ނަޝީދުގެ އަރިހުގައި ގާނާގައި އެމްޑީޕީގެ ވަފުދެއް، ރަސްމީ ދަތުރެއް ނޫން

ކުރީގެ ރައީސް މުހައްމަދު ނަޝީދު, ގާނާގައި އެމްޑީޕީގެ ވަފުދަކާއި ބައްދަލު ކުރެއްވި ނަމަވެސް އެއީ ރަސްމީ ދަތުރެއް ނޫން ކަމަށާ އެ ވަފުދުގައި ހިމެނޭ ބައެއް ބޭފުޅުން ވިދާޅުވެއްޖެ އެވެ.

މިވަގުތު އަދާކުރައްވަވާ މަގާމުގެ ހައިސިއްޔަތުން ރައީސް ނަޝީދު ދިރިއުޅުއްވަނީ ގާނާގަ އެވެ. ނަޝީދު ދެއްވެވި ފަރިއްކޮޅެއްގައި އެމްޑީޕީގެ އިސް ބޭފުޅުންތަކެއް ބައިވެރިވެވަޑައިގަންނަވާ ފޮޓޯއެއް ވަނީ އާންމުވެފަ އެވެ. ނަޝީދުގެ އަރިހުގައި ތިއްބެވީ;

* އެމްޑީޕީގެ ޗެއާޕާސަން ފައްޔާޒް އިސްމާއީލް

* އެމްޑީޕީގެ ކުރީގެ ޗެއާޕާސަން ހަސަން ލަތީފް

* އެމްޑީޕީގެ ކުރީގެ ނާއިބު ރައީސް މުހައްމަދު ޝިފާޒް

* އެމްޑީޕީގެ ކުރީގެ މަޖިލީސް މެންބަރު އަލީ އާޒިމް

މި ބޭފުޅުންގެ ތެރެއިން ހަސަން އާއި ޝިފާޒް އަދި އާޒިމް އަކީ ނަޝީދުގެ ވަރަށް އަރިސް ބޭފުޅުންނެވެ. ނަޝީދުގެ އިސްނެންގެވުމަށް އެމްޑީޕީން ވަކިވެވަޑައިގެން ދަ ޑިމޮކްރެޓްސް އުފެއްދެވުމުގައި އިސްކޮށް އުޅުއްވީ މި ބޭފުޅުންނެވެ. ނަމަވެސް ނަޝީދު ހިމެނިވަޑައިގެންނަވާހެން މި ހުރިހާ ބޭފުޅުން މިހާރު ވަނީ އެމްޑީޕީއާ ގުޅިވަޑައިގެންފަ އެވެ.

އެމްޑީޕީގެ ރިޔާސީ ޓިކެޓަށް ބޮޑު ވާދައެއް އޮތް ވަގުތެއްގައި ގާނާގައި މި ބޭފުޅުން ބައްދަލްކުރައްވާފައިވާއިރު ފައްޔާޒްގެ ގާތް ބޭފުޅުން އަދި ރައީސް ނަޝީދުގެ ގާތް ބޭފުޅުންނާއި މި ދަތުރުގައި ބައިވެރިވެވަޑައިގެންނެވި ބައެއް ބޭފުޅުން ވެސް ވަނީ މިއީ ރަސްމީ ދަތުރެއް ނޫން ކަމުގައި ވިދާޅުވެފަ އެވެ. އަދި މިއީ އަމިއްލަ ދަތުރެއް ކަމަށް ވިދާޅުވި އެވެ.

މި ދަތުރުގެ ބޭނުމެއް އަދި ވަކި ޚާއްސަ މަޝްވަރާއެއް ކުރައްވާފައިވާ ކަމަކަށް ވިދާޅެެއް ނުވެ އެވެ.

ދަ ޑިމޮކްރެޓްސް ދޫކޮށްލުމުގެ ކުރީން ވެސް ނަޝީދު އިސްވެ ހުންނަވާ އެ ޕާޓީގެ މެންބަރުން ވަނީ ފައްޔާޒަށް މެންދުރުގެ ފަރިއްކޮޅަކަށް ދައުވަތު ދެއްވާފަ އެވެ.