"ރިވެލި އެވޯޑު" އެމްޕީއެލްގެ މުވައްޒަފު ޢަބްދުއްރައްޒާޤަށް

އެކި ދާއިރާތަކުން ދިވެހި ގައުމަށް ރީތި ނަމާއި ފަހުރުވެރި ކާމިޔާބީތައް ހޯދައިދެމުން އަންނަ ނުކުޅެދުންތެރިކަން ހުންނަ ފަރާތްތަކުގެ އަގުވަޒަންކުރުމުގެ ގޮތުން ޝަރަފުވެރި "ރިވެލި އެވޯޑު"، މޯލްޑިވްސް ޕޯޓްސް ލިމިޓެޑް (އެމް.ޕީ.އެލް) ގެ މުވައްޒަފެއް ކަމުގައިވާ ޢަބްދުއްރައްޒާޤު ޢަބްދުއްޞަމަދު ވަނީ ޙާޞިލުކުރައްވައިފިއެވެ.

އަލްފާޟިލް ޢަބްދުއްރައްޒާޤު ޢަބްދުއްޞަމަދަކީ އެމް.ޕީ.އެލްގައި އިހްލާސްތެރިކަމާއިއެކު ހިދުމަތް ކުރައްވަމުން ގެންދަވާ ނަމޫނާ ބޭފުޅެކެވެ. އެމަނިކުފާނުގެ ހުންނެވި ނުކުޅެދުންތެރިކަމަކީ ކުރިއަށްދިއުމަށް އޮތް ހުރަހެއް ކަމުގައި ނުދެކި، މުޖުތަމައަށާއި ޤައުމަށް ފައިދާހުރި އަގުހުރި ހިދުމަތްތަކެއް ކޮށްދެއްވަމުން ގެންދަވާ ފަރާތެއްގެ ގޮތުގައި ފާހަގަކޮށްލެވެއެވެ.

މި ފަހުރުވެރި ކާމިޔާބީއާ ގުޅިގެން، ކުންފުނީގެ މެނޭޖްމަންޓާއި އެންމެހައި މުވައްޒަފުންގެ ނަމުގައި އަލްފާޟިލް ޢަބްދުއްރައްޒާޤު ޢަބްދުއްޞަމަދަށް ނުހަނު އިހްލާސްތެރިކަމާއެކު ހޫނު މަރުހަބާއަކާއި ތަހުނިޔާ ވަނީ އަރިސްކޮށްފައެވެ. އަދި މި އުފާވެރި މުނާސަބަތުގައި ސޯޝަލް މީޑިއާ މެދުވެރިކޮށް އެކަން ހާމަކޮށްފައިވާއިރު، އެމަނިކުފާނު މި އެވޯޑު ހާސިލުކުރެއްވުމާ ގުޅިގެން ގިނަ ފަރާތްތަކަކުން ވެސް އަންނަނީ މަރުހަބާގެ މެސެޖުތައް ފޮނުވަމުންނެވެ.

އެމް.ޕީ.އެލްގެ އެޑްމިން ޓީމުގައި އޮފީސް އެޓެންޑެންޓެއްގެ ގޮތުގައި ހިދުމަތްކުރައްވަމުން ގެންދަވާ ޢަބްދުއްރައްޒާޤު ޢަބްދުއްޞަމަދު މި އެވޯޑު ހާސިލުކުރެއްވުމާ ގުޅިގެން ގިނަ ފަރާތްތަކަކުން އަންނަނީ އޭނާއަށް ހޫނު މަރުހަބާއެއް ކިޔަމުންނެވެ.

މި ހަފުލާ ޝަރަފުވެރިކޮށްދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އަނބިކަނބަލުން، މެޑަމް ސާޖިދާ މުޙައްމަދެވެ.

ހަފުލާ ޝަރަފުވެރިކޮށްދެއްވައި ވާހަކަފުޅު ދައްކަވަމުން ރައީސުލްޖުމްހޫރިއްޔާގެ އަނބިކަނބަލުން ވަނީ ކީރިތި ޤުރްއާނުގެ ޢަބަސަ ސޫރަތުގައި ބަޔާންވެގެންވާ މަތިވެރި ހާދިސާއަށް އަލިއަޅުއްވާލައްވާފައެވެ. އެކަމަނާގެ ވާހަކަފުޅުގައި، އެކިއެކި އުނިކަން ހުންނަ ފަރާތްތަކުގެ އިޙްސާސްތަކަށް އިޙްތިރާމުކުރުމާއި، އެ ފަރާތްތަކުގެ އަގުވަޒަންކުރުމަކީ މާތްވެގެންވާ އިސްލާމްދީން ނުހަނު ބޮޑަށް ބާރުއަޅާ، އަދި މާތް ﷲ ލޯބިވެވޮޑިގަންނަވާ ކަމެއްކަން އެ ޙާދިސާއިން ސާފުކޮށް އެނގިގެންދާ ކަމުގައި ވިދާޅުވިއެވެ. އަދި މުޖުތަމައުގެ ހުރިހާ ދާއިރާއަކުންވެސް މިފަދަ ފަރާތްތަކަށް ހަމަހަމަ ފުރުސަތުތައް ފަހިކޮށްދީ، އެމީހުންގެ ބައިވެރިވުން އިތުރުކުރުމުގެ މުހިންމުކަން އެކަމަނާ ފާހަގަކުރެއްވިއެވެ.

ނުކުޅެދުންތެރިކަން ހުންނަ ފަރާތްތަކުން މުޖުތަމައުގައި ދައްކަމުންދާ ނަމޫނާ މަސައްކަތްތަކާއި، ގައުމަށް ރީތި ނަން ހޯދައިދިނުމުގައި ޢަބްދުއްރައްޒާޤު ފަދަ ބޭފުޅުން ވެވަޑައިގަންނަވާ ގުރުބާނީއަކީ މުޅި މުޖުތަމައަށް ލިބިގެންދާ ވަރަށް ބޮޑު ހިތްވަރެކެވެ.