"ޒަޚަމް ތަކަށް އަވަސް ފަރުވާ ނުލިބި، އެ ވޭނުގައި ޣައްޒާގެ އެތައް ކުއްޖަކު ދަނީ ޝަހީދުވަމުން“

ޣައްޒާގައި ހިނގަމުންދާ ޤަތުލުޢާއްމުގެ ސަބަބުން ޒަޚަމްވެފައިވާ ކުޑަކުދިންނަށް ބޭނުންވާ ފަރުވާ ނުލިބި، އެ ވޭނުގައި އެތައް ކުއްޖަކު ދަނީ ޝަހީދުވަމުންކަމަށް އދ. ގެ އޭޖެންސީތަކުން ބުނެފިއެވެ.

މިކަން ދިމާވަމުންދަނީ އިސްރާއީލުގެ ފަރާތުން ބޭސްފަރުވާއަށް ބޭރަށް ފޮނުވުމަށް ހުއްދަދޭ ކުދިންގެ އަދަދު ދަށްވަމުން ދިއުމާއި، ރަފާ ބޯޑަރު ބަންދުވުމާ ގުޅިގެންކަމަށް އދ. އިން ވަނީ ފާހަގަކޮށްފައެވެ.

ޔުނިސެފްގެ ޖޭމްސް އެލްޑަރ ވިދާޅުވި ގޮތުގައި، ކުރިން މަހަކު 300 އާ ގާތްކުރާ އަދަދެއްގެ ކުދިން ބޭސްފަރުވާއަށް ބޭރަށް ފޮނުވަމުން ދިޔަ ނަމަވެސް، މިހާރު އެ އަދަދު ވަނީ ދުވާލަކު އެންމެ ކުއްޖަކަށްވުރެ ދަށްވެފައެވެ. މިހެން ދިމާވަނީ އިސްރާއީލުގެ ފަރާތުން ސެކިއުރިޓީ ހުއްދަ ނުލިބުމުގެ ސަބަބުންކަމަށް އޭނާ ވިދާޅުވިއެވެ.

"ނަތީޖާއެއްގެ ގޮތުން، ޣައްޒާގެ ކުދިން ދަނީ މަރުވަމުން. އެއީ ހަމައެކަނި ބޮންތަކާއި، ވަޒަންތަކާއި، މިސައިލްތަކުގެ ސަބަބަކުން ނޫން. އެ މިސައިލް ތަކުން އެ ކުދިންގެ ގެތައް ސުންނާފަތި ވެގެން ދިޔަ ނަމަވެސް، މިރެކަލް އަކުން ކުއްޖާ ސަލާމަތްވާ ފަހަރު ތަކުގައިވެސް އެ ކުދިންނަށް ޣައްޒާއިން ބޭރަށް ނުކުމެ، އެ ކުދިންގެ ފުރާނަ ސަލާމަތްކުރެވޭނެ ކުއްލި ފަރުވާ ހޯދުމަށް ދަނީ ހުރަސްއަޅަމުން"އެލްޑަރ ވިދާޅުވިއެވެ.

ހައްދުފަހަނަ އަޅާފައިވާ އިސްރާއީލުން ފަރާތުން މެޑިކަލް އިވެކުއޭޝަނަށް އެދޭ ހުށަހެޅުންތައް ބަލައިނުގަތް ވަގުތެއް ނުވަތަ އެއްވެސް ނިންމުމަކަށް އައި ސަބަބެއް ބަޔާންކޮށްފައެއް ނުވެއެވެ.