ދެ ހަފްތާއަށް ހަނގުރާމަ މެދުކަނޑާލަން އެމެރިކާއާ އީރާނުން އެއްބަސްވެއްޖެ
ލިޔުންތެރިޔާ
ޚަދީޖާ އަރުފާ
ކުރިއަށް އޮތް ދެ ހަފްތާގެ މުއްދަތަށް އީރާނާ އެމެރިކާއާދެމެދު ކުރަމުންދާ ހަނގުރާމަ މެދުކަނޑާލުމަށް ނިންމައިފިއެވެ.
އެމެރިކާގެ ރައީސް ޑޮނަލްޑް ޓްރަމްޕް މިކަން އިޢުލާނު ކުރީ ޕާކިސްތާނުގެ ލީޑަރޝިޕާ އެކު ކުރެވުނު މަޝްވަރާތަކަށް ފަހުގައެވެ. ޓްރަމްޕް ބުނި ގޮތުގައި މި ނިންމުމަކީ ޕާކިސްތާނުގެ ބޮޑުވަޒީރު ޝެހްބާޒް ޝަރީފާއި އެޤައުމުގެ އާމީ ޗީފް ފީލްޑް މާޝަލް އާސިމް މުނީރާ އެކު ކުރެވުނު މުހިންމު މަޝްވަރާތަކެއްގެ ނަތީޖާއެވެ.
"އީރާނުން ހޯރްމޫޒް ކަނޑުއޮޅި ފުރިހަމައަށް، ވަގުތުން އަދި ރައްކާތެރިކަމާ އެކު ހުޅުވާލުމަށް އެއްބަސްވުމާ ގުޅިގެން، އީރާނަށް ބޮން އެޅުމާއި ހަމަލާދިނުން ދެ ހަފުތާގެ މުއްދަތަށް ހުއްޓާލުމަށް އެއްބަސްވެވިއްޖެ،" ޓްރަމްޕްގެ ސޯޝަލް މީޑިއާ ޕްލެޓްފޯމް 'ޓްރުތް ސޯޝަލް' ގައި ކުރި ޕޯސްޓެއްގައި ބުނެފައިވެއެވެ.
ނަމަވެސް، މި އެއްބަސްވުން ދެމިއޮންނާނީ ވަކި ޝަރުތަކެއްގެ މައްޗަށް ކަމަށް ޓްރަމްޕް ފާހަގަކުރިއެވެ. އެގޮތުން އީރާނުން "ހޮރްމޫޒް" ކަނޑުއޮޅި ވަގުތުން، ރައްކާތެރިކަމާއެކު ހުޅުވާލަން ޖެހޭނެ ކަމަށާ، މިއީ ދެ ފަރާތުންވެސް ހަމަލާތައް ހުއްޓާލާ "ޑަބަލް ސައިޑަޑް ސީޒްފަޔަރ" އެއް ކަމަށް ޓްރަމްޕް ބުންޏެވެ.
ޓްރަމްޕް މިހެން ބުނެފައިވާއިރު، އީރާނުގެ ފޮރިން މިނިސްޓަރު އައްބާސް އަރާގްޗީވެސް ވަނީ، ދުނިޔޭގެ ތެލުގެ ފަސްބައިކުޅަ އެއްބައި އުފުލާ މި މަގުން ދެ ހަފުތާގެ މުއްދަތަށް އުޅަނދުފަހަރަށް ރައްކާތެރިކަމާ އެކު ދަތުރުކުރެވޭނެކަން ކަށަވަރުކޮށްދެއްވައިފަ އެވެ.
މި ހަނގުރާމައިގެ ސަބަބުން ދުނިޔޭގެ ބާޒާރުގައި ތެލުގެ އަގު ވަރަށް ބޮޑަށް އުފުލިފައިވީ ނަމަވެސް، މި ޚަބަރާއެކު ތެލުގެ އަގު ވަނީ ވަގުތުން ދަށްވާން ފަށައިފަ އެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
