އިސްރާއީލުން އީރާނަށް ދޭ ބަދަލު ހަމަލާތަކުގައި އެމެރިކާއިން ބައިވެރިނުވާނެ ކަމަށް ބުނެފި

އީރާނުން ހައްދުފަހަނައަޅާފައިވާ އިސްރާއީލަށް ދިން ޑްރޯނާއި މިސައިލް ހަމަލާތަކުގެ ބަދަލުހިފަން އިސްރާއީލުން ދޭ ހަމަލާތަކުގައި އެމެރިކާއިން ބައިވެރިނުވާނެ ކަމަށް ބުނެފިއެވެ.

އެމެރިކާގެ ސަރުކާރުގެ އިސް އޮފިޝަލަކު ވިދާޅުވީ، މި މޭރުމުން އެމެރިކާގެ ރައީސް ޖޯ ބައިޑެން ވާހަކަފުޅު ދައްކަވާފައިވަނީ، އިރާނުން އިސްރާއީލަށް ބަދަލުހިފުމުގެ ގޮތުން ހަމަލާތައް ދޭނެ ކަމަށް ބުނުމާއި ގުޅިގެން އިސްރާއީލުގެ އަނިޔާވެރި ބޮޑުވަޒީރު، ބެންޖަމިން ނަތަންޔާހޫ އާއި ފޯނުން ގުޅުއްވައިގެން ދެއްކެވި ވާހަކަފުޅުގައެވެ.

އެގޮތުން އީރާނާ ދެކޮޅަށް ދޭ އެއްވެސް ހަމަލާއެއްގައި އެމެރިކާއިން ބައިވެރިނުވާނެ ކަމަށް ވަރަށް ސާފުކޮށް ބައިޑެން ނަތަންޔާހޫ އަށް ދެންނެވި ކަމަށާއި، މި ވާހަކަތައް ނަތަންޔާހޫ ގަބޫލުކޮށްފައިވާކަމަށް ވެސް އޮފިޝަލް މައުލޫމާތުދެއެވެ.

އެމެރިކާގެ ވައިޓް ހައުސް އިން ބުނީ، އިސްރާއީލަށް އީރާނުން ދިން ހަމަލާއަށް އިސްރާއީލުން ބަދަލު ހިފައިފިނަމަ މި މައްސަލަ ވަރަށް ބޮޑު ކޯޅުން ތަކަކަށް ބަދަލުވެ، އޭގެ ނަތީޖާ ވެސް ގޯސްވާނެތީ އެކަމާއި ގުޅިގެން ބައިޑަން އާއި އޭނާގެ ސީނިއާ އެޑްވައިޒަރުން ވަރަށް ބޮޑަށް ކަންބޮޑުވާކަމަށެވެ.

އެމެރިކާއިން މިފަދައިން ބުނި ނަމަވެސް، އެމެރިކާގެ ސެކްރެޓަރީ އޮފް ސްޓޭޓް އެންޓޯނީ ބްލިންކެން ނެރުއްވި ބަޔާނެއްގައި ވިދާޅުވީ،  މިފަދައިން އެމެރިކާއިން ނިންމި ނަމަވެސް އެމެރިކާއިން އިސްރާއީލަށް ކުރާ ތާއީދު އަދިވެސް އެގޮތުގައި ދެމިއޮތް ކަމަށެވެ.

އިރާނަށް ވަރުގަދަ ހަމަލާތަކެއް ދޭނެ ކަމުގެ އިންޒާރު އިސްރާއީލުން ދީފައިވާއިރު އީރާނުން ވަނީ އިސްރާއީލުން ބަދަލު ހިފައިފިނަމަ ހަމަލާތައް ވަރުގަދަ ކުރާނެ ކަމަށް ބުނެފައެވެ.

މިދިޔަ ހަފްތާގައި ސީރިއާގައި ހުންނަ އީރާނުގެ އެމްބަސީ ކޮމްޕްލެކްސްއަކަށް އިސްރާއީލުން ދިން ހަމަލާގެ ބަދަލު ހިފާނެ ކަމަށް ބުނެ ދެމުން ދިޔަ އިންޒާރުތަކަށް ފަހު، އީރާނުން އިސްރާއީލަށް އަމާޒުކޮށް ޑްރޯން އާއި މިސައިލް ހަމަލާތަކެއް ފޮނުވާލައިފައިވަނީ ރޭގެ ވަގުތެއްގައެވެ.

މިސައިލާއި ޑްރޯން ހިމެނޭ ގޮތަށް 200 އަށް ވުރެ ގިނަ ހަމަލާ އީރާނުން އިސްރާއީލަށް ފޮނުވާލިއިރު، އިސްރާއިލުގެ އަޔަން ޑޯމް އާއި ފައިޓަރ ޖެޓް ބޭނުންކޮށްގެން ބައެއް ހަމަލާތައް މަތަ ކުރި ނަމަވެސް އިސްރާއީލުގެ ބައެއް އަވަށްތަކަށް ޑްރޯންތަކުގެ ހަމަލާތައް ވަނީ އަމާޒުވެފައެވެ.