ސިޓީ ބަލިކޮށް އާސެނަލް އިން އެއްވަނައިގައި އޮތް ޓޮޓެންހަމްއާއި އަރާ ހަމަކޮށްފި

އިގިރޭސި ޕްރެމިއާ ލީގުގައި އާދިއްތަ ދުވަހުގެ ރޭ އަމިއްލަ ދަނޑުގައި ވާދަވެރި ކުޅުމަކަށްފަހު ޗެންޕިއަން މެންޗެސްޓާ ސިޓީ އަތުން މޮޅުވެ އާސެނަލް އިން ލީގު ތާވަލުގެ އެއްވަނައިގައި އޮތް ޓޮޓެންހަމްއާއި އަރާ ހާމަކޮށްފިއެވެ.

އާސެނަލް ދަނޑުގައި ކުޅުނު މި މެޗު އެޓީމުން ކާމިޔާބުކުރީ 1-0 ގެ ނަތީޖާއަކުންނެވެ. މިދެޓީމު ލީގުގައި އެންމެ ފަހުން ކުޅުނު 12 މެޗުން މެންޗެސްޓާ ސިޓީ މޮޅުވެފައި ވާއިރު، މިއީ 2017 ވަނަ އަހަރުގެ ފަހުން ލީގު މެޗެއްގައި މެންޗެސްޓާ ސިޓީ އަތުން އެޓީމު މޮޅުވި ފުރަތަމަ މެޗެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގެ ފުރަތަަމަ ހާފުގައި ލަނޑުޖަހާނެ އެންމެ ހުސް ފުރުސަތެއް ލިބުނީ މެންޗެސްޓާ ސިޓީގެ ކްރޮއޭޝިޔާ ޑިފެންޑަރު ޖޮސްކޯ ގްވާޑިއޯލް އަށެވެ. ނަމަވެސް އޭނާ ފޮނުވާލި ބޯޅަ އާސެނަލްގެ ކުޅުންތެރިއަކު ވަނީ ގޯލު ރޮނގުމަތިން ދިފާއުކޮށްފައެވެ.

އޭގެ މިނެޓެއް ފަހުން ސިޓީގެ ނެދަލޭންޑްސް ޑިފެންޑަރު ނޭތަން އަކޭ އަށް އާސެނަލްގެ ޕެނަލްޓީ އޭރިއާ ތެެރެއިން ލިބުނު ހުސް ފުރުސަތެއްގައި އޭނާ ފޮނުވާލި ބޯޅަ ގޯލާއި އަމާޒުނުވެ ދިޔައީ ހުރަސްދަނޑި މަތިން ދިޔައިރު، ފުރަތަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މެޗުގެ ދެވަަނަ ހާފުގައި ވެސް ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު، މިމެޗުގައި ފެނިގެންދިޔަ ހަމައެކަނި ލަނޑު ދެވަނަ ހާފުގެ 86 ވަނަ މިނެޓުގައި ކާމިޔާބުކޮށްދިނީ އާސެނަލްގެ ބްރެޒިލް ފޯވާޑް ގެބްރިއަލް މާޓިނެލީ އެވެ. މިއީ އެޓީމުގެ ޖަރުމަނު ފޯވާޑް ކައި ހާވަޓްޒް ތަނަވަސްކޮށްދިން ފުރުސަތެއްގައި އޭނާ ފޮނުވާލި ހަމަލާ ކުރިމަތީގައި ހުރި އާސެނަލްގެ ކުޅުންތެރިއާގެ ގައިގައި ޖެހި މިސްރާބު ބަދަލުވެގެން ގޮސް ގޯލަށް ވަން ލަނޑެކެވެ.

މިލަނޑާއެކު މެޗުގެ ކުޅުން ނިމިގެންދިޔައީ 1-0 ގެ ނަތީޖާއަކުން އާސެނަލް ކުރީގައި އޮވެގެންނެވެ. އަދި މިމެޗުން ލިބުނު ތިން ޕޮއިންޓާއެކު ލީގުގައި ކުޅުނު 8 މެޗުން އެޓީމަށް 20 ޕޮއިންޓް ލިބިފައިވާއިރު، ލަނޑުގެ ތަފާތުން މިވަގުތު އެޓީމު އޮތީ ލީގު ތާވަލްގެ ދެވަނައިގައެވެ. އެއްވަނައިގައި އޮތް ޓޮޓެންހަމް އަށް ވެސް 8 މެޗުން 20 ޕޮއިންޓް ލިބިފައިވާއިރު، މިމެޗުން ބަލިވި މެންޗެސްޓާ ސިޓީ ކުޅުނު 8 މެޗުން ލިބުނު 18 ޕޮއިންޓާއެކު މިވަގުތު އޮތީ ލީގު ތާވަލްގެ ތިންވަނައިގައެވެ.