ރަސްމާލެ އެއްބަސްވުމާ ގުޅޭ 34 ސުވާލަކަށް ޖަވާބު ހޯދަން ޕީއެންއެފުން ރައީސަށް ސިޓީ ފޮނުވައިފި
ލިޔުންތެރިޔާ
އަޙްމަދު އާހިލް ސަޢީދު
އީގަލް ހިލްސް ކުންފުންޏަށް ރަސްމާލެއިން 500 ހެކްޓަރުގެ ބިން ދިން މުޢާމަލާތާ ގުޅޭ ގޮތުން ސަރުކާރުން ހާމަނުކޮށް ހުރި ކަންކަން ސާފުކޮށްދިނުމަށް އެދި ޕީޕަލްސް ނެޝަނަލް ފްރަންޓް (ޕީއެންއެފް) އިން ރައީސް ޑރ. މުޙައްމަދު މުޢިއްޒަށް ސިޓީއެއް ފޮނުވައިފިއެވެ.
އެ ޕާޓީން ފާހަގަކުރި ގޮތުގައި މި ޑީލާ ބެހޭ ގޮތުން ސާފުނުވާ ގިނަ ކަންތައްތަކެއް އެބައޮތެވެ. ދިވެހި ރައްޔިތުންގެ މަޞްލަޙަތާއި ދައުލަތުގެ މިނިވަންކަމާއި އިސްތިޤުލާލަށް ނުރައްކާ ވެދާނެ ކަމުގެ ކަންބޮޑުވުން ވެސް އެ ސިޓީގައި ބުންޏެވެ. ޖުމްލަ 34 ނުކުތާއަކަށް ޖަވާބު ދެއްވުމަށް ސިޓީގައި ރައީސްގެ އަރިހުން އެދިފައިވެއެވެ.
ޕީއެންއެފުން ސާފުކުރަން ހުށަހެޅި ކަންކަމުގެ ތެރޭގައި އީގަލް ހިލްސަށް ދޫކުރާ ބިމުގެ އަގާއި ބިން ކުއްޔަށް ދިނުމުގެ ކުރިން ޤާނޫނު އަސާސީ އާއި އެހެން ޤާނޫނުތަކަށް ގެންނަން ޖެހޭ ބަދަލުތަކެއް ހުރިނަމަ އެ ބަދަލުތައް ބަޔާންކޮށްދިނުމާއި ބިން ހިއްކައި ރިވެޓްމެންޓު ޖެހުމަށް ސަރުކާރުން ހޭދަކުރި ޢަދަދު ހިމެނެއެވެ. ހަމައެހެންމެ، 99 އަހަރަށް ބިން ދޫކުރުމުގެ ޝަރުތުތައް މާނަކުރާ ގޮތާއި މަޝްރޫޢު ޙަވާލުކުރި އުސޫލާއި އީގަލް ހިލްސަށް ލިބޭ ބިމުން ތިން ވަނަ ފަރާތަކަށް މިލްކުކޮށްދެވޭނެތޯ ވެސް އެ ސިޓީގައި ސުވާލު އުފައްދާފައިވެއެވެ.
ރަސްމާލެއިން 500 ހެކްޓަރުގެ ބިން އީގަލް ހިލްސަށް ދިނުމުގެ އެއްބަސްވުމުގައި ސޮއިކުރީ މިދިޔަ ހަފުތާގެ ހޯމަ ދުވަހުއެވެ.
މި މުޢާމަލާތާ މެދު ބޮޑެތި ފާޑުކިޔުންތަކެއް ސަރުކާރަށް ރައްދުވަމުން ދިޔަ ނަމަވެސް ސަރުކާރުން ބުނަމުން ގެންދަނީ ރިސޯޓުތައް ދޫކުރާ ޢާންމު އުސޫލުން ދީފައިވާ ތަނެއް ކަމަށާއި މި އިންވެސްޓްމެންޓުގެ ސަބަބުން ރާއްޖެ ކުރިން ނުދެކޭ ފެންވަރުގެ އާމްދަނީ ލިބޭނެ ކަމަށެވެ.
އެ ގޮތުން، މިއަދު ފިނޭންސް މިނިސްޓަރު ހަސަން ޒަރީރު އެކްސް މެދުވެރިކޮށް ކުރެއްވެވި ޕޯސްޓެއްގައި ވަނީ ދިވެހިރާއްޖެއަށް މި މަޝްރޫޢުގެ ސަބަބުން ދައުލަތަށް އަހަރަކު 1.1 ބިލިއަން ޑޮލަރު އާމްދަނީގެ ގޮތުގައި ލިބިގެންދާނެ ކަމަށެވެ.
މީގެ އިތުރުން، ވަޒީރު ހީނާ ވަލީދު ވެސް ވަނީ ދިވެހިރާއްޖޭގެ މިނިވަންކަމާ ސިޔާދަތަށް ބުރޫއަރާ ފަދަ އަދި ދިވެހިރާއްޖޭގެ ޤައުމިއްޔަތުގެ އަސާސްތަކާ ތަޢާރަޒްވާފަދަ އެއްވެސް ކަމެއް ރައީސް ޑރ. މުޙައްމަދު މުޢިއްޒު ނުކުރައްވާނެ ކަމަކީ ޔަގީންކަމެއް ކަމަށް ވިދާޅުވެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
