ކުރީގެ ދެބަންޑާރަ ނާއިބުން އިސްވެ ތިއްބަވާ ރާއްޖޭގެ ދުސްތޫރީ އޮނިގަނޑުގެ ދިރާސާއެއް ހައްދަވަނީ

ކުރީގެ ދެބަންޑާރަނާއިބުން ކަމުގައިވާ ޢާޒިމާ ޝަކޫރާއި ދިޔާނާ ސަޢީދު އިސްވެ ތިއްބަވައިގެން، ދިވެހިރާއްޖޭގެ ދުސްތޫރީ އޮނިގަނޑާއި އެ އޮނިގަނޑުގެ ދަށުން ދައުލަތްހިންގުމުގެ ދިރާސާއެއް ހައްދަވަންނިންމަވައިފިއެވެ.

“ވޮއިސް”އަށް މަޢުލޫމާތު ދެއްވަމުން، އެބޭފުޅުން ވިދާޅުވީ، މިއީ ޢިލްމީ އަދި ފަންނީ މަސައްކަތެއްކަމުގައެވެ. އަދި އެބޭފުޅުން އެ މަސައްކަތްކުރައްވަން ނިންމެވީ، ޤައުމީ ޚިދުމަތެއްގެ ގޮތުގައި ކަމަށެވެ.

“ޤާނޫނުއަސާސީ ތަޞްދީޤުކުރެވިގެން މިހިނގާ 16 އަހަރުގެ ތެރޭގައި އެކަށީގެންވާ ދިރާސާއެއް ކުރެވިފައިނުވާތީ އާއި، އަދި ރާއްޖޭގެ ދުސްތޫރީ މުސްތަޤްބަލުގެ ރާސްތާ ކަނޑައެޅުމުގައި މިފަދަ ދިރާސާއެއް ކުރެވި، ދިވެހިރާއްޖޭގެ ތަޖުރިބާއާއި، ދުނިޔޭގެ އެހެން ޤައުމުތަކުގެ ތަޖުރިބާވެސް ބަލައިލުލަމީ މުހިންމުކަމެއް ކަމުގައި ދެކޭތީ. އަދި މިފަދަ ކަންކަމުން ތަޖުރިބާ ލިބިގަނެގެން ދުސްތޫރީ މުސްތަޤްބަލު ކަނޑައެޅުމަކީ ޤައުމަށް އެންމެ ފައިދާވާނޭ ގޮތްކަމުގައިވެސް ފެނިގެން.”

މިކަން ކަމުގެ އިތުރުން، އެ ދެ ބޭފުޅުންނަކީވެސް ޤާނޫނުއަސާސީ އެކުލަވާލުމުގެ މަސައްކަތުގައި ބައިވެރިވި، އަދި ޤާނޫނުއަސާސީ ތަންފީޛުކުރުމުގައި މަސައްކަތްކުރުމުގެ ފުރުޞަތު ލިބުނު ބައެއް ކަމަށް ވާއިރު، އެ ތަޖުރިބާ ހުރި ބައެއްގެ ހައިސިއްޔަތުން، އެފަދަ މަސައްކަތެއްކޮށް، ލިޔެ، ރިކޯޑުކޮށް، މިހާރުގެ ދިވެހި މުޖްތަމަޢަށާއި، ކިޔަވާކުދިންނަށާއި އަދި މުސްތަޤްބަލަށް ފޯރުކޮށްދިނުމަކީ ކޮންމެހެން ކުރަންޖެހިފައިވާ ކަމެއްކަމުގައި ދެކޭތީ ކުރާ ދިރާސާއެއް ކަމަށް ވެސް ވިދާޅުވިއެވެ.

އެ ދެބޭފުޅުން ވިދާޅުވި ގޮތުގައި، މިމަސައްކަތުގައި ޤާނޫނުއަސާސީގައި ބަޔާންކުރާ ހަމަތަކާއި ދައުލަތް ހިންގުމުގައްޔާއި  ޤާނޫނުއަސާސީއަށް ޢަމަލުކުރުމުގައި ކަންކަންހިނގާފައިވާގޮތް ދިރާސާކޮށް މުސްތަޤްބަލްއޮންނަންވާނޭ ގޮތްކަމަށް އެބޭފުޅުން ދެކޭގޮތުގެ ތަޞައްވުރަށް ވާޞިލުވުމުގައި ޤާނޫނީ ނިޒާމަށް ގެންނަންޖެހޭ ބަދަލުތަކަށް އަލިއަޅުވާ ލައްވާނެއެވެ.

އަޅުގަނޑުމެންގެ މިމަސައްކަތަކީ، ދުސްތޫރީ ޢިލްމަށް ޚާއްޞަ ރާއްޖެއިން ބޭރުގެ 5 ތަޖުރިބާކާރުންނާއެކު، އަޅުގަނޑުމެން ކުރިޔަށް ގެންދާ މަސައްކަތެއް. މިމަސައްކަތުގެ، ދިވެހިރާއްޖޭގެ ޢިލްމީ މަންސަ (ޕްލެޓްފޯމް) އަކީ މޯލްޑިވްސް ސެންޓަރ ފޮރ ޕޮލިސީ ސްޓަޑީޒް (PolicyMv).  އަދި މިމަސައްކަތް ކުރިއަށް ގެންދިޔުމުގައި  އެކިދާއިރާތަކުގެ ތަޖުރިބާކާރުންނާއި އަދި ޢާންމު ފަރާތްތަކާއެކު ފުޅާ ދާއިރާއެއްގައި މަޝްވަރާއާއި ޚިޔާލު ހޯދުމަށް ރޭވިފައިވޭ.

މިދިރާސާގެ މަޢުލޫމާތު ހާމަކުރުމަށް އަންނަ ހަފްތާގެ ތެރޭގައި ޖަލްސާއެއް ބޭއްވުމަށް އެ ދެބޭފުޅުން ވަނީ ނިންމަވާފައެވެ: