ބޭސްފަރުވާގެ ހަރަދަށް މެއިމަހު އެންސްޕާއިން ކުރި ހޭދަ 14.2 މިލިއަން ރުފިޔާގައި

ބޭސްފަރުވާގެ ހަރަދަށް އެކަނިވެސް ހުސްވި މެއިމަހު އެންސްޕާއިން 14 މިލިއަނަށްވުރެ ގިނަ ރުފިޔާ ހޭދަކޮށްފިއެވެ.

ނޭޝަނަލް ސޯޝަލް ޕްރޮޓެކްޝަން އެޖެންސީ އެންސްޕާއިން މިއަދު އާއްމުކޮށްފައިވާ ތަފާސްހިސާބަށް ބަލާއިރު، މެއިމަހު ބޭސްފަރުވާގެ ކަންކަމަށް އެކި ފަރާތްތަކަށް ވަނީ، 14.2 މިލިއަން ރުފިޔާ ހޭދަކޮށްފައެވެ. މީގެ ތެރޭގައި ރާއްޖެއިން ބޭރަށްގޮސް ފަރުވާކުރި މީހުނަށް ވަނީ 3.9 މިލިއަން ރުފިޔާ ހޭދަކޮށްފައެވެ. މިއީ ބޭރުފައިސާއިން ބަލާނަމަ، 253،539.16 ޑޮލަރެވެ. މެއިމަހު ރާއްޖެއިން ބޭސްފަރުވާގެ ކަންކަމަށް ކުރި ހޭދަ އުޅެނީ 10.3 މިލިއަން ރުފިޔާގައެވެ.

އެންސްޕާގެ ތަފާސްހިސާބުތަކަށް ބަލާއިރު މެއިމަހު ބޭސްފަރުވާގެ ކަންކަމުގައި އެންމެބޮޑު ހޭދައެއްކޮށްފައިވަނީ ޓްރީޓޮޕް ހޮސްޕިޓަލް މެދުވެރިކޮށް އެޑްމިޓްކޮށްގެން ހިދުމަތް ހޯދި ފަރާތްތަކަށެވެ. އެގޮތުން ޓްރީޓޮޕް ހޮސްޕިޓަލުން ހިދުމަތް ހޯދި 334 މީހަކަށް ވަނީ 4.1 މިލިއަން ރުފިޔާ ހޭދަކޮށްފައެވެ. އޭޑީކޭއިން ހިދުމަތް ހޯދި 190 މީހަކަށް ވަނީ 3.2 މިލިއަން ރުފިޔާ ހޭދަކޮށްފައެވެ.

ތަފާސްހިސާބަށް ބަލާއިރު، ޓްރީޓޮޕް ހޮސްޕިޓަލުން އެންމެގިނައިން ފަރުވާ ހޯދާފައިވަނީ ކަށީގެ ބަލިތަކަށެވެ. ކަށީގެ ބަލިތަކަށް 53 މީހަކު ފަރުވާ ހޯދިއިރު ދެން އެންމެގިނައިން އެންމެގިނައިން ފަރުވާ ހޯދާފައިވަނީ ވިހެއުމާ ގުޅޭ ކަންކަމަށެވެ.

އޭޑީކޭއަށް ބަލާއިރު މެއިމަހު އެ ހޮސްޕިޓަލުން ހޯދި ހިދުމަތްތަކުގެ ތެރެއިން އެންމެބޮޑު ހޭދައެއްކޮށްފައިވަނީ، ކާޑިއޯވެސްކިއުލަރ އަށެވެ. އޭގެ އިތުރުން ދެން އެންމެގިނައިން ހޭދަކޮށްފައިވަނީ މައިބަދަ އަދި ކަށީގެ ބަލިތަކަށް ފަރުވާހޯދި މީހުންނަށެވެ.

ފިނޭންސުން ނެރެފައިވާ ދައުލަތުގެ ހަރަދުތަކަށް ބަލާއިރު، ޖޫންމަހުގެ 19 ވަނަ ދުވަހާ ހަމަޔަށް އެންސްޕާއިން ކުރި ހޭދަ އުޅެނީ 1.45 ބިލިއަން ރުފިޔާގައެވެ. އެންސްޕާގެ ވެލްފެއާ ބަޖެޓްގެ ގޮތުގައި މިއަހަރަށް ފާސްކޮށްފައިވަނީ 3.9 ބިލިއަން ރުފިޔާއެވެ.