ޣައްޒާ ބަނޑަށް ޖެއްސުން ހުއްޓުމަކަށް ނުގެންނަނަމަ އިސްރާއިލަށް ދަތިކުރުމުގެ ފިޔަވަޅު އަޅާނެކަމަށް ބުނެފި

އިސްރާއިލުން ޣައްޒާއަށް ދެމުންދާ ހަމަލާތައް ހުއްޓާނުލައިފިނަމަ ދަތިކުރުމުގެ ފިޔަވަޅު އަޅާނެކަމަށް އިނގިރޭސިވިލާތާއި، ފްރާންސް އަދި ކެނެޑާއިން އިންޒާރުދީފިއެވެ.

މި އިންޒާރު ދީފައިވަނީ، އިނގިރޭސިވިލާތާއި، ފްރާންސް އަދި ކެނެޑާގެ ލީޑަރުން، އިސްރާއިލުން ޣައްޒާގައި ހިންގަމުންދާ ނިރުބަވެރި ޢަމަލުތައް ކުށްވެރިކޮށް، ނެރުނު ގުޅިފައިވާ ބަޔާނުގައެވެ.

އިނގިރޭސިވިލާތުގެ ބޮޑުވަޒީރު ކީރ ސްޓާމަރ، ފްރާންސްގެ ރައީސް އެމެނުއެލް މެކްރޯން އަދި ކެނެޑާގެ ބޮޑުވަޒީރު މާރކް ކާނީ ގުޅިގެން ނެރުނު ބަޔާނުގައި ވަނީ އިސްރާއިލުން ޣައްޒާއަށް އެހީ ފޯރުކޮށްދިނުން ހުއްޓުވާލާފައިވާކަން ފާހަގަކޮށް އެކަމާ ހަނު ނުހުންނާނެ ކަމަށް ބުނެފައެވެ.

އަދި، އިސްރާއިލުގެ ވަޒީރުންގެ ތެރެއިން ބައެއް ވަޒީރުން ފަލަސްޠީނުގެ ރައްޔިތުންނަށް ބަޑިން ބިރުދައްކާފައިވާ ކަންވެސް ވަނީ ފާހަގަކޮށްފައެވެ.

"ނެތަންޔާހޫގެ ސަރުކާރުން މި ނުރައްކާތެރި ޢަމަލުތައް ކުރަމުންދާއިރު އަޅުގަނޑުމެން ހަނުހުންނާކަށް ނެތިން. އިސްރާއިލުން އަލުން ފަށާފައިވާ ހަނގުރާމަވެރި ހަމަލާތައް ހުއްޓާނުލައި، އިންސާނީ އެހީއަށް އަޅާފައިވާ ހުރަސްތައް ނުނަގައިފިނަމަ، އަޅުގަނޑުމެން އިތުރު ފިޔަވަޅުތަކެއް އަޅާނަން،" މި ތިން ލީޑަރުން ބުނެފައިވެއެވެ.

ނަމަވެސް އަޅާނެ ދަތިކުރުމުގެ ފިޔަވަޅަކީ ކޮބައިކަން ހާމަކޮށްފައެއް ނުވެއެވެ.

މީގެ އިތުރުން، އިނގިރޭސިވިލާތާއި، ފްރާންސް އަދި ކެނެޑާ ހިމެނޭގޮތަށް 22 ޤައުމަކުން ވަނީ ޣައްޒާއަށް އެހީ ފޯރުކޮށްދިނުން އަވަހަށް ފަށަން އިސްރާއިލަށް ގޮވާލާފައެވެ. މި ޤައުމުތަކުން ބުނެފައިވަނީ ޣައްޒާގެ އާބާދީ ބަނޑަށްޖެހުމުގެ ނުރައްކަލާ ކުރިމަތިލާންޖެހިފައިވާ ކަމަށެވެ.

އެހެންނަމަވެސް، އިސްރާއިލުގެ ބޮޑުވަޒީރު ބެންޖަމިން ނެތަންޔާހޫ ވަނީ މި ތިން ލީޑަރުންގެ ބަޔާނަކީ ހަމާސްއަށް ލިބުނު "ބޮޑު ކާމިޔާބެއް" ކަމަށް ބުނެފައެވެ.

އިސްރާއިލުން ވަނީ މާރޗް 2 އިން ފެށިގެން ޣައްޒާއަށް އެހީ ފޯރުކޮށްދިނުން މުޅިން ހުއްޓުވާލާފައެވެ. ނަމަވެސް، އިއްޔެ އިސްރާއިލުން ވަނީ މަދު އަދަދެއްގެ އެހީގެ ޓްރަކުތައް ޣައްޒާއަށް ވެއްދުމަށް ހުއްދަދޭނެ ކަމަށް އިޢުލާނުކޮށްފައެވެ.