މީސްކޮޅެެއްގެ ނިންމުމުގެ ބަދަލުގައި ރަސްމާލެ މަޝްރޫއުއާމެދު އާންމު ވޯޓެއް ނަގަން އަލިމަނިކު ގޮވާލައްވައިފި

ރަސްމާލެ ތަރައްގީކުރުމުގެ ބިޔަ މަޝްރޫއާ ގުޅޭގޮތުން ރައްޔިތުންގެ ފެންނަ ނުފެންނަ ވޯޓެއް ނުވަތަ ރެފަރެންޑަމެއް ކުރިއަށް ގެންދިއުމކީ އެދޭ ގޮތް ކަމުގައި ގައުމީ ހިދުމަތްތެރިޔާ އަޙްމަދު ޢަލީމަނިކު (ކެނެޑީ) ވިދާޅުވެއްޖެ އެވެ.

އަޙްމަދު ޢަލީމަނިކަކީ ވަރަށް ބޮޑު ގައުމީ ހިދުމަތްތެރިއެކެވެ. އެއީ ގައުމީ އިނާމާ ބެހޭ ކޮމެޓީގެ މެންބަރެވެ. އަދި ސްކައުޓް އެެސޯސިއޭޝަން އޮފް މޯލްޑިވްސްގެ ކުރީގެ ޗީފް ކޮމިޝަނަރެވެ. ރާއްޖޭގެ ދެކުނުން ފޯޅަވައްސާއި ރާއްޖެއާ ދެމެދުގައި އޮތް ކަނޑުގެ ސަރަހައްދާއި، ކޮންޓިނެންޓަލް ޝެލްފުގެ އިންތައް ކަނޑައެޅުމަށް މޮރިޝަސްއިން އިޓްލޮސްއަށް ހުށަހެޅި މައްސަލާގައި ރާއްޖެއިން އަމަލުކުރި ގޮތް ތަހުގީގުކުރުމަށް އުފެއްދި ހާއްސަ ކޮމިޝަންގެ މެންބަރެއްވެސް މެ އެވެ.

ރަސްމާލެ ތަރައްގީކުރުމުގެ ބިޔަ މަޝްރޫއާ ގުޅޭގޮތުން ރައްޔިތުންގެ ފެންނަ ނުފެންނަ ވޯޓެއް ނުވަތަ ރެފަރެންޑަމެއް ކުރިއަށް ނުގެންދާނެ ކަމަށް ރައީސް މިއަދު ވިދާޅުވެފައި ވަނިކޮށް ސޯޝަލް މީޑިއާގައި ކުރެއްވި ޕޯސްޓެއްގައި އަލީމަނިކު ވިދާޅުވީ ރަސްމާލެ މަޝްރޫއުގެ ސަބަބުން ރާއްހޭގެ މުސްތަގުބަލުގެ ދިވެހީންނަށް ކުރިމަތިވެދާނެ ބޮޑެތި މައްސަލަތަކަށްޓަކައި، މި މަޝްރޫއުގެ ކަންކަމާމެދު މީސްކޮޅެއްގެ ނިންމުމުގެ ބަދަލުގައި މިކަން ރާއްޖޭގެ ވީހާވެސް ގިނަ ބައެއްގެ ރުހުމާއި ބައިވެރިވުން ލިބޭ ގޮތަށް ކުރިއަށް ގެންދިއުމަށްޓަކައި އާންމު ވޯޓަކުން ނިންމުމަކީ އެދޭ ގޮތް ކަމަށެވެ.

"މިއީ ރާއްޖޭގެ އަންނަން އޮތް ޖީލުތަކުގެ ހައްގުގައި އަޅުގަނޑު އެދޭ އެދުމެއް. އަޅުގަނޑަކީ ސިޔާސީ މީހެއް ނޫން،" އަލީމަނިކު ވިދާޅުވި އެވެ.

ރަސްމާލޭން 500 ހެކްޓަރު ޔޫއޭއީގެ އީގަލް ހިލްސް ކުންފުންޏަށް ދޭން އުޅޭ ކަމަށް ބުނާ މައްސަލައިގައި ރައްޔިތުންގެ ފެންނަ ނުފެންނަ ވޯޓަކަށް ދިއުމަށް ގޮވާލަން އިދިކޮޅު އެމްޑީޕީގެ ގައުމީ މަޖިލީހުން ވަނީ ދާދިފަހުން ފާސްކޮށްފައެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި، އެ މަޝްރޫއާ ގުޅިގެން ރައްޔިތުންގެ ފެންނަ ނުފެންނަ ވޯޓަކަށް ދާނެތޯ ނޫސްވެރިއަކު ކުރި ސުވާލަށް ޖަވާބު ދެއްވަމުން ރައީސް ވިދާޅުވީ އެއީ ރެފަރެންޑަމަށް ދާންޖެހޭ ކަމެއް ނޫންކަމަށެވެ.

ރައީސް މިފަދައިން ވިދާޅުވެފައި މިވަނީ، ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅާފައިވާ ރިއަލް އެސްޓޭޓް ވިޔަފާރީގެ ބިލާ ހަވާލާދެއްވައެވެ. ހެންވޭރު އުތުރު ދާއިރާގެ މެންބަރު އަހުމަދު އައިފާނު ހުށަހެޅުއްވި މި ބިލަކީ ރަސްމާލެ ފަދަ ރިއަލް އެސްޓޭޓް ދާއިރާއަށް ހާއްސަކޮށް އެކުލަވާލެވޭ ފުރަތަމަ ގާނޫނެވެ.