ބޯފެނާ ގުޅޭގޮތުން ފަތުރާ ހަގީގަތާ ޚިލާފު މަޢުލޫމާތަށް ސަމާލުވުމަށް އެމްއެފްޑީއޭއިން އިލްތިމާސްކޮށްފި
ލިޔުންތެރިޔާ
އަޙްމަދު އާހިލް ސަޢީދު
ބޯފެނުގައި "ޑައިހައިޑްރޮޖަން މޮނޮކްސައިޑް" ހިމެނޭތީ އެއީ ނުރައްކާތެރި ކަމެއްގެ ގޮތުގައި ސިފަކޮށް، އާންމުންގެ މެދުގައި ބިރުވެރިކަން އުފެދޭ ގޮތަށް ފަތުރަމުންދާ މަޢުލޫމާތުތަކާމެދު ސަމާލުވުމަށް މޯލްޑިވްސް ފުޑް އެންޑް ޑްރަގް އޮތޯރިޓީން ސަމާލުވުމަށް އިލްތިމާސްކޮށްފިއެވެ.
މިކަމާ ގުޅޭގޮތުން އެމްއެފްޑީއޭއިން ބުނީ ސައިންޓިފިކް ނަޒަރަކުން ބަލާއިރު، "ޑައިހައިޑްރޮޖަން މޮނޮކްސައިޑް" އަކީ އާންމުކޮށް ބޯން ބޭނުންކުރާ ފެނަށް (H₂O) ކިޔާ ކެމިކަލް ނަން ކަމަށެވެ. ނަމަވެސް އެއޮތޯރިޓީން ވަނީ މި ނަން ބޭނުންކޮށްގެން ބައެއް ފަރާތްތަކުން ދަނީ ފުޅީގައި ބަންދުކޮށްފައި ހުންނަ ފެން، ސިއްހަތަށް ނުރައްކާތެރި އެއްޗެއްގެ ގޮތުގައި ދޭހަވާ ފަދަ މޭރުމަކުން ދޮގު މަޢުލޫމާތު ފަތުރަމުންކަން ފާހަގަކޮށްފައެވެ.
އެމްއެފްޑީއޭއިން ބުނީ އާންމު ސިއްހަތަކީ ސަމާސާ ކުރަންވާ ފަދަ ކަމެއް ނޫންކަމަށެވެ. މަޖަލަކަށް ނަމަވެސް ހަގީގަތެއް ނެތް ޚަބަރުތަކާއި އަޑުތައް ފެތުރުމަކީ އޭގެ ސަބަބުން އާންމުންގެ މެދުގައި ބޭކާރު ބިރުވެރިކަން އުފެދި، ސިއްހީ ގޮތުން ނުތަނަވަސްކަން ކުރިމަތިވެދާނެ ކަމެކެވެ.
އެހެންކަމުން، ސިއްހީ ކަންކަމާ ގުޅޭގޮތުން މަޢުލޫމާތު ހޯދުމުގައި އިތުބާރު ހުރި މަސްދަރުތަކަށް ބަރޯސާވުމަށާއި، ކަށަވަރު ނުކޮށް މިފަދަ ވާހަކަތައް މީސްމީޑިއާ ފަދަ ވަސީލަތްތަކުގައި ފެތުރުމުން ދުރުހެލިވުމަށް އެމްއެފްޑީއޭއިން ވަނީ ނަސޭހަތްތެރިވެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
