ދަތުރުވެރިންގެ މާރުކޭޓުގައި އެންމެ ޑިމާންޑުބޮޑު ދިވެހި އުފެއްދުމަކީ ކޮޕީފަތް!

ދަތުރުވެރިންގެ މާރުކޭޓުގައި ތަކެތީގެ އަގުތަކަށް އެންމެބޮޑު ބަދަލެއް އަންނަނީ ރަމަޟާންމަހުއެވެ. ރަމަޟާންމަހު އެންމެ ބޮޑު ޑިމާންޑެއް އޮންނަ އެކައްޗަކީ ފަތުގެ ބާވަތްތަކެވެ. ހާއްސަ ގޮތެއްގައި ކުއްޅަފިލާފަތާއި ކޮޕީފަތެވެ. މީގެ ތެރެއިންވެސް އެންމެ ބޮޑު ޑިމާންޑެއް އޮންނަނީ ކޮޕީފަތަށެވެ.

ރަމަޟާންމަހު ކޮޕީފަތުގެ ޑިމާންޑް ހުރިގޮތަށް ބަލާއިރު، މާލެ ސަރަހައްދުގައި އެންމެ އާބާދީބޮޑުކަމަށް ފާހަގަކުރެވޭ ހުޅުމާލެސިޓީގެ މާރުކޭޓުތަކުގައި މިއަދު ކޮޕީފަތްލިބެން ހުރީ ވަރަށް މަދުންނެވެ. މާރުކެޓުގައި ކޮޕީފަތް ވަރަށް މަދުން ހުރިއިރު، ތިން ފަތުގެ ކޮޕީފަތް ބޮނޑިއެއް ލިބެން ހުރީ 20 ރުފިޔާއަށެވެ.

މާލޭގެ ދަތުރުވެރިންގެ މާރުކޭޓަށް ބަލާއިރު، ކޮޕީފަތެއް ތިން ރުފިޔާއަށް ލިބެން އެބަހުއްޓެވެ. މާލޭ ބާޒާރަށް އެންމެ ގިނައިން ކޮޕީފަތް އެންމެގިނައިން ގެންނަ އެއް ރަށަކީ ކ.ކާށިދޫއެވެ.

ވޮއިސްއަށް މައުލޫމާތު ހިއްސާކުރަމުން ކާށިދޫ ކައުްނސިލްގެ ރައީސް މުހައްމަދު އާމިރު ވިދާޅުވީ، ކޮޕީފަތަކީ އަބަދުވެސް އެރަށުގައި ހައްދާ އެއްޗެއް ކަމަށާއި، މިގޮތުން މިހާރުވެސް ކާށިދޫގައި ކޮޕީފަތް ބޭނުންވަރަކަށް ލިބެން އެބަހުރި ކަމަށެވެ.

ކާށިދޫއިން މާލޭ ބާޒާރަށް ފުޅާދާއިރާއެއްގައި ކޮޕީފަތް ސަޕްލައިކުރާ މީހަކު ނަން ނުޖެހުމަށް އދެމުން ބުނީ މިއަދު އެކަނިވެސް 2،000 ހާހަށްވުރެ ގިނަ ފަތް ފޮނުވާފައިވާކަމަށެވެ. މިހާތަަށް އެންމެ ޑިމާންޑް ބޮޑީވެސް ކޮޕީފަތުގެކަން އޭނާ ފާހަގަކުރިއެވެ. މޫސުން ގޯސްވެ ދަތުރުފަތުރު ކުރުމުގައި ދަތިތަކެއް ދިމާވާނަމަ ކޮޕީފަތް ސަޕްލައިކުރުމުގައި ދަތިވެއްޖެ ނަމަ ބާޒާރުގައި ކޮޕީފަތުގެ އަގު އުފުލުމުގެ ފުރުސަތު ބޮޑުކަމަށް އޭނާ ވަނީ ފާހަގަކޮށްފައެވެ. ނަމަވެސް ދަތުރުފަތުރުގެ ކަންކަން ކުރިއަށްދާނަމަ ބާޒާރުގައި އަގުތައް މައްޗަށް ނުދާވަރަށް ކޮޕީފަތް ސަޕްލައި ކުރެވޭނޭކަމަށް އޭނާ ބުންޏެވެ.