މުލީ އެއާޕޯޓު އެޅުމަށް ޖުމްލަ 540 މިލިއަން ޚަރަދުވި؛ މިއީ އަތޮޅުގެ އާބާދީގެ ބޮލަކަށް ލައްކައެއްހާ ރުފިޔާ: މުއްޠަލިބު

މުލަކު އަތޮޅުގެ ފުރަތަމަ އެއާޕޯޓް، މުލީ އެއާޕޯޓް އެޅުމަށް 540 މިލިއަން ރުފިޔާ ދައުލަތުގެ ބަޖެޓުން ހޭދަކޮށްފައިވާ ކަމަށް އިމާރާތް ކުރުމާ ބެހޭ ވަޒީރު ޑރ. ޢަބްދުالله މުައްޠަލިބު ވިދާޅުވެއްޖެއެވެ.

މުލީ އެއާޕޯޓް ހުޅުވުމުގެ ރަސްމިއްޔާތުގައި ވާހަކަ ދައްކަވަމުން ވަޒީރު ވިދާޅުވީ، އެ އެއާޕޯޓަކީ ވަރަށް ގިނަ މީހުންގެ ބުރަ މަސައްކަތް ކަމަށެވެ.

އަދި އެއާޕޯޓް ހުޅުވިގެންދަނީ، ރާއްޖޭގެ ރައްޔިތުންނަށް ތަރައްޤީ ގެނެސްދިނުމަށް ބުރަ މަސައްކަތްތަކެއް ކުރައްވަމުން ގެންދަވާ ވެރިއެއްގެ ބުރަމަސައްކަތުން ކަމަށާ، މުލި އެއާޕޯޓްގެ މަސައްކަތަކީ ރައީސް މުޢިއްޒު ވެރިކަމާ ހަވާލުވެވަޑައިގެންނެވި ފަހުން އެންމެ އިސްކަމެއް ދެއްވައިގެން ނިންމަވަން އެދިލެއްވި އެއާޕޯޓް ކަމަށް ވަޒީރު ވިދާޅުވިއެވެ.

ވަޒީރު ވިދާޅުވިގޮތިގައި، އެއާޕޯޓްގެ މަސައްކަތް 18 މަސްދުވަހުގެ ތެރޭގައި ނިންމާލެވިފައިވަނީ އެމްޓީސީސީގެ ވެސް ވަރަށް ބުރަ މަސައްކަތުންނެވެ. އެހެންކަމުން ވަޒީރު ވަނީ އެ ކުންފުންޏަށް ޝުކުރު އަދާކުރައްވާފައެވެ.

މިއަދު ހުޅުވިގެންދާ މަޝްރޫޢުއަށް ޖުމްލަ، 2014 ވަނަ އަހަރު ފެށުނު ބިން ހިއްކުމުގެ މަޝްރޫޢު އިން ފެށިގެން މިއަދު ހުޅުވުމާ ހަމައަށް، 540 މިލިއަން ރުފިޔާ ދަޢުލަތުން ވަނީ ޚަރަދު ކޮށްފައި. މިއީ މި އަތޮޅުގެ އާބާދީގެ ނިސްބަތަށް ބަލާ ކަމަށް ވާނަމަ ބޮލަކަށް ލައްކައަކަށްވުރެ ގިނަ ރުފިޔާ.

އިމާރާތް ކުރުމާ ބެހޭ ވަޒީރު ޑރ. ޢަބްދުالله މުައްޠަލިބު

އެހެންކަމުން، ސަރުކާރުން މުލަކުއަތޮޅަށް ކޮށްދިން މަސައްކަތް ބަލައިގަނެ، މުޅި އަތޮޅަށް ތަރައްގީ ގެނައުމަށް ރައްޔިތުން މަސައްކަތް ކުރުމަށް ވަޒީރު ވަނީ އެދިވަޑައިގެންފައެވެ.

ޓޫރިޒަމްގެ އިންވެސްޓްމަންޓްތައް ގެނައުމަށް މަސައްކަތް ކުރުން. ފަތުރުވެރިކަމުގެ ގޮތުން ގެސްޓްހައުސް ވިޔަފާރިއަށް މަސައްކަތް ކުރުން. ހަމަ އެއާއެކު އާބާދީ ތަރައްގީ އެއްފަސް ކުރުމުގެ ނަމުގައި މި އަތޮޅު ދޫކޮށް ނުދިޔުން. (އޭގެ ބަދަލުގައި) އަތޮޅުގެ ކުދި ރަށްތަކުގައި ތިބި ރައްޔިތުން ބޮޑެތި ރަށްތަކަށް އެއްވެ، އާބާދީ ތަރައްޤީ އެއްފަސް ކުރުމަށް މަސައްކަތް ކުރުން.

އިމާރާތް ކުރުމާ ބެހޭ ވަޒީރު ޑރ. ޢަބްދުالله މުައްޠަލިބު

އެތެރޭގެ އުދުހުންތަކަށް ހާއްސަ މުލި އެއާޕޯޓަކީ 1،200 މީޓަރު ދިގު، 30 މީޓަރު ފުޅާ ރަންވޭ އަކާއި، ޓެކްސީވޭއަކާއި އޭޕްރަން ގާއިމުކޮށްފައިވާ އެއާޕޯޓެކެވެ. އެއާޕޯޓް ހިންގަނީ ރީޖަނަލް އެއާޕޯޓްސް ކޮމްޕެނީން އިންނެވެ.

އެ އެއާޕޯޓަށް ޓެސްޓް ފްލައިޓް ޖައްސާފައިވަނީ މި އަހަރުގެ އޭޕްރީލް މަހުގައެވެ.

މުލީގައި ބިންހިއްކުމުގެ މަސައްކަތްކުރަން އެމްޓިސީސީ އާއި ހަވާލުކޮށް ސޮއި ކުރެވުނީ، މިހާރުގެ ރައީސް ޑރ. މުހައްމަދު މުއިއްޒު ހައުސިން މިނިސްޓަރު ކަމުގައި ހުންނެވި އިރު 2014 ވަނަ އަހަރު އެވެ.

މި މަޝްރޫއުގެ ދަށުން 14 ހެކްޓަރުގެ ބިން ހިއްކާއި، 1،812 މީޓަރުގެ ސަރަހައްދެއްގައި ގޮނޑުދޮށް ހިމާޔަތް ކުރުމުގެ މަސައްކަތް ކޮށްފައިވެ އެވެ.