ރައީސް ޑރ.މުޢިއްޒުގެ ވެރިކަމާ ތޮޅެ ވެރިކަން ބަލިކަށި ކުރުމަކީ ހިލަފަރުބަދައެއް ކެނޑުން ކަހަލަކަމެއް: މުހައްމަދު

ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ ވެރިކަމާއި ތޮޅެ، ވެރިކަން ބަލިކަށި ކުރަން މަސައްކަތް ކުރުމަކީ ހިލަ ފަރުބަދައެއް ކެނޑުން ފަދަ ކަމެއް ކަމަށް، ޕީޕީއެމް/ޕީއެންސީގެ ހަރަކާތު ކޮމިޓީގެ ޗެއާރ މުހައްމަދު އިސްމާއިލް ވިދާޅުވެއްޖެއެވެ.

ރައީސް މުޢިއްޒުގެ ކެބިނެޓްގައި ހިމެނިވަޑައިގަންނަވާ ދެ ވަޒީރުންނާއި، ބަނޑާރަ ނާއިބަށް އެމްޑީޕީ މެޖޯރިޓީ އޮންނަ މަޖިލީހުން ރުހުން ނުދީ، ރައީސުލްޖުމުހޫރިއްޔާގެ އިތުބާރު ނެތް ކަމުގެ މައްސަލައެއްވެސް މަޖިލީހަށް ހުށަހަޅަން ނިންމަވާފައިވާ މި ދަނޑިވަޅުގައި މުހައްމަދު އެކްސްގައި ކުރެއްވި ޕޯސްޓެއްގައި ވިދާޅުވީ، މި ސަރުކާރުގެ ދިފާޢުގައި 24/7 ތައްޔާރީ ހާލަތުގައި ދިވެހިރައްޔިތުންގެ ތެރެއިން %53.9 ރައްޔިތުން ތިބި ކަމަށެވެ.

މީގެ އިތުރުން މިކަމާއި ގުޅިގެން މުހައްމަދު ކުރެއްވި އެހެން ޕޯސްޓެއްގައި ވަނީ, މުޖުރިމުންނާ ގައްދާރުން ވަކިކުރާނެ ޑިވައިސްއެއް ނުވަތަ އާލާތެއް ހޯދުމަކީ ކުރަން ޖެހިފައިވާ ކަމެއް ކަމަށް ވިދާޅުވެފައެވެ.

"ގާނޫނީ ވެރިކަމަކާ ދެކޮޅަށް ރައްޔިތުންގެ ހާދިމުންތަކެއް ނިކުތުމަކީ ދިވެހި ރައްޔިތުންނަށާ ދިވެހި ގައުމަށް ގައްދާރުވުން ނޫން ކޮންކަމެއްބާ؟"

މުހައްމަދު ވިދާޅުވި ގޮތުގައި، ޕާޓީންއަކުން ނެރޭ 3 ލައިންވިޕަކީ ގާނޫނުއަސާސީއާއި ގާނޫނުތަކާ ޕާޓީތަކުގެ ގާނޫނު ދަންނަކަމެއް ނޫން ކަމަށެވެ.

އަދި ރައްޔިތުންގެ ހާދިމުންނޭ ކިޔައި މަޖިލީހަށް ވަދެ ރައްޔިތުންގެ ވިސްނުމާ ދެކޮޅައް މަސައްކަތް ކުރާ އެންމެހާ މެންބަރުންނާ ދެކޮޅަށް ރައްޔިތުން ތެދުވާންޖެހޭ ކަމަށާ، ރައްޔިތުން މަޖިލިގެ އެމްޑީޕީގެ މެންބަރުންނަށް ވުރެ ގައުމު ބޮޑުވާނެ ކަމަށް އޭނާ ވިދާޅުވި އެވެ.

"މީ ރައްޔިތުންގެ ބޮޑު އަގުލަބިއްޔަތަކުން އުފެދިފައޮތް ވެރިކަމެއް. ގާނޫނުއަސާސީ އަށްވުރެން ރައްޔިތުންގެ ބާރުގަދަވާނެ." މުހައްމަދު ޢިސްމާޢީލް ވިދާޅުވި އެވެ.

ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ ސަރުކާރަށް އެންމެ ދެމަސް ވެފައި ވަނިކޮށް، އިއްޔެ ރައްޔިތުންގެ މަޖިލީހުން ވަނީ އިސްލާމީ ކަންތައްތަކާ ބެހޭ ވުޒާރާގެ ވަޒީރު ޑރ މުހައްމަދު ޝަހީމް ޢަލީ ސަޢީދާޢި، ހައުސިންގ މިނިސްޓަރު ޑރ. ހައިދަރުގެ އިތުރުން ބަންޑާރަ ނާއިބު އަހުމަދު އުޝާމް އަށް ރުހުން ނުދޭން ނިންމާފައެވެ.

އަދި ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ އިތުބާރު ނެތް ކަމުގެ މައްސަލައެއް މަޖިލީހަށް ހުށަހަޅަންވެސް މެޖޯރިޓީ ޕާޓީ އެމްޑީޕީން އަންނަނީ ތައްޔާރުވަމުންނެވެ.