ކާށިދޫ ޔޫތް ޓްރޮފީ ވުމެންސް ހޭންޑްބޯލް މުބާރާތުގެ ޗެމްޕިއަންކަން އެމްޖީ ސްޕޯޓްސް ކްލަބުން ހޯދައިފި

ކ. ކާށިދޫގައި ކާމިޔާބުކަމާއެކު ކުރިއަށްދިޔަ "ކާށިދޫ ޔޫތް ޓްރޮފީ 2026" ވިމެންސް ހޭންޑްބޯލް މުބާރާތުގެ ޗެމްޕިއަންކަން އެމްޖީ ސްޕޯޓްސް ކްލަބުން ހޯދައިފިއެވެ.

އެމްޖީ ސްޕޯޓްސް އިން މި މުބާރާތުގެ ޗެމްޕިއަންކަން ކަށަވަރުކުރީ ރޭ ކުޅުނު ފޯރިގަދަ ފައިނަލް މެޗުގައި އެންޖީ ސްޓާޓިންއާ ވާދަކޮށް މޮޅުވެގެންނެވެ. މިމެޗް އެމްޖީ ސްޕޯޓްސް ގެންދިޔައީ 10-4 ގެ ނަތީޖާއިންނެވެ. މުޅި މުބާރާތުގައި ވެސް އެމްޖީ ސްޕޯޓްސް ފެނިގެން ގޮސްފައިވަނީ ވަރަށް ވަރުގަދަ ޓީމެއްގެ ގޮތުގައެވެ.

ފައިނަލް މެޗަށްފަހު ބޭއްވި އިނާމު ދިނުމުގެ ރަސްމިއްޔާތުގައި، ޗެމްޕިއަން ޓީމަށް ތަށި ހަވާލުކޮށްފައިވާއިރު، މުބާރާތުގެ އެކި ވަނަތަކަށް ހޮވުނު ޓީމުތަކަށާއި ކުޅުންތެރިންނަށް ވަނީ ތައްޓާއި ހަނދާނީ ލިޔުން ހަވާލުކޮށްފައެވެ.

މި މުބާރާތުގެ ވަކިވަކި ވަނަތަކަށް ބަލާއިރު، މުބާރާތުގެ އެންމެ މޮޅު ކުޅުންތެރިޔާ ނުވަތަ "ކުއީން އޮފް ދަ ޓޯނަމަންޓް" ގެ މަގާމު ހޯދާފައިވަނީ ޗެމްޕިއަން އެމްޖީ ސްޕޯޓްސްގެ މައީޝާ މުޖުތަބާއެވެ.

މީގެއިތުރުން، އެންމެ އުންމީދީ ކުޅުންތެރިޔާ (ޕްރޮމިސިންގ ޕްލޭޔަރ) ގެ އެވޯޑް މިޝްޔާ ހާސިލުކުރިއިރު، މުބާރާތުގެ އެންމެ މޮޅު 7 ކުޅުންތެރިން ވެސް ވަނީ ހޮވާފައެވެ.

މި މުބާރާތުގެ އެންމެ އަޚްލާގު ރަނގަޅު ޓީމު ނުވަތަ ފެއާޕްލޭ ޓީމަކަށް ހޮވިފައިވަނީ ނައިންއެކްސް އެވެ.

އެންމެ މޮޅު ކޯޗްގެ މަގާމް ހޯދީ އެމްޖީ ސްޕޯޓްސްގެ ކޯޗް އަލީ ނަޖާހެވެ.

މި މުބާރާތަކީ ކާށިދޫގެ ޒުވާނުންގެ މެދުގައި ކުޅިވަރުގެ ރޫޙު އާލާކޮށް، ހުނަރުވެރި އަންހެން ކުޅުންތެރިން އުފެއްދުމުގެ މަގުސަދުގައި ކުރިއަށްގެންދިޔަ މުބާރާތެކެވެ.

ކާށިދޫގެ 15 ކްލަބެއް އެކުލެވޭ ގޮތަށް އުފައްދާފައިވާ "ކާށިދޫ ޔޫތް ޓްރޮފީ" އިން އިންތިޒާމުކުރާ މި މުބާރާތަކީ އެ ޖަމްޢިއްޔާއިން ބޭއްވި ފުރަތަމަ ހޭންޑްބޯލް މުބާރާތެވެ. މީގެ ކުރިން ކާށިދޫ ޔޫތް ޓްރޮފީގެ ނަމުގައި ވަނީ ކާމިޔާބު ދެ ފުޓްބޯޅަ މުބާރާތެއް ވެސް ބާއްވާފައެވެ. އަދި 2013 ވަނަ އަހަރު ވެސް އެ ރަށުގެ ޒުވާނުން އިސްނަގައިގެން މިފަދަ ހޭންޑްބޯލް މުބާރާތެއް ކާމިޔާބުކަމާއެކު ވަނީ ކުރިއަށް ގެންގޮސްފައެވެ.

މިފަހަރުގެ މުބާރާތުގައި ވާދަކުރި ޓީމްތަކަކީ އެންޖީ ސްޓާރިން، އެންޖީ ޖޫނިއާސް، އީއެން ހޭންޑްބޯލް ޓީމް، އެމްޖީ ސްޕޯޓްސް ކްލަބް އަދި ޓީމް ނައިން އެކްސް އެވެ.