މިނިވަންކުރާނީ ސިޔާސީ ގޮތުން ބާރުވެރިކަން ހޯދައިގެން ކަމަށް، ރިޔާސީ އިންތިޚާބުގައި ޕީޕީއެމް-ޕީއެންސީގެ ފަރާތުން ވާދަކުރައްވާ ޑރ މުހައްމަދު މުއިއްޒު ވިދާޅުވެއްޖެ އެވެ.

ރިޔާސީ އިންތިޚާބުގައި ޕްރޮގްރެސިވް ކޮންގްރެސް ކޯލިޝަނުން ކުރިއަށްދާނެ ގޮތާއި ގުޅޭގޮތުން މައުލޫމާތު ދިނުމަށް ރޭ ޕީޕީއެމް އޮފީހުގައި ބޭއްވި ޕްރެސް ކޮންފަރެންސްގައި ވާހަކަދައްކަވަމުން ޑރ މުއިއްޒު ވިދާޅުވީ ރައީސް ޔާމީނަށް އިންސާފު ހޯދައިދިނުމަށް އެ ކޯލިޝަނުން ކެނޑިނޭޅި ކުރަމުން އައިސްފައިވާ ކަންކަމަށް ސަރުކާރުން ހުރަސްއަޅާ އެމަނިކުފާނަށް ރިޔާސީ އިންތިޚާބުގައި ވާދަކުރުމުގެ ފުރުސަތު ވެސް ގެއްުވާލާފައިވާ ކަމަށެވެ.

އެމަނިކުފާނު މިވަގުތު ވެސް ތަންފީޒު ކުރައްވަމުން ގެންދަވަނީ ސިޔާސީ ހުކުމެއް ކަމަށާއި، އެކަން ނިމުމަކަށް ގެނައުމަކީ ޕީޕީއެމް-ޕީއެންސީން އެންމެ އިސްކަންދޭނެ ކަމެއްކަމަށް ޑރ މުއިއްޒު ވިދާޅުވި އެވެ. އަދި ވިދާޅުވީ ސިޔާސީ ގޮތުން ރައީސް ޔާމިނުގެ މައްވަށް ކޮށްފައިވާ ހުކުމް ގާނޫނީ އިމުގެ ތެރެއިން ބާތިލުކޮށް، އެމަނިކުފާނު މިނިވަން ކުރާނީ ސިޔާސީ ބާރުވެރިކަން ހޯއްދަވައިގެން ކަމަށެވެ.

"އަޅުގަނޑު ދެ ޕާޓީގެ މެމްބަރުންނަށް އަދި ހުރިހާ ރައްޔިތުންނަށް ވެސް ދޭ ޔަގީންކަމަކީ އިރާދަކުރެއްވިއްޔާ އަޅުގަނޑުމެން މި ކުރާ މަސައްކަތްކޮށް، އިންތިޚާބު ކާމިޔާބުކޮށް އިންޝާالله އެންމެ ފުރަތަމަ ވެސް އަޅުގަނޑުމެން ކުރާނެ ކަމަކީ ޤާނޫނީ ހަމަތަކުގެ މަތިން އެމަނިކުފާނު މިނިވަން ކުރުން. އެކަން އަޅުގަނޑުމެންގެ އެންމެ އިސް ޒިންމާއަކީ. ސިޔާސީގޮތުން ހައްޔަރުކޮށް، ސިޔާސީ ކުށްވެރިއެއްގެ ގޮތުގައި އެމަނިކުފާނު ހައްޔަރުކޮށްފައި އެ ހުރި ހުރުން އަޅުގަނޑުމެން ނިމުމަކަށް ގެންނާނީ އިރާދަކުރެއްވިއްޔާ ސިޔާސީގޮތުން މި ކޯލިޝަނަށް ބާރުވެރިކަން ހޯދައިގެން"

ޑރ މުހައްމަދު މުއިއްޒު

ޑރ މުއިއްޒު ވިދާޅުވީ ރައީސް ޔާމީން ގެކޮޅަށް ބަދަލުކޮށްދެއްވުމަށް އެދި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ އަރިހުގައި އާދޭސް ދަންނަވާފައިވާނެ ކަމަށެވެ.

އެހެން ނަމަވެސް އެ އާދޭސްތަކަށް ރައީސް ޞާލިހު އެކަށީގެންވާ ޖަވާބެއް ދެއްވާފައި ނުވާކަމަށާއި، ސަރުކާރުގެ ނުފޫޒުން ރައީސް ޔާމިނަށް ރިޔާސީ އިންތިޚާބުގައި ވާދަކުރުމުގެ ފުރުސަތު ނަގާލާފައިވާއިރު، އެމަނިކުފާނަށް އިތުރު އަނިޔާތައް ނުދީ އާއިލާގެ ގާތަށް ބަދަލުކޮށްދެއްވުމަށް އަދިވެސް އެއްފަހަރު ސަރުކާރަށް ގޮވާލައްވާކަމަށް ޑރ މުއިއްޒު ވިދާޅުވި އެވެ.

ޑރ މުއިއްޒު އިތުރަށް ވިދާޅުވީ ރައީސް ޔާމީނަކީ މައުސޫމު ބޭފުޅެއް ކަމަށާއި، އެމަނިކުފާނަށް ޖަލުގައި އޮންނަން ޖެހިވަޑައިގަންނަވާ ހަމައެކަނި ސަބަބަކީ ޤައުމާއި ރައްޔިތުންގެ ހައްޤުގައި ބަސް ވިދާޅުވާތީ ކަމަށެވެ.

ޕީޕީއެމް-ޕީއެންސީ ކޯލިޝަންގެ ލީޑަރުން ހިތްވަރު ލިބިގަންނަނީ އެމަނިކުފާނުގެ ހިތްވަރުންކަމަށާއި، އެމަނިކުފާނު ފައްޓަވާފައިވާ ޤައުމީ މަސައްކަތްތައް ހުއްޓުމެއްނެތި ކުރިއަށް ގެންދަވާނެކަމަށް ޑރ މުއިއްޒު ވިދާޅުވި އެވެ.