ކާޑެއްދޫ އެއާޕޯޓު ސަރުކާރަށް ބަދަލުކުރުމުގެ މަސައްކަތްދަނީ ކުރަމުން: ވަޒީރު

ކާޑެއްދޫ އެއާޕޯޓު ސަރުކާރުގެ ބެލުމުގެ ދަށަށް ބަދަލުކުރުމުގެ މަސައްކަތްތައް ކުރަމުންދާކަމަށް ދަތުރުފަތުރާއި މަދަނީ އުދުހުންތަކާއި ބެހޭ ވަޒީރު މުހައްމަދު އަމީން ވިދާޅުވެއްޖެއެވެ.

މިއަދުގެ މަޖިލީހުގައި ތިނަދޫ އުތުރު ދާއިރާގެ މެންބަރު ސައުދުﷲ ޙިލްމީ، ކާޑެއްދޫ އެއާޕޯޓުގެ މަސައްކަތްތަކާއި ގުޅޭ ގޮތުން ކުރެއްވި ސުވާލުތަކަށް ޖަވާބު ދެއްވަމުން ވަޒީރު ވިދާޅުވީ ކާޑެއްދޫ އެއާޕޯޓަކީ އެ އެއާޕޯޓު ހަވާލުކޮށްފައިއޮތް ކުންފުންޏާއި އެކު ގިނަ މައްސަލަތަކެއް ދިމާވި ކުންފުންޏެއް ކަމަށެވެ.

އަދި އެ އެއާޕޯޓަކީ ސުޕްރީމް ކޯޓުގެ ޙުކުމެއްގެ ދަށުން އެކުންފުންޏާއި ހަވާލުކޮށްފައިވާ އެއާޕޯޓަކަށްވާއިރު، އެ އެއާޕޯޓު ސަރުކާރަށް ބަދަލުކުރުމަށް ކުރަންޖެހޭ މަސައްކަތްތައް މިހާރު ކުރަމުންދާ ކަމަށެވެ.

ކާޑެއްދޫ އެއާޕޯޓު ހިންގަނީ ވިޔަފާރިވެރިޔާ އަދި މާމިގިލީ ދާއިރާގެ މެންބަރު ޤާސިމް އިބްރާހިމްގެ ވިލާ ކުންފުނިންނެވެ.

2013 ވަނަ އަހަރު، 50 އަހަރަށް އެ އެއާޕޯޓު ވިލާ އާއި ހަވާލުކުރި އެއްބަސްވުމުގެ ދަށުން ކާޑެއްދޫ އެއާޕޯޓާއި ވިލާއިން ހަވާލުވާ ފުރަތަމަ އަހަރުގެ ތެރޭގައި އެތެރޭގެ އުދުހުންތަކުގެ ޚިދުމަތްތައް ސީއޭއޭގެ ސާޓިފައިޑް ސްޓެންޑާޑްތަކަށް އަޕްގްެރޭޑްކުރަން ޖެހޭއިރު، ހަތް އަހަރުގެ ތެރޭގައި ސީއޭއޭގެ ސާޓިފައިޑް ފެންވަރުގެ ބައިނަލްއަގުވާމީ އެއާޕޯޓެއްގެ ޚިދުމަތްތައް ޤާއިމްކޮށް، ބައިނަލްއަގުވާމީ އެއާޕޯޓުގެ އެ ޚިދުމަތްތައް ފަށަން ޖެހެއެވެ.

އެހެން ނަމަވެސް ވިލާއިން ކާޑެއްދޫ އާއި ހަވާލުވިތާ މިއަހަރަށް 12 އަހަރުވިއިރު، އެ އެއާޕޯޓުގެ ޙާލަތު ވަނީ ވަރަށް ދަށްވެފައެވެ. އެކަމާއި ގުޅިގެން ގިނަ ބަޔަކު ކަންބޮޑުވުން ފާޅުކުރަމުންދެއެވެ.

އެ ކަންބޮޑުވުންތައް ފާޅުކުރަމުންދަނިކޮށް، ގާތްގަޑަކަށް 18.5 މިލިއަން ޑޮލަރު ނުވަތަ 277 މިލިއަން ރުފިޔާ ދީފައި ވިލާގެ އަތުން ކާޑެއްދޫ އެއާޕޯޓު ނަގަން ސަރުކާރުން ނިންމައިފައިވާކަން، އެ އެއާޕޯޓު ހިންގާ ވިލާ ކުންފުނީގެ ޗެއާމަން ޤާސިމް ވަނީ މި އަހަރުގެ އޮގަސްޓު މަހުގެ ތެރޭގައި އިއުލާނުކުރައްވާފައެވެ.