އެމްއެމްޕީއާރުސީ މައްސަލަ ބަލާނަން؛ ގެއްލުނު ފައިސާ ހޯދައި، ވައްކަން ކުރި މީހުންނަށް އަދަބު ދޭނަން: ރައީސް

ރައްޔިތުންގެ ފައިސާއިން ގެއްލިފައިވާ ފައިސާ ހޯދައި، ވައްކަން ކުރި ފަރާތްތަކަށް އަދަބު ދިނުމަށް ސަރުކާރުން މަސައްކަތް ކުރާނެ ކަމަށް ރައީސުލްޖުމްހޫރިއްޔާ ޑރ މުހައްމަދު މުޢިއްޒު ވިދާޅުވެއްޖެއެވެ.

ރޭ ބޭއްވުނު ޕީއެންސީގެ ހަރުގެ ޖަލްސާގައި ވާހަކަދައްކަވަމުން ރައީސް ވިދާޅުވީ، ކޮރަޕްޝަންގެ އެކި އަމަލުތައް ހިންގައިގެން ރައްޔިތުންގެ ފައިސާއިން ކޮށްފައިވާ ވައްކަންތައް ބަލައި، އެކަން ކުރި ފަރާތްތައްކަށް ޙައްގު އަދަބުދީ އެ ފައިސާ އަނބުރާ ހޯދަން ޖެހޭ ކަމަށެވެ.

އަދި އެކަމަށްޓަކައި ފާއިތުވި ސަރުކާރު ތަކުން ރިޔާސީ ކޮމިޝަނެއް ހަދައި އެތަނަށް އެތައް ސަތޭކަ މިލިއަން ރުފިޔާއެއް ހަރަދުކޮށްފައިވާ ކަމަށާ އެހެން ނަމަވެސް، ގެއްލިފައިވާ އެއްވެސް ފައިސާއެއް މިހާތަނަށް އަނބުރާ ނުހޯދޭކަން އެމަނިކުފާނު ފާހަގަކުރެއްވިއެވެ.

މިހާރު ހުރި ޤާނޫނުތަކުން ދައުލަތުގެ ހަޒާނާއިން ގެއްލިފައިވާ ފައިސާ ހޯދުމަށް ދަތިތައް އެބަހުރި ކަމަށާއި އެހެންކަމުން، އެސެޓް ރިކަވަރީއަށް ހާއްސަ ގާނޫނެއް ހަދަން ބިލެއް ތައްޔާރުކުރުމުގެ މަސައްކަތް ސަރުކާރުން ފަށާފައިވާ ކަމަށް ރައީސް ވިދާޅުވިއެވެ.

"އިންޓަނޭޝަނަލް މިންގަނޑުތަކަށް ފެތޭ، އެހެން ޤައުމުތަކުގެ މިކަންކުރާ އިންޓަނޭޝަނަލް ބޮޑީތަކުގެ ރިކޮމެންޑޭޝަނަށް ބަލައި، އެއާ އެއްގޮތަށް މި ބިލް ތައްޔާރުކުރެވޭނީ. އޭރަށް އިރާދަކުރެއްވިއްޔާ ހަމައެކަނި ރާއްޖޭގައި ވައްކަންކޮށްގެން ރައްކާކޮށްފައިވާ ފައިސާއެއް ނޫން. ރާއްޖޭން ބޭރަށް އެއްޗެއް ގެންގޮސްފައި ހުރިއްޔާ އެ އެއްޗެއްވެސް ހޯދުމުގައި މިހާރަށްވުރެ ފަސޭހަވެގެންދާނެ،"

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.

ރައްޔިތުންގެ ފައިސާ ހޯދަން ބަލާއިރު އެންމެ ބޮޑު މައްސަލައަކީ އެމްއެމްޕީއާރްސީގެ ތެރެއިން ގެއްލިފައިވާ ފައިސާގެ މައްސަލަ ކަން ފާހަގަކުރައްވައި ރައީސް ވިދާޅުވީ، އެ ވައްކަން ކުރި ފަރާތްތައް ދެނެގަނެ އެއީ ކޮންމެ މީހެއް ކަމުގައިވިޔަސް ޙައްގު އަދަބުދީ، އެ ފައިސާ އަނބުރާ ހޯދުމަށް ކުރަން ޖެހުނު ކޮންމެ ކަމެއް ކުރައްވާނެ ކަމަށެވެ.

"އެ ވައްކަން ކުރި ފަރާތްތައް ދެނެގަނެ އެއީ ކޮންމެ މީހެއް ކަމުގައި ވިޔަސް، އެ މީހަކަށް ދޭން ޖެހޭ ހައްގު އަދަބު މި ސަރުކާރުން ދީ، އެ ފައިސާ ރައްޔިތުންނަށް ހޯދަން ކުރަން ޖެހުނު ކޮންމެ ކަމެއް ކުރާނަން. އެއީ ރައްޔިތުންގެ މުދާ، އެއީ ރައްޔިތުންގެ ފައިސާ. އެ ފައިސާ ހޯދައި މިދެންނެވި އެސެޓް ރިކަރަވަރީ ޤާނޫނު ތައާރަފުކޮށް އަދި ދެންވެސް އެކިއެކި ވައްކަންތަކުގައި ރައްޔިތުންގެ އަތުން ގެންގޮސްފައިވާ އެކިކަހަލަ މުދާތައް އަނބުރާ ހޯދުމަކީ އަޅުގަނޑުމެން ކުރާނެ ކަމެއް،"

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.

ނަމަވެސް ރައީސް ވިދާޅުވީ އެކަމުގައި ބައިވެރިވި މީހެއްކަން ސާބިތުކުރެވެން ޖެހޭނީ އިންސާފުވެރިކަމާ އެކުގައި ކަމަށެވެ.