މެންބަރު ފަލާހަށް ވިޔަފާރީގެ ނަފާގެ ގޮތުގައި މިދިޔަ އަހަރު 1.8 މިލިއަން ރުފިޔާ
ލިޔުންތެރިޔާ
އަޙްމަދު އާހިލް ސަޢީދު
ރައްޔިތުންގެ މަޖިލީހުގެ އިނގުރައިދޫ ދާއިރާގެ ޕީއެންސީއަށް ނިސްބަތްވާ މެންބަރު އިބްރާހިމް ފަލާހަށް ވިޔަފާރީގެ ނަފާގެ ގޮތުގައި މިދިޔަ އަހަރު 1.8 މިލިއަން ރުފިޔާ ލިބިފައިވާ ކަމަށް ރައްޔިތުންގެ މަޖިލީހަށް ހުށަހެޅި މާލީބަޔާނުން ހާމަވެއްޖެއެވެ.
20 ވަނަ ރައްޔިތުންގެ މަޖިލީހުގެ މެންބަރުންގެ 2 ވަނަ އަހަރުގެ މާލީ ބަޔާނުގައިވާ ގޮތުން މިދިޔަ އަހަރު ތެރޭގައި 2 ކުންފުންޏެއް އޭނާ ވަނީ އުފައްދާފައެވެ.
ބަޔާނުން ހާމަވާ ގޮތުގައި، ފަލާހަށް މުސާރައިގެ ގޮތުގައި ރައްޔިތުންގެ މަޖިލީހުން 990،000 ރުފިޔާ ލިބުނު އިރު ވިޔަފާރީގެ ނަފާގެ ގޮތުގައި މިދިޔަ އަހަރު އޭނާއަށް ވަނީ 1.8 މިލިއަން ރުފިޔާ ލިބިފައެވެ. މީގެ އިތުރުން، ކުލީގެ ގޮތުގައި މިދިޔަ އަހަރު 2.8 މިލިއަން ރުފިޔާ ލިބިފައިވާއިރު މިދިޔަ އަހަރު ތެރޭގައި ފަލާހު ވަނީ ބީއެމްއެލް އިން 15 މިލިއަން ރުފިޔާގެ ލޯނެއް ވެސް ނަގާފައެވެ.
އެގޮތުން، އޭނާގެ ނަމުގައި 5 ބިން އޮތް ކަމަށް ވެސް މާލީ ރިޕޯޓުން ވަނީ ހާމަވެފައެވެ. މިދިޔަ އަހަރު 21 މިލިއަން ރުފިޔާއަށް ހުޅުމާލެއިން ގަނެފައިވާ ބިމަކާއި އިންނަމަދޫ ފަލަކް، ފަތް، އަސުރުހިޔާގެ އިތުރުން މާލެއިން އޭނާ ވަނީ މ. އަސުރުކުރި ގަނެފައެވެ. މާލޭއިން އޭނާ ގޯތި ގަތީ 4 މިލިއަން ރުފިޔާއަށް ކަމަށް ރިޕޯޓުން ހާމަވެއެވެ.
މީގެ އިތުރުން، އޭނާގެ ނަމުގައި ހުރި ކުންފުނިތަކަކީ ޑޮލަރު ގަނެ ވިއްކުމުގެ ވިޔާފަރިއަށް ސަން ކަރަންސީ އެކްސްޗޭންޖާއި، ސަން ކޮންސްޓްރަކްޝަން ގެ ނަމުގައި އުފައްދާފައިވާ ކުންފުންޏެކެވެ. އެ ދެ ކުންފުނީގެ ވެސް 90 އިންސައްތަ ހިއްސާ ފަލާހުގެ އޮވެއެވެ. އަދި އޭނާއަކީ އިތުރު 3 ކުންފުންޏެއްގެ ވެސް ހިއްސާދާރެކެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
