މައުމޫންގެ ޕްރެޒިޑެންޝަލް ލައިބްރަރީ އެންޑް އާކައިވް މަޝްރޫޢު އިފްތިތާހުކުރަނީ

މައުމޫންގެ ޕްރެޒިޑެންޝަލް ލައިބްރަރީ އެންޑް އާކައިވް މަޝްރޫޢު އިފްތިތާހު ކުރަން ނިންމާފައިވާ ކަމަށް ކުރީގެ ރައީސް މައުމޫން އަބްދުލްގައްޔޫމް ވިދާޅުވެެއްޖެ އެވެ.

އެމަނިކުފާނު މިހެން ވިދާޅުވީ މައުމޫން ފައުންޑޭޝަންގެ 2025 ވަނަ އަހަރުގެ އަހަރީ އާންމު ޖަލްސާ ގައި ވާހަކަފުޅު ދައްކަވަމުންނެވެ. ޖަލްސާގެ ރިޔާސަތު ބަލަހައްޓަވާ ވާހަކަފުޅު ދައްކަވަމުން ރައީސް މައުމޫން ވަނީ ކުރިއަށް އޮތް އަހަރަށް ރޭވިފައިވާ މުހިންމު މަޝްރޫޢުތަކުގެ ތަފްސީލް ހިއްސާ ކުރައްވާފަ އެވެ.

އެގޮތުން މައުމޫންގެ ޕްރެޒިޑެންޝަލް ލައިބްރަރީ އެންޑް އާކައިވް މަޝްރޫޢު ފާހަގަ ކުރެއްވި އެވެ. މިއީ ގައުމީ ފެންވަރުގެ ބޮޑު މަސައްކަތެއްގެ ގޮތުގައި އެމަނިކުފާނު ސިފަކުރެއްވި އެވެ. މި މަޝްރޫއުގެ މަގްސަދުތަކާއި، ދުރު ރާސްތާގެ ތަސައްވުރު ހިމެނޭ ފުރިހަމަ ޕްރޮޕޯޒަލެއް މިހާރު ތައްޔާރު ކުރެވިފައިވާ ކަމުގެ މައުލޫމާތު މެންބަރުންނަށް ދެއްވިއެވެ. މި މަޝްރޫއުގެ މަގްސަދަކީ ރައީސް މައުމޫންގެ ހަޔާތްޕުޅާއި ގައުމީ ޚިދުމަތާއި ގުޅުންހުރި ތަގުރީރުތަކާއި، ލިޔެކިޔުންތަކާއި، ފޮޓޯތަކާއި، ފޮތްތަކާއި، ވީޑިއޯތަކާއި އަދި ތާރީޚީ ރެކޯޑުތައް އެއްކޮށް، ރައްކާތެރިކޮށް، ޑިޖިޓަލައިޒްކޮށް ތަރުތީބުކުރުމެވެ. އަދި މި ތަކެތި ދިރާސާކުރާ ފަރާތްތަކަށާއި، ދަރިވަރުންނަށާއި، އާންމު ރައްޔިތުންނަށް ފަސޭހައިން ލިބޭނެ އިންތިޒާމު ހަމަޖެއްސުމެވެ. މި އާކައިވް ގާއިމުކުރެވުމުން، މިއީ ދިވެހި ތާރީޚުގެ މުހިންމު ބާބެއް އަންނަން އޮތް ޖީލުތަކަށް ފޯރުކޮށްދޭ ގައުމީ ވަސީލަތަކަށް ވެގެންދާނެ ކަމުގައި މައުމޫން ވިދާޅުވި އެވެ.

މީގެ އިތުރުން، ރާއްޖެއާއި، ރާއްޖެއިން ބޭރުގެ ފަންނީ މާހިރުންނާއި ޖަމްޢިއްޔާތަކުގެ އެހީތެރިކަމާއެކު ތިމާވެށި ހިމާޔަތްކުރުމާއި ދެމެހެއްޓެނިވި ތަރައްގީއަށް އަމާޒުކޮށްގެން ހިންގާ ތިމާވެށީގެ އައު މަޝްރޫއެއް ވެސް އެމަނިކުފާނު އިޢުލާނުކުރެއްވި އެވެ. މީގެއިތުރުން ރާއްޖޭން ބޭރުން ދިވެހި ދަރިވަރުންނަށް ތަޢުލީމީ ފުރުސަތުތައް ފުޅާކުރުމަށްޓަކައި ފޮރިން ސްކޮލާޝިޕް ޕްރޮގްރާމް ހިންގުމަށް ރޭވިފައިވާކަންވެސް މައުމޫން ފާހަގަކުރެއްވި އެވެ.

މި އަހަރަށް އިއުލާނުކުރެވުނު އަނެއް މުހިންމު މަސައްކަތަކީ އިސްލާމީ މަރުކަޒު މަރާމާތުކޮށް އާބާތުރަފިލުވުމުގެ މަޝްރޫއެވެ. 40 އަހަރަށްވުރެ ގިނަ ދުވަސްވެފައިވާ އިސްލާމީ މަރުކަޒު މަރާމާތުކުރުމަށްޓަކައި، އިސްލާމީ ކަންތައްތަކާބެހޭ ވުޒަރާއާއެކު މައުމޫން ފައުންޑޭޝަނުން ފަހުމުނާމާއެއްގައި ސޮއިކޮށްފައިވާކަން ފާހަގަކުރައްވާ މައުމޫން ވިދާޅުވީ މި މަޝްރޫއުގެ ބޭނުމަކީ އެމަނިކުފާނުގެ ވެރިކަމުގައި ބިނާކުރެވުނު، ރާއްޖޭގެ އެންމެ މުހިންމު ބިނާ ކަމުގައިވާ އިސްލާމީ މަރުކަޒު ދިގު މުއްދަތަކަށް ބޭނުންކުރެވޭނެ ރަނގަޅު ފެންވަރެއްގައި ރައްކާތެރިކަމާ އެކު ބެލެހެއްޓޭނެގޮތް ކަށަވަރު ކުރުމަށް ރާއްޖެ އާއި، ރާއްޖެއިން ބޭރުން ފަންޑު ހޯދައިގެން މަސައްކަތް ކުރުން ކަމަށެވެ. މި ފަހުމުނާމާގެ ދަށުން ދީނީ، ތަޢުލީމީ އަދި އިޖުތިމާއީ ހަރަކާތްތަކުގައި ފުޅާ ދާއިރާއެއްގައި އެއްބާރުލުން ދިނުމަށްވެސް ވަނީ ހަމަޖެހިފަ އެވެ.