ހދ.ނޮޅިވަރަންފަރުގައި ޓޫރިޒަމްގެ ބޭނުމަށް ގެސްހައުސް، ހޮޓާ ތަރައްޤީކުރުމަށް ބިން ދޫކުރަނީ!

ހދ. އަތޮޅު ނޮޅިވަރަންފަރުގައި ޓޫރިޒަމްގެ ބޭނުމަށް ގެސްޓްހައުސް އަދި ޓޫރިސްޓް ހޮޓާ ތަރައްޤީކުރުމަށް ބިން ދޫކުރުމަށް ހުޅުވާލައިފިއެވެ.

ނޮޅިވަރަންފަރު ކައުންސިލުން ވަނީ އެރަށު އަތިރިމަތީ ސަރަހައްދުން 9 ބިމެއް ޓޫރިޒަމްގެ ބޭނުމަށް ކުއްޔަށްދޫކުރުމަށް ނިންމައި އެ ބިންތައް ބޭނުންވާ ފަރާތްތަކަސް އާއްމުކޮށް އެ ފުރުސަތު ހުޅުވާލާފައެވެ. މީގެ ތެރޭގައި ހިމެނެނީ 2،170 ސްކެއާ މީޓަރުން ފެށިގެން 14,386.33 އާ ދެމެދުގެ ބިންތަކެވެ.

މީގެ ތެރެއިން ޕްލޮޓް އޭގައި ހިމެނޭ 14,386.33 ސްކެއާ މީޓަރުގެ ބިމުގައި މަދުވެގެން 70 އެނދުގެ ހޮޓަލެއް ހަދަންޖެހެއެވެ. ހޮޓަލުގެ އެއްބަސްވުމުގައި ސޮއިކުރާތާ 36 މަސްދުވަހުގެ ތެރޭގައި މަސައްކަތް ނިންމަން ޖެހެއެވެ. އެތަނުގެ ބިމުކުއްޔާއި ސީއެސްއާރު ހަރަދުގެ ގޮތުގައި 203،318 ޑޮލަރު ނުވަތަ 3.1 މިލިއަން ރުފިޔާ ހޭދަކުރަންޖެހެއެވެ. ކައުންސިލުން ކުރި އިއުލާނުގައިވާގޮތުން ބިންތަކަށް ޝައުގުވެރިވާ ފަރާތްތަކުން އަންނަ އޭޕްރިލްމަހުގެ 8 ވަނަ ދުވަހުގެ 10:00 ޖެހުމުގެ ކުރިން ޕްރޮޕޯސަލް ހުށަހަޅައި ކައުންސިލަށް އަންގަންޖެހެއެވެ.

ނޮޅިވަރަންފަރު ކައުންސިލުން އެރަށުގައި ޓޫރިޒަމްގެ ބޭނުމަށް ބިން ކުއްޔަށް ދިނުމަށް ހުޅުވާލާފައިވާއިރު، އެރަށަކީ މިހާރުވެސް ފަތުރުވެރިންގެ އިތުރުން ދިވެހިންގެ މެދުގައިވެސް ޗުއްޓީހޭދަކޮށްލުމަށް ވަރަށް މަޤްބޫލް ރަށެކެވެ.

މިކަމާ ގުޅޭގޮތުން ވޮއިސްއާ މައުލޫމާތު ހިއްސާކުރަމުން ނޮޅިވަރަންފަރު ކައުންސިލްގެ ރައީސް ޢަބްދުﷲ ނަދީމް ވިދާޅުވީ، އެރަށުގައި ގެސްޓްހައުސް ފަދަ ތަންތަން ތަރައްޤީކުރުމަށް އިންވެސްޓަރުންގެ ޝައުގުވެރިކަން ހުރިކަން ފާހަގަކުރެވިފައިވާކަމަށެވެ.. އޭނާ ވިދާޅުވީ ހދ.ހަނިމާދޫ އިންޓަރނޭޝަނަލް ކުރުމުގެ ބޮޑު މަޝްރޫޢު ނިމެމުންދާއިރު، ނޮޅިވަރަންފަރަކީ ޓޫރިޒަމް ފުޅާކުރުމަށް އެންމެ ފައްކާ މަންޒިލްކަމަށެވެ.