ރާއްޖެއަށް ތެޔޮ އެތެރެކުރުމުގެ ޚަރަދު ބޮޑު، މިދިޔަ އަހަރު 10 ބިލިޔަން ރުފިޔާ ޚަރަދުކުރި: ޠާރިގު

ދިވެހިރާއްޖެއަކީ ހަކަތަ އުފެއްދުމަށް މުޅިންވެސް ތެލަށް ބަރޯސާވެފައިވާ ގައުމެއް ކަމަށާ، މިދިޔަ އަހަރު އެކަނިވެސް ރާއްޖެއަށް ތެޔޮ އެތެރެކުރުމަށް 10 ބިލިޔަން ރުފިޔާ ޚަރަދުކޮށްފައިވާ ކަމަށް ފަތުރުވެރިކަމާއި ތިމާވެއްޓާ ބެހޭ ވަޒީރު ޠާރިޤު އިބްރާހީމް ވިދާޅުވެއްޖެެއެވެ.

މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ވަޒީރު ވިދާޅުވީ، ދިވެހިރާއްޖެއަކީ ހަކަތަ އުފެއްދުމަށް، ރާއްޖެއަށް އެތެރެކުރާ ތެލަށް ބަރޯސާވެފައިވާ ގައުމެއް ކަމަށެވެ.

މިދިޔަ އަހަރު އެކަނި ބަލާލިކަމުގައިވިޔަސް ތެޔޮ އެތެރެކުރުމަށް ގާތްގަނޑަކަށް 10 ބިލިއަން ރުފިޔާ ޚަރަދުކޮށްފައިވޭ. މިއީ ބޭރު ފައިސާއަށް ބަދަލުކޮށް ބޭރަށް  ފޮނުވޭ ފައިސާ. ތެޔޮ އެތެރެކުރުމަށް ޖީޑީޕީގެ ގާތްގަނޑަކަށް 10 ޕަސެންޓް ޚަރަދުކުރަންޖެހޭ. އެހެންވީމާ މިއީ ވަރަށް ބޮޑަށް ތެލަށް ބަރޯސާވެފައި އޮންނަ ގައުމެއް.

ފަތުރުވެރިކަމާއި ތިމާވެއްޓާ ބެހޭ ވަޒީރު ޠާރިޤު އިބްރާހީމް

މިއާއެކު ވަޒީރު ވިދާޅުވީ، ރާއްޖޭގައި މީހުން ދިރިއުޅޭ ގާތްގަނޑަކަށް ހުރިހާ ރަށަކާއި ރިސޯޓްތަކުގައިވެސް މައިގަނޑުކޮށް ކަރަންޓް އުފައްދަނީ ޖެނެރޭޓަރު ބޭނުންކޮށްގެން ކަމަށެވެ. އެގޮތުން މީހުން ދިރިއުޅޭ ރަށްރަށުގައި 310 މެގަވޯޓުގެ އިންޖީނު ބެހެއްޓި ބޭނުންކުރަމުންދާއިރު، ރިސޯޓުތަކުގައި 298 މެގަވޯޓު އަދި ސިނާއީ ރަށްރަށުގައި 30 މެގަވޯޓުގެ އިންޖީނު ބޭނުންކުރަމުންދާ ކަން ފާހަގަކުރެއްވިއެވެ.

”މީގެ ގާތްގަނޑަކަށް ދެބައިކުޅަ އެއްބަޔަކީ މާލެ ސަރަހައްދުގައު އިންސްޓޯލް ކުރެވިފައިހުރި ޖެނެރޭޓަރުތައް.“ ވަޒީރު ވިދާޅުވިއެވެ.

އެހެންކަމުން، ރާއްޖެއިން ބޭރުން އެތެރެކުރާ ތެލަށް ބަރޯސާވާ މިންވަރު ކުޑަކޮށް ރާއްޖޭގެ ހަކަތައިގެ ދާއިރާ ކުރިއެރުވުމަށް ގިނަ މަސައްކަތްތަކެއް ކުރަންޖެހޭ ކަމަށާ، އެކަން ސަރުކާރުން ކުރަމުންދާ ކަމަށް ވަޒީރު ވިދާޅުވިއެވެ.

އެގޮތުން ސަރުކާރުން ބޭނުންވަނީ ރާއްޖޭގެ ކަރަންޓުގެ 33 އިންސައްތައާ ހަމައަށް އިއާދަކުރަނަވި ހަކަތައިން އުފައްދާ ކަރަންޓަށް ހެދުމަށް ކަންވެސް ފާހަގަކުރެއްވިއެވެ.

"ރައީސް ޑރ. މުޙައްމަދު މުޢިއްޒު ޒައާމަތުގައި ހަކަތައިގެ ސިޔާސަތުގެ އިސްތިރާޖިއްޔާތައް ކަނޑައަޅައި އަޅުގަނޑުމެން މިވަނީ އާއްމުކޮށްފައި. އޭގެ އިތުރަށް ހަކަތައިގެ މަގުޗާޓުުވަނީ އިއުލާނުކުރެވިފައި. މިދެންނެވި ދެ ޑޮކިއުމެންޓަށް ބަލައިގެން ހަކަތައިގެ ދާއިރާގެ މަސައްކަތް މިކުރަނީ." ޠާރިގު ވިދާޅުވިއެވެ.