ޔުމްނު ވެއްޓުނު މައްސަލައާ ގުޅޭ އަދާހަމަ އާއި މައުލޫމާތު ހިއްސާ ކުރުމަށް ޚާއްސަ ޕޯޓަލެއް ޤާއިމް ކުރަނީ

އޭޕްރިލްމަހުގެ 18 ވަނަ ދުވަހު މާލޭގެ ގެއެއްގެ ފުރާޅުމަތީގައި ހައްވާ ޔުމްނު ނަމަކަށް ކިޔާ 21 އަހަރުގެ ޒުވާން އަންހެނަކު ވެއްޓިފައި އޮއްވައި ފެނުނު މައްސަލަ އާއި ގުޅޭ ފަހުގެ އަދާހަމަ ފޯރުކޮށްދީ، މައްސަލައާއި ގުޅުންހުރި ސުވާލު ކުރުމަށް ބޭނުންވާ ފަރާތްތަކަށް އެ ފުރުޞަތު ފަހިކޮށްދިނުމަށް ޚާއްސަ ޕޯޓަލެއް ޤާއިމް ކުރުމަށް ނިންމާފައިވާ ކަމަށް އެ މައްސަލަ ދިރާސާ ކުރުމަށް އުފައްދާފައިވާ ކޮމިޝަނުގެ ރައީސް ކުރީގެ ބަންޑާރަ ނައިބު ޑރ. މުޙައްމަދު މުނައްވަރު ވިދާޅުވެއްޖެއެވެ.

ޔުމްނު ވެއްޓުނު މައްސަލަ އާއި ގުޅިގެން އުފެއްދި ކޮމިޝަނުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޑރ. މުނައްވަރު ވިދާޅުވީ، އެ މައްސަލަ އަކީ ވަރަށް ޚައްޞާސް މައްސަލަ އަކަށް ވުމުން މައްސަލައާއި ގުޅޭ މައުލޫމާތު އާއްމުންނަށް ހިއްސާ ކުރެވޭނެ ގޮތާއި ގުޅޭ ގޮތުން ކޮމިޝަންގެ މެންބަރުންގެ މެދުގައި މަޝްވަރާ ކުރެވިފައިވާ ކަމަށެވެ.

އެގޮތުން، މައްސަލައާއި ގުޅޭ މައުލޫމާތު ހުރި، ރައްޔިތުންނަށްވެސް އެ މައުލޫމާތު ދެވޭނެ ޕޯޓަލްއެއް ޤާއިމް ކުރުމަށް ނިންމާފައިވާކަން މުނައްވަރު ހާމަކުރައްވާފައިވެއެވެ.

އެހެންވީމާ ޕޯޓަލް އެއް ތައްޔާރު ކުރެވުނީމާ، އެ ޕޯޓަލް މެދުވެރިކޮށް ރައްޔިތުންނަށް މައުލޫމާތު ދެވޭނެ. ސުވާލުވެސް ކުރެވޭނެ. އަދި ސުވާލު ކުރެވުނީމަ، އޭގައި ހުންނަ އާއްމު ސުވާލުތަކަށް އަޅުގަނޑުމެން ޖަވާބު ދެމުން، އަދި، އިންޑިވިޖުއަލް ބޭފުޅުން ކުރާ ސުވާލު ތަކަށްވެސް ޖަވާބު ދެމުން، އަޅުގަނޑުމެން ކުރާ މަސައްކަތް ދުވަހުން ދުވަހަށް ފެންނަ ގޮތަށް ގެންދާނީ.

ޑރ މުޙައްމަދު މުނައްވަރު

ކަންމިހެން ހުރި ނަމަވެސް، އެ މައްސަލާގައި، ޖިނާޢީ ކުށެއް ކުރެވުނު ކަމުގެ ތުހުމަތާއި ގުޅޭ ތަހުގީގެއް ކަމަށް ވާތީ، އެ ތަހުގީގު ފުރިހަމަވުމުން ހާމަކުރެވޭނެ ބައެއް ކަންކަންވެސް ހުންނާނެ ކަން މުނައްވަރު ފާހަގަކުރެއްވިއެވެ.

އެނޫން އެހެން ހުރިހާ މަސައްކަތަކާއި ގުޅޭ މައުލޫމާތުތައް ޕޯޓަލް މެދުވެރިކޮށް ހިއްސާ ކުރެވޭނެ ކަމަށް މުނައްވަރު ވިދާޅުވިއެވެ.

ޔުމްނު ވެއްޓުނު މައްސަލަ ބަލައި، އެ މައްސަލައާ ގުޅިގެން މިނިވަން، މުސްތަގިއްލު އަދި އިތުބާރު ހިފޭ ތަހުގީގެއްކުރުމަށާ، އެ ހާދިސާގެ ހަގީގަޔް ހޯދައި، އެ ހާދިސާއާ ގުޅިގެން ކަމާބެހޭ މުއައްސަސާތަކުން މިހައިތަނަށް ކޮށްފައިވާ މަސައްކަތްތަކީ ކޮބައިކަން ބެލުމަށާއި، އެ މައްސަލައާ ގުޅިގެން އަޅަންޖެހޭ ފިޔަވަޅުތައް އަޅައި، އެ މައްސަލައިގައި ކަންހިނގައިފައިވާ ގޮތުގެ ތަހުގީގެއް އިންސާފުވެރިކަމާއި އަދުލުވެރިކަމާއެކީ ކުރުމަށް ރައީސުލްޖުމްހޫރިއްޔާގެ ޤަރާރަކުން އުފެއްދެވި ކޮމިޝަންގައި ޖުމްލަ ފަސް މެންބަރުން ހިމެނެއެވެ.

އެއީ؛

ޑރ. މުޙައްމަދު މުނައްވަރު، ގ. ހަސަންކާރިގެ (ރައީސް)

ބްރިގޭޑިއަރ ޖެނެރަލް ރިޓަޔަޑް އަޙްމަދު މުޙައްމަދު، ވ. އަލްމާން

ޑޮކްޓަރ މޫސާ މުރާދު، ދަފުތަރު ނަންބަރު ރސ 641

ޖަބީން މުޙައްމަދު، ތ. ވޭމަންޑޫ، މޫނިމާގެ

އާމިނަތު އީނާސް، ހ. ހަބަރުގެ