ހައްޖުވެރިންގެ ފުރަތަމަ ގްރޫއްޕު އަންނަ ހުކުރުދުވަހު ރާއްޖެ އަންނާނެ: ހައްޖު ކޯޕަރޭޝަން
ލިޔުންތެރިޔާ
އަބްދުﷲ ހުސައިން
މިފަހަރު ރާއްޖެއިން ހައްޖަށްދިޔަ ހައްޖާޖީން އަންނަ ހުކުރުދުވަހުން ފެށިގެން ރާއްޖެ އަންނަން ފަށާނޭކަމަށް މޯލްޑިވްސް ހައްޖު ކޯޕަރޭޝަނުން ބުނެފިއެވެ.
ހައްޖު ކޯޕަރޭޝަނުން ވަނީ ދިވެހި ހައްޖާޖީން ރާއްޖެ އަންނަ ތާވަލް އާއްމުކޮށްފައެވެ. އެގޮތުން ފުރަތަމަ ގްރޫޕް އަންނަ ހުކުރުދުވަހު މާލެ އައުމަށް ޖިއްދާ އެއާޕޮޓުން ފުރުމަށް ހަމަޖެހިފައިވާއިރު، އެމީހުން އަންނަ ފްލައިޓް ވެލާނާ އިންޓަރނެޝަނަލް އެއާޕޯޓަށް ޖައްސާނީ ހުކުރުދުވަހުގެ މެންދުރުފަހު 14:00 ގައެވެ.
ދިވެހި ހައްޖާޖީން ރާއްޖެ އައުމަށް ތާވަލްކޮށްފައިވަނީ މިމަހުގެ 5،7،8 އަދި ނުވަވަނަ ދުވަހުއެވެ. ހައްޖުވެރިން އައުމަށް ހަމަޖެހިފައިވަނީ މޯލްޑިވިއަން އަދި ސައުދީއާ އެއާލައިނުންނެވެ.
ހައްޖުގެ މަނާސިކުތައް ފުރިހަމަކުރުމަށްފަހު ދިވެހި ހައްޖާޖީން މިހާރު ދަނީ މަދީނާ ދަތުރަށް ތައްޔާރުވަމުންނެވެ. އެގޮތުން މަދީނާ ދަތުރާ ބެހޭ މައުލޫމާތު ހައްޖާޖީންނަށް ދީ ނިންމާފައިވާއިރު، މިއަދުގެ ވަގުތެއްގައި ހައްޖުވެރިން މަދީނާއަށް ދިއުމަށް ވަނީ ތާވަލްކޮށްފައެވެ. މި ދަތުރުގައި އިސްލާމީ ތާރީހާ ގުޅިފައިވާ މަދީނާގެ މުހިންމު ތަންތަނަށް ދިއުމަށް ވަނީ ހަމަޖެހިފައެވެ.
މިއަހަރު ރާއްޖެއިން 1،000 މީހުން ހައްޖުގެ އަޅުކަން އަދާކުރުމަށް ވަނީ މައްކާއަށް ގޮސްފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
