އެއާ އެމްބިއުލާންސްގެ ޙިދުމަތް ކާމިޔާބު، ޙިދުމަތް ފުޅާކުރުމަށް މީހުން ތަމްރީނުކުރާނަން: ވަޒީރު ނާޒިމް

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ރިޔާސީ ވަޢުދުފުޅާ އެއްގޮތަށް އެއާ އެމްބިއުލާންސްގެ ޙިދުމަތް ފަށައި، އިތުރަށް ހިދުމަތް ފުޅާކުރުމުގެ ގޮތުން މީހުން ތަމްރީނުކުރުމުގެ މަސައްކަތްތަކެއް ފެށުމަށް ތައްޔާރުވަމުންދާކަމަށް ހެލްތު މިނިސްޓްރީން ބުނެފިއެވެ.

ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ސިއްހީ ކަންކަމާ ބެހޭ ވަޒީރު އަބްދުالله ނާޒިމު ވިދާޅުވީ އެއާ އެމްބިއުލާންސްގެ ހިދުމަތް ތައާރަފުކުރުމުގެ ސަބަބުން ސިއްހީ ދާއިރާއިން ގިނަގުނަ ކުރިއެރުންތަކެއް ލިބިފައިވާ ކަމަށާއި ވަރަށް ގިނަ ބަޔަކު މިހާތަނަށް އެ ހިދުމަތް ހޯދާފައިވާކަމަށެވެ.

ރައީސްގެ ރިޔާސީ ވަޢުދުފުޅާ އެއްގޮތަށް 2024 ވަނަ އަހަރުގެ މާޗު މަހުގެ އެއްވަނަ ދުވަހު ފެށި އެއާ އެމްބިއުލާންސްގެ ހިދުމަތަކީ ކާމިޔާބު ހިދުމަތެއްކަން ފާހަގަކުރައްވާ، ވަޒީރު ވިދާޅުވީ މި ޙިދުމަތުގެ ސަބަބުން ރައްޔިތުންނަށް ބޮޑެތި ލުއި ފަސޭހަތަކެއް ލިބިގެން ދިޔަކަމަށެވެ.

އަދި މި ޙިދުމަތް އިތުރަށް ފުޅާކުރެއްވުމަށް ސަރުކާރުން ބޭނުންވާ ކަމަށެވެ. ނަމަވެސް މި މަސައްތަކަށް ބޭނުންވާ މިންވަރަށް މީހުން ތަމްރީނު ކުރެވިފައި ނެތުމުގެ ސަބަބުން ގޮންޖެހުންތަކަކާ ކުރިމަރިލާންޖެހޭ ކަމަށް ވަޒީރު އެ ނޫސްވެރިންގެ ބައްދަލުވުމުގައި ވިދާޅުވިއެވެ.

މޯލްޑިވްސް ނޭޝަނަލް ޔުނިވާސިޓީއާ ގުޅިގެން މިދާއިރާގެ މީހުން ތަމްރީނުކުރުމުގެ ޕްރޮގުރާމުތަކެއް ހިންގުމަށް ސޯޝަލް ކައުންސިލުގެ ހުއްދަ ލިބި ނިންމުންތައް ނިމި އެ މަސައްކަތްތައް އަޅުގަނޑުމެން މިދަނީ ކުރަމުން. ކަންކަން ތަރުތީބުކޮށްފައިވާ ގޮތަށް ކުރިއަށްދާނަމަ މި އަހަރުގެ ފަހުކޮޅު ހުޅުވައިލާ ކޯސްތަކުގެ ތެރޭގައި މި ދާއިރާގެ ކޯސްތައް ހިމެނޭނެ،

ވަޒީރު ނާޒިމް

ވަޒީރު ހިއްސާކުރެއްވި ތަފާސްހިސާބުތަކުން ހާމަވާ ގޮތުގައި 2024 ވަނަ އަހަރުގެ މާޗު މަހުން ފެށިގެން 2025 ވަނަ އަހަރުގެ އޭޕްރީލު މަހުގެ ނިޔަލަށް އެއާ އެމްބިއުލާންސް 899 ދަތުރުކޮށްފައިވެއެވެ. އެ ދަތުރުތަކުގައި 1،072 ބަލިމީހުން އުފުލާފައިވެއެވެ.