ރައީސް ޞާލިހުގެ ކެންޕެއިން ޖަލްސާގައި ރަފިއްޔާ އަވަގުރާނަ ގޮވުމުން ހޫނުފެނަށް!
އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ޞާލިހުގެ ކެމްޕެއިން ޖަލްސާއެއްގައި، އެމަނިކުފާނާއިއެކު ކޯލިޝަން ހަދާފައިވާ އެމްޑީއޭގެ ނާއިބު ރައީސާ އައިޝަތު ރަފިއްޔާ އަވަގުރާނަ ގޮވުމުން ހޫނުފެނަށް ވެއްޓިއްޖެ އެވެ.
ރައީސް ޞާލިހުވެސް ބައިވެރިވެވަޑައިގެން ގދ. ގައްދޫގައި ރޭ ކުރިއަށް ދިޔަ ކެމްޕެއިން ޖަލްސާގައި ރަފިއްްޔާ ވަނީ އެމްޑީޕީގެ ކުރީގެ ރައީސް އަދި ރައްޔިތުންގެ މަޖިލީހުގެ ރައީސް، މުހައްމަދު ނަޝީދަށް ފާޑުވިދާޅުވަމުންގޮސް ހަޑި ހުތުރު ބަހެއް ބޭނުން ކުރައްވާފައެވެ.
އެގޮތުން ރަފިއްްޔާ ވިދާޅުވީ، ރައީސްކަން ކުރެއްވި ބޭފުޅަކު މާލޭގައި ފެންފޯ ރުއް އިންދެވި ކަމަށާ ނަމަވެސް ފެން ފޯ ރުއް އިންދުމުން ދެން ޖެހޭނީ އެވެނި ގޮތެކޭ ވިދާޅުވެ ވަރަށް ހުތުރު ބަހެއް އޭނާ ބޭނުން ކޮށްފައިވެއެވެ.
ރަފިއްޔާ އެފަދައިން ވުދާޅުވުމުން އެ ޖަލްސާގައި ތިއްބެވި ބައެއް ބޭފުޅުން ވެސް އެކަމާއި ނުރުހުން ވުމުގެ ބަދަލުގައި، އަތްޖަހާ ހީ ހެދި ކަން ފާހަގަކޮށްލަންޖެހެއެވެ. އެއާއެކު އޭނާ އެ ވިދާޅުވި ބަހަށް އިތުރަށް ބާރުދެއްވައި, އެ ދިފާއު ކުރެއްވުމަށް "އެހެން ނޫންތޯ" އޭވެސް ވަނީ ވިދާޅުވެފައެވެ.
ރަފިއްޔާ އެފަދަ ބަހެއް ބޭނުން ކުރެއްވި އެ ޖަލްސާގައި ރައީސް ޞާލިހުގެ އަރިހުގައި އަދާލަތު ޕާޓީގެ ރައީސް ޢިމްރާން އަބްދުالله އާއި އެމްޑީއޭގެ ނައިބުލީޑަރު މައުރޫފުގެ އިތުރުން ސަރުކާރާއި އެމްޑީޕީގެ ގިނަ ވެރިންވެސް ތިއްބެވިއެވެ.
އެހެންކަމުން ރަފިއްޔާގެ އެ ވާހަކައާއި ގުޅިގެން ވަރަށް ގިނަ ބަޔަކު ދަނީ އެ އޭނާއަށާއި، އެމްޑީޕީީ ކޯލިޝަނަށް ފާޑުކިޔަމުންނެވެ.
އެގޮތުން އެއްބަޔަކުވަނީ ރައީސުލްޖުމްހޫރިއްޔާ ބައިވެރިވެވަޑައިގެން އިންނެވި ޖަލްސާއެއްގައި އެފަދަ ހުތުރު ބަހެއް ބޭނުން ކުރުން ބަލައިނުގަނެވޭނެ ކަމަށާ، މަޖިލީހުގެ ރައީސް އަށް މުޚާތަބު ކުރައްވައި އެހެން ވިދާޅުވި މައްސަލާގައި އޭނާއަށް ފިޔަވަޅު އެޅުމަށް ވެސް ވަނީ ގޮވާލާފައެވެ.
މީގެ އިތުރުން، ރަފިއްޔާ ފަދަ އަންހެނުންގެ ހައްގުތަކަށް ވަކާލާތު ކުރުމުގެ ނަމުގައި އުޅޭ މީހުން އިންސާނީ ހައްގުތަކަށް ވަކާލާތުކުރާއިރު، އެފަދަ ބައެއް މީހުންގެ އެއްވެސް އަދަބެއް ސަދަބެއް ނުހުންނަ ކަމަށް މީހަކު ވަނީ ބުނެފަ އެވެ.
ހަމައެހެންމެ، އެމްޑީޕީގެ ކެމްޕެއިންގައި ވާހަކަދައްކާ ނަމަ, ރިވެތި ބަހުން ވާހަކަ ދެއްކުމަށާ، އަދަބުވެރިވުމަށްވެސް މީހަކު ވަނީ އޭނާގެ ކިބައިން އެދިފަ އެވެ. އަދި ރަފިއްޔާގެ ވާހަކަތައް ހައްދުން ނައްޓާފައިވާ ކަމަށްވެސް ގިނަ ބަޔަކު ބުނެ، ނުރުހުން ފާޅުކޮށްފައިވެއެވެ.
އެމްޑީއޭއިން ރައީސް ސޯލިހާއި އެކު ކޯލިޝަން ހެދުމުގެ ކުރިން ރަފިއްޔާ ވަނީ، ކްލަބް ހައުސް ގަޔާއި، މީސްމީޑިއާގެ އެހެން މަންސަތަކުގައި، މިސަރުކާރަށް ނިސްބަތްކޮށް ވެސް ވަރަށް ހުތުރު ބަހުން ވާހަކަ ދައްކާފައެވެ. އެގޮތުން އިންޑިއާއަށް ރާއްޖެ އަޅުވެތި ކޮށްފައިވާ ކަމަށް ވިދާޅުވެ ކުލަބު ހައުސްގައި ރައީސް ސޯލިހަށް ވަރަށް ބޮޑަށް ގެންދެވީ ފާޑު ވިދާޅުވަމުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
