ޑައިހައިޑްރޮޖެން މޮނޮކްސައިޑަކީ ފެނުގެ ކެމިކަލް ނަން: ދޮގު މައުލޫމާތު ނުފެތުރުމަށް އެމްއެފްޑީއޭއިން އިލްތިމާސްކޮށްފި

ރާއްޖޭގައި ބަންދުކޮށްގެން ވިއްކާ ބޯފެނުގައި ނުރައްކާތެރި ކެމިކަލެއް ހުރި ކަމަށް ބުނެ މީސްމީޑިއާގައި ދައުރުވަމުންދާ ވާހަކަތަކަކީ ހަގީގަތާ ޚިލާފު ވާހަކަތަކެއް ކަމަށާއި، "ޑައިހައިޑްރޮޖެން މޮނޮކްސައިޑް" އަކީ އާދައިގެ ފެނުގެ ކެމިކަލް ނަން ކަމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ހާމަކޮށްފިއެވެ.

އެމްއެފްޑީއޭއިން މިކަން ސާފުކޮށްދީ މީސްމީޑިއާގައި ޕޯސްޓެއް ކުރީ، އާންމުންގެ ހިތްތަކުގައި ބިރުވެރިކަން އުފެދޭ ގޮތަށް ސޯޝަލް މީޑިއާ ޕޭޖަކުން ފެތުރި ދޮގު ވާހަކައަކާ ގުޅިގެންނެވެ.

އެ ޕޭޖުން ކޮށްފައިވާ ޕޯސްޓެއްގައި ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) ގެ ރިޕޯޓަކާ ހަވާލާދޭ ކަމަށް ބުނެ، ބުނެފައިވަނީ، ރާއްޖޭގެ ގިނަ ވޯޓާ ޕްލާންޓްތަކާއި، ތާޒާ އަދި ބޮނަކުއާ ފަދަ އާންމުކޮށް ވިއްކާ ފުޅީގެ ފެނުގައި ”ނުރައްކާތެރި މާއްދާއެއް“ ކަމަށްވާ "ޑައިހައިޑްރޮޖެން މޮނޮކްސައިޑް" ހިމެނޭ ކަމަށެވެ. އަދި މި މާއްދާގެ ސަބަބުން ވިހަވުމުގެ އަލާމާތްތަކެއް ފެންނަ ކަމަށްވެސް އެ ޕޯސްޓުގައި ލިޔެފައިވެއެވެ.

ނަމަވެސް، ސައިންޓިފިކް ގޮތުން ބަލާއިރު ފެނުގެ ކެމިކަލް ފޯމިއުލާއަކީ H2O އެވެ. ފެނުގެ ކޮންމެ މޮލިކިއުލެއްގައި ހައިޑްރޮޖެންގެ ދެ އެޓަމް އަދި އޮކްސިޖަންގެ އެއް އެޓަމް އެކުލެވިގެންވާތީ، ސައިންސްގެ ހަމަތަކުން އެއަށް ކިޔާ ކެމިކަލް ނަމަކީ "ޑައިހައިޑްރޮޖެން މޮނޮކްސައިޑް"އެވެ. މީގައި "ޑައި" އަކީ ދޭކެވެ. އަދި "މޮނޯ" އަކީ އެކެކެވެ. އެހެންކަމުން މިއީ އާދައިގެ ފެނަށް ބޭނުންކުރާ ސައިންޓިފިކް ނަމެކެވެ.

އެމްއެފްޑީއޭއިން ބުނީ، ބަންދުކޮށްފައި ހުންނަ ފެނުގައި މި މާއްދާ ހިމެނޭ ކަމަށް ބުނެ އާންމުންގެ ހިތްތަކުގައި ބިރުވެރިކަން އުފެދޭ ގޮތަށް ވާހަކަ ދެއްކުމަކީ ވަރަށް ބޮޑު އޮޅުވައިލުމެއް ކަމަށެވެ.

އަދި އާންމު ސިއްހަތަކީ މަޖަލަކަށް ހަދަންޖެހޭ ކަމެއް ނޫން ކަމަށާއި، މަޖަލަކަށް ހަދައިގެން ވިޔަސް މިފަދަ އަސާސެއް ނެތް ވާހަކަތައް އުފައްދައި ނުފެތުރުމަށް އެ އޮތޯރިޓީން ވަނީ އިލްތިމާސްކޮށްފައެވެ.

ސިއްހަތާ ގުޅުންހުރި މައުލޫމާތުތައް ހޯދުމުގައި އިތުބާރު ހުރި ރަސްމީ މަސްދަރުތަކަށް ބަރޯސާވުމަށް ވެސް އެމްއެފްޑީއޭއިން ވަނީ އާންމުންނަށް ނަސޭހަތްތެރިވެފައެވެ.