އައު މީޑިއާ ކޮމިޝަނަށް ވަގުތީ މެންބަރުން އައްޔަނުކޮށްފި

މިދިޔަ ބުރާސްފަތި ދުވަހު ރައީސް ޑރ. މުޙައްމަދު މުޢިއްޒު ތަސްދީގުކުރެއްވި މޯލްޑިވްސް މީޑިއާ އެންޑް ބްރޯޑްކާސްޓިން ރެގިއުލޭޝަންގެ ޤާނޫނުގެ އުފެދުނު މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަނަށް ވަގުތީ މެންބަރުން އައްޔަނުކުރައްވައިފިއެވެ.

އެ ޤާނޫނު ބުނާ ގޮތުން ކޮމިޝަން އެކުލަވައިލައި ދާއިމީ މެންބަރުން އެ ކޮމިޝަނުގެ ހިންގުމާ ޙަވާލުވަންދެން، ކޮމިޝަނުގެ ކަންކަން ވަގުތީގޮތުން ހިންގާނީ ސިވިލް ސާވިސް ކޮމިޝަނުން އެކުލަވައިލާ ފަސް މެންބަރުންގެ ވަގުތީ ކޮމިޓީއަކުންކަން ފާހަގަކުރެވެއެވެ. އެގޮތުން އެ ކޮމިޝަނަށް އައްޔަނުކުރައްވާފައިވާ މެންބަރުންނަކީ:

1. އަލީ ޒަކީ، ޑިރެކްޓަ ޖެނެރަލް/ ސްޕޯޓްސް މިނިސްޓްރީ

2. އަހުމަދު މައުސޫމް، ޑިރެކްޓަ ޖެނެރަލް/ ސިޓީސް މިނިސްޓްރީ

3. އާމިނަތު ނަސީރު، ޑިރެކްޓަ ޖެނެރަލް/ އިސްލާމިކް މިނިސްޓްރީ

4. އާމިނަތު ޝާހިދާ، ޑިރެކްޓަ ޖެނެރަލް/ އިކޮނޮމިކް މިނިސްޓްރީ

5. އިމާދު މުހައްމަދު، ޗީފް ކޯޕަރޭޓް އެގްޒެކެޓިވް (ގައުމީ އަރުޝީފު، ޔޫތު މިނިސްޓްރީ)

އެ ފަސް މެމްބަރުން ވާން ޖެހެނީ ސިވިލް ސާވިސް ހިމެނޭ ދާއިރާތަކުގެ އޮފީސްތަކުގައި މަސައްކަތް ކުރައްވާ ޑިރެކްޓަ ޖެނެރަލުން ފެށިގެން މަތީ މަގާމުތަކުގެ ބޭފުޅުންނަށެވެ. އަދި އެ ކޮމިޝަނުގެ ރައީސާއި ނައިބު ރައީސް ކަނޑައަޅާނީ، އެ ފަސް މެންބަރުންގެ ތެރޭގައި ނަގާ ސިއްރު ވޯޓަކުންނެވެ.

ވަގުތީ ކޮމިޝަން އެކުލަވައިލި ނަމަވެސް، އެ ޤާނޫނު ބުނާ ގޮތުން ވަގުތީ މެންބަރުން އައްޔަނުކުރާތާ 30 ދުވަހުގެ ތެރޭގައި ދާއިމީ ކޮމިޝަން އެކުލަވައިލަން ޖެހެއެވެ. އެގޮތުން ދާއިމީ ކޮމިޝަނުގައި މުޅި ޖުމްލަ ހަތް މެންބަރުން ތިއްބަވާނެއެވެ.

އެ މެންބަރުންގެ ތެރެއިން ތިން މެންބަރުންނަކީ މަޖިލީހުން އައްޔުކުރާ މެންބަރުންނަށްވާއިރު، ބާކީ ހަތަރު މެމްބަރުން އިންތިހާބު ކުރަނީ މީޑިއާތަކުގެ މެދުގައި ނަގާ ސިއްރު ވޯޓަކުންނެވެ. އެހެން ނަމަވެސް ކޮމިޝަނުގެ ހުރިހާ މެންބަރުންނަކީ ވެސް ރައްޔިތުންގެ މަޖިލީހުން ވަކިކުރެވޭ މެންބަރުންނެވެ. އަދި އެ ކޮމިޝަނުގެ ރައީސް އައްޔަނުކުރައްވާނީ ވެސް ރައްޔިތުންގެ މަޖިލީހުންކަން ފާހަގަކުރެވެއެވެ.