ޑރ. މުޢިއްޒުގެ ރަނިންމޭޓަކީ ރައްޓެއްސެއް؛ މިހާރުވެސް ވާހަކަ ދައްކާ އުޅެން: ރައީސް ޞާލިހު

ޕީއެންސީގެ ރިޔާސީ ކެންޑިޑޭޓު އަދި މާލެ ސިޓީ ކައުންސިލްގެ މޭޔަރު ޑރ. މުހައްމަދު މުއިއްޒުގެ ރަނިންމޭޓު، ރައްޔިތުންގެ މަޖިލިހުގެ ފަރެސްމާތޮޑާ ދާއިރާގެ މެންބަރު ހުސެއިން މުހައްމަދު ލަތީފަކީ ރައްޓެއްސެއް ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.

ރިޔާސީ އިންތިހާބުގެ ކެމްޕެއިނަށް ގދ. އަތޮޅުގެ ރަށްތަކަށް ކުރައްވާ ކެމްޕެއިން ދަތުރުފުޅުގައި މިއަދު ފަރެސްމާތޮޑާ އަށް ވަޑައިގެން ވާހަކަ ދައްކަވަމުން އެމަނިކުފާނު ވަނީ ރިޔާސީ އިންތިހާބުގައި ފަރެސްމާތޮޑާ އަށް އުފަން ބޭފުޅަކު ވާދަކުރައްވާ ކަން ފާހަގަކުރައްވައި، އެ ރަށަށް އުފަން، ހުސެއިން މުހައްމަދު ލަތީފަކީ ރައްޓެއްސެއް ކަމަށް ވިދާޅުވެފައެވެ.

"ޕީއެންސީ، ދެން ޕީޕީއެމް ކަމަށް ބައްލަވާ. ކެންޑިޑޭޓުގެ ރަނިންމޭޓަކީ ފަރެސް އަށް ނިސްބަތްވާ ބޭފުޅެއް. ހުސެއިން މުހައްމަދު. އަޅުގަނޑުގެ ރައްޓެއްސެއް. ވާހަކަ ދައްކާ އުޅެން މިހާރު ވެސް. އަޅުގަނޑު އެބޭފުޅާ އަށް މަރުހަބާ ދަންނަވަން،"

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު

ރައީސް ޞާލިހް މިފަދައިން ވިދާޅުވެފައި ވާއިރު، ކުރިއަށް އޮތް ރިޔާސީ އިންތިހާބުގައި އިދިކޮޅު ޕީޕީއެމް/ޕީއެންސީގެ ފަރާތުން ވާދަކުރައްވަން ނިންމެވި، ކުރީގެ ރައީސް ޔާމީން އަބްދުލްގައްޔޫމަށް އިންތިހާބު ވާދަނުކުރެއްވޭނެ ކަން އިލެކްޝަންސް ކޮމިޝަނުން ނިންމައި، ސްޕްރީމް ކޯޓުން އެ ނިންމުމަށް ތާއީދު ކުރުމުން، ރައީސް ޔާމީންގެ ބަދަލުގައި އިދިކޮޅުގެ ފަރާތުން ރިޔާސީ ރޭހަށް ނުކުންނެވި ޑރ. މުއިއްޒުއެވެ.

މުއިއްޒުގެ ރަނިންމޭޓަކަށް ސެމްބެ ހޮވަން ނިންމަވައި އެކަން އިއުލާން ކުރައްވާފައި ވާއިރު, އެ ނިންމުމަކީ ރައީސް ޔާމީން ގެ ތާއީދާއިއެކު ނިންމެވި ނިންމެވުމަށް ކަމަށް މުއިއްޒު ވަނީ ވިދާޅުވެފަ އެވެ. އަދި ސެމްބެ އަކީ ޒުވާން، އިލްމީ، ގާބިލު ބޭފުޅެއް ކަމަށްވެސް މުއިއްޒު ވިދާޅުވެފައި ވެއެވެ.