ތުޅާދޫ ހައުސިން ޔުނިޓްތައް ލިބޭ މީހުންގެ ވަގުތީ ލިސްޓް އާއްމުކޮށްފި

ބ.ތުޅާދޫގައި ތަރައްޤީކޮށްފައިވާ 100 ހައުސިން ޔުނިޓް ލިބޭ މީހުންގެ ދާއިމީ ލިސްޓް އެރަށު ކައުންސިލުން އާއްމުކޮށްފިއެވެ.

ތުޅާދޫ ކައުންސިލުން މިއަދު ގެޒެޓްގައި އާއްމުކުރި ވަގުތީ ލިސްޓްގައި ހިމެނެނީ ކެޓަގަރީ އޭ އިން ފްލެޓްލިބޭ މީހުންގެ ލިސްޓާއި ކެޓަގަރީ ބީ އިން ފްލެޓް ލިބޭ މީހުންގެ ލިސްޓެވެ.

މީގެ ތެރެއިން ކެޓަގަރީ އޭ އަކީ ތުޅާދޫގެ ރައްޔިތުންނަށް ދޫކުރުމަށް ހަމަޖެހިފައިވާ 92 ހައުސިންގ ޔުނިޓް ލިބޭ މީހުންގެ ލިސްޓެވެ. އަދި ކެޓަގަރީ ބީ އަކީ ތުޅާދޫއަށް ދިރިއުޅުން ބަދަލުކުރުމަށް ބޭނުންވާ ފަރާތްތަކަށް ދޫކުރުމަށް ހަމަޖެހިފައިވާ 08 ހައުސިންގ ޔުނިޓް ލިބޭ މީހުންގެ ލިސްޓެވެ.

ތުޅާދޫ ކައުންސިލުން ވަނީ ލިސްޓުގައިވާ ފަރާތްތަކަށް ޕޮއިންޓް ލިބިފައިވާ ގޮތާމެދު އެއްވެސް ޝަކުވާއެއް ވާނަމަ، މިހިނގާ އޮގަސްޓްމަހުގެ 11 ވަނަ ދުވަހުގެ ދޭއް ޖެހުމުގެ ކުރިން ސިޓީން ނުވަތަ އީމެއިލް މެދުވެރިކޮށް ޝަކުވާ ހުށަހެޅުމަށް އެދިފައެވެ.

މި ފްލެޓްތަކަށް ތުޅާދޫ ރައްޔިތުންގެ ތެރެއިން 623 ހަށްވުރެ ގިނަ މީހުން ލާފައިވާއިރު، އެރަށުގައި ދިރިއުޅެމުންދާ އެހެން ރަށްރަށަށް ނިސްބަތްވާ 100 އެއްހާމީހުން ފޯމް ލިއެވެ.

ތުޅާދޫ ހައުސިން ޔުނިޓްތައް މަސައްކަތް ނިންމިތާ ދެ އަހަރަށްވުރެ ގިނަދުވަސްވެފައިވާއިރު، ވަގުތީ ލިސްޓް އާއްމުކޮށްފައިމިވަނީ ހައުސިން ޔުނިޓްތައް ހަވާލުކުރުން ލަސްވެ، ރައްޔިތުންގެ ޝަކުވާ ވަރަށް ބޮޑުވެފައިވަނިކޮށެވެ. މިފަހަރު ދޫކުރުމަށް ތައްޔާރުވަމުންދާ ހައުސިން ޔުނިޓްތަކަކީ 2019 ވަނަ އަހަރު އިމާރާތްކުރަން ފެށި ހައުސިން ޔުނިޓްތަކެވެވެ. މި ޔުނިޓްތައް ތަރައްޤީކުރުމުގެ މަސައްކަތް ކޮށްފައިވަނީ ޕްރިސިޝަން އިންޖީނިއަރިން ސާވިސަސްއާއި ފްލްކްސްއިންކް ޕްރައިވެޓް ލިމިޑެޓް ގުޅިގެން އުފެއްދި ކުންފުންޏަކުންނެވެ. މި މަޝްރޫޢުގެ އަގަކީ 79.6 މިލިއަން ރުފިޔާއެވެ.

ތުޅާދޫއަކީ އާބާދީގައި 3072 އަށްވުރެ ގިނަ މީހުން ދިރިއުޅެމުން އަންނަ ގޯތި ގެދޮރުގެ ދަތިކަން ވަރަށް ބޮޑު ރަށެކެވެ. ތުޅާދޫ ރައްޔިތުން ދިރިއުޅުމަށް 100 ހައުސިން ޔުނިޓް ދޫކުރުމަށް ތައްޔާރުވަމުންދާއިރު، މިއީ އަދި އެރަށަށް އެކަށީގެންވާ އަދަދެއް ނޫންކަމަށް ތުޅާދޫ ކައުންސިލުން މީގެ ކުރިން ވަނީ ބުނެފައެވެ.

ތުޅާދޫ އަކީ އެންމެފުރަތަމަ ބިން ހިއްކައިގެން ބޯހިޔާވަހިކަމަށް ގޯތިދޫކުރަން ފެށި ރަށްތަކުގެ ތެރެއިން ރަށެކެވެ. ތުޅާދޫގައި އެންމެ ފުރަތަމަ ބިން ހިއްކާފައިވަނީ ރައީސް މައުމޫން ދުވަސްވަރުއެވެ. އޭގެފަހުން ތުޅާދޫ ބިން ހިއްކާފައިވަނީ ރައީސް ނަޝީދުގެ ވެރިކަމުގައެވެ. ރައީސް މައުމޫނު ދުވަސްވަރު ހިއްކި ބިމުން ގޯތި ދިންއިރު، ރައީސް ނަޝީދުގެ ދުވަސްވަރު ހިއްކި ބިމުގައި 50 ހައުސިން ޔުނިޓް އަޅައި ކުލި ދައްކާ އުސޫލުން ރައްޔިތުންނަށް ދީފައިވާކަން ފާހަގަކޮށްލެވެއެވެ.