މަޖިލިސް އިންތިޚާބަށް ގއ ގެ ދާއިރާތައް ބެހިގޮތަށް ބަދަލު ގެނެސްފި

ރައްޔިތުންގެ މަޖިލީހުގެ އިންތިޚާބަށް ގއ. އަތޮޅުގެ ހަތަރު ދާއިރާގައި ރަށްތައް ހިމަނާފައިވާ ގޮތަށް އިލެކްޝަންސް ކޮމިޝަން ބަދަލު ގެނެސްފި އެވެ.

އީސީ އިން މި ބަދަލު ގެނެސްފައިމިވަނީ ދާއިރާތައް ކަނޑައަޅާފައިވާ ގޮތާ ގުޅޭގޮތުން އާންމުން ހުށަހެޅި ޝަކުވާތަކާއި ހިޔާލުތަކަށް ބަލައިފައި ކަމަށް އެކޮމިޝަނުން ބުނެފައިވެއެވެ.

އަންނަ އަހަރު އޮންނަ މަޖިލީހުގެ އިންތިޚާބުގެ ދާއިރާތަކުގެ އާބާދީ ކަނޑައެޅިފައިވާ ގޮތުގެ ވަގުތީ ރިޕޯޓު މިދިޔަ ސެޕްޓެމްބަރު އާންމުކުރި އިރު، ޖުމްލަ 15،510 މީހުން އާބާދީއެއް އޮންނަ ގއ. އަތޮޅުގެ ނުވަ ރަށް ބަހާފައިވަނީ ހަތަރު ދާއިރާއަކަށެވެ.

އެރިޕޯޓުގައި ވިލިނގިލި ދާއިރާގައި ހިމަނައިފައިވަނީ ހަމައެކަނި އެ ރަށެވެ.

ދާންދޫ ދާއިރާގައި ހިމަނައިފައިވަނީ ދާންދޫގެ އިތުރުން، ނިލަންދޫ އަދި މާމެންދޫ އެވެ. ގެމަނަފުށި ދާއިރާގައި ގެމަނަފުއްޓާއި، ކަނޑުހުޅުދޫ އަދި ކޮނޑޭ ހިމެނޭ އިރު، ކޮލަމާފުށި ދާއިރާގައި ހިމަނާފައިވަނީ ކޮލަމާފުށީގެ އިތުރުން ދެއްވަދޫ އެވެ.

ދާއިރާތަކަށް ރަށްތައް ބަހާފައިވާ ގޮތް ރަނގަޅު ނޫން ކަމަށް ބުނެ އަމިއްލަ މީހަކު ހުށަހެޅި ޝަކުވާއަކާ ގުޅިގެން، އީސީން ދިން ޖަވާބުގައި ވަނީ ވަގުތީ ރިޕޯޓުގައި ގއ. އަތޮޅުގެ ދާއިރާތަކަށް ރަށްތައް ކަނޑައެޅި ގޮތަށް ބައެއް ބަދަލުތައް ގެނެސްފަ އެވެ.

އީސީން ގެނެސްފައިވާ ބަދަލުގެ ދަށުން، ގެމަނަފުށި ދާއިރާގައި މިހާރު ހިމެނެނީ ގެމަނަފުއްޓާއި، ކަނޑުހުޅުދޫ އަދި ދެއްވަދޫ އެވެ.

އަދި ދާންދޫ ދާއިރާއަށް ބަދަލު ގެނައީ ދާންދޫގެ އިތުރުން، ނިލަންދޫ އަދި ކޮނޑޭ ހިމެނޭ ގޮތަށެވެ.

މިއާއިއެކު މާމެންދޫ މިހާރު ވަނީ ކޮލަމާފުށި ދާއިރާގެ ތެރޭގައި ކޮލަމާފުއްޓާ އެކު ހިމަނައިފަ އެވެ. މި ބަދަލު ގެނައީ އީސީން ބުނެފައިވާ ގޮތުގައި، ކޮލަމާފުށި ދާއިރާގައި ދެއްވަދޫ ހިމެނުމުގެ ބަދަލުގައި މާމެންދޫ ހިމެނުމުން ދާއިރާގެ އާބާދީ އެއް ހަމަ ކުރެވޭނެ ކަމަށް ފެންނާތީ އެވެ.

އަންނަ އަހަރު ބާއްވާ މަޖިލިސް އިންތިހާބުގައި އިންތިހާބުކުރާ މެމްބަރުންގެ އަދަދު 93 އަށް އިތުރުކުރަން އިލެކްޝަންސް ކޮމިޝަނުން ކުރިން އޮތީ ނިންމައިފަ އެވެ. މިހާރު ތިއްބަވާ 87 މެމްބަރުންގެ ބަދަލުގައި 93 މެމްބަރުން އިތުރުކުރަން ނިންމީ އާބާދީ އަށް ބެލުމަށް ފަހު ބައެއް ދާއިރާތައް އިތުރުކުރަން ނިންމުމުންނެވެ.