ސަރުކާރުގައި މުވައްޒަފުން ތިބީ ބޭނުންވާ އަދަދަށްތޯ ބަލަން އޮޑިޓެއް ހަދަނީ

ސަރުކާރުގެ އިދާރާތަކުގައި މުވައްޒަފުން ތިބީ އެ ތަންތަނަށް ހަގީގަތުގައި ވެސް ބޭނުންވާ މިންވަރަށްތޯ ބެލުމަށްޓަކައި ޚާއްސަ އޮޑިޓެއް ކުރުމަށް ނިންމާފައިވާ ކަމަށް ފިނޭންސް މިނިސްޓަރު ހަސަން ޒަރީރު މިއަދު ވިދާޅުވެއްޖެ އެވެ.

އަންނަ އަހަރަށް ލަފާކޮށް ސަރުކާރުން ރައްޔިތުންގެ މަޖިލީހަށް ހުށަހެޅި ބަޖެޓް ދިރާސާކުރާ ކޮމިޓީގެ ބައްދަލުވުމުގައި ވާހަކަދައްކަވަމުން މިނިސްޓަރު ވިދާޅުވީ، ފިނޭންސް މިނިސްޓްރީ އާއި ނޭޝަނަލް ޕޭ ކޮމިޝަން ގުޅިގެން ކުރިއަށްގެންދާ މި އޮޑިޓަށް ފަހު، ބޭނުންވާ ވަރަށް ވުރެ އިތުރަށް މުވައްޒަފުން ތިބި އިދާރާތަކުން މުވައްޒަފުން މަދު ތަންތަނަށް މީހުން ބަދަލުކުރާނެ ކަމަށެވެ. އަދި މިއީ ދައުލަތުގެ ހަރަދުތައް ކުޑަކުރުމުގެ ގޮތުން އަޅަމުންދާ މުހިންމު ފިޔަވަޅެއް ކަމަށް ވެސް ފާހަގަކުރެއްވި އެވެ.

މިނިސްޓަރު ވިދާޅުވީ، ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެސް ވަނީ އަންނަ އަހަރު ސަރުކާރުގެ އޮނިގަނޑަށް އާ މަގާމުތައް އިތުރު ނުކުރުމަށް ނިންމަވާފައި ކަމަށެވެ. އަދި ވަޒީފާއިން ވަކިވާ މީހުންގެ ބަދަލުގައި މުވައްޒަފުން ނަގާނީ ވެސް ކޮންމެހެން ބޭނުންވާ މަގާމުތަކަށް އެކަނި ކަމަށް ކަނޑައަޅާފައިވާ ކަމަށް ވިދާޅުވި އެވެ.

ދައުލަތުގެ ޚަރަދު ކުޑަކުރުމަށްޓަކައި އެންމެ ބޭނުންޖެހިފައިވާ ފަރާތްތަކަށް އަމާޒުކޮށްގެން ސަބްސިޑީ ދޭން ފަށަން ވަނީ ނިންމައިފައެވެ. މީގެއިތުރުން ތެލަށްކުރާ ހޭދަ ކުޑަކުރުމުގެ ގޮތުން، 2028 ވަނަ އަހަރުގެ ނިޔަލަށް ރާއްޖޭގެ ހަކަތައިގެ 33 އިންސައްތަ އިޔާދަކުރަނިވި ހަކަތައަށް ބަދަލުކުރުމަށް ސަރުކާރުން އަމާޒު ހިފާފައިވާއިރު، މި ލަނޑުދަނޑި ހާސިލުކުރުމަށް މިހާރު ކުރިއަށްދާ 150 މެގަވޮޓްގެ ދެ މަޝްރޫޢުގެ ސަބަބުން އަހަރަކު ގާތްގަނޑަކަށް 100 މިލިއަން ލީޓަރުގެ ތެޔޮ ސަލާމަތްކުރެވޭނެއެވެ.

ދައުލަތުން އަންނަ އަހަރަށް ލަފާކޮށް ރައްޔިތުންގެ މަޖިލީހަށް ހުށަހަޅާފައިވަނީ 59.7 ބިލިއަން ރުފިޔާގެ ބަޖެޓެކެވެ. މިއީ ގައުމީ އުފެއްދުންތެރިކަން (ޖީޑީޕީ) ގެ ނިސްބަތުން 46.1 ޕަސެންޓެވެ.