ހިމަބިހި ހަލުވިކަމާއެކު ފެތުރެނީ؛ ނިމުނު ހަފްތާ އެކަނިވެސް 44 ކޭސް

ނިމިދިޔަ ހަފްތާގައިވެސް މާލެ ސަރަހައްދުން ހިމަބިހި (މީސްލްސް)ގެ 44 ކޭސް ފެނިފައިވާ ކަމަށް އެޗްޕީއޭއިން ހާމަކޮށްފިއެވެ.

އެޗްޕީއޭއިން މިއަދު ބުނީ، މިއަހަރު މިހާތަނަށް ޖުމުލަ 66 މީހަކަށް ހިމަބިހި ޖެހިގެން ރިޕޯޓްކޮށްފައިވާ ކަމަށެވެ.

އެހެންކަމުން އެޗްޕީއޭއިން ވަނީ ހިމަބިހި ފެތުރުން ހުއްޓުވުމަށްޓަކައި ރައްކާތެރިކަމުގެ ފިޔަވަޅުތައް އަޅާން އެދިފައެވެ. އެގޮތުން ބުނީ،

1) ބައްޔަށް ޝައްކުވެގެން ޓެސްޓް ހަދައިފިނަމަ، ޓެސްޓުގެ ނަތީޖާ ލިބެންދެން އެކަހެރިވެގެން ހުރުން.

2)  ހުން އައިސް ގައިގައި ރަތް ބިހި ނެގުން ނުވަތަ ރޯގާގެ އަލާމާތްތައް ފެންނަނަމަ، މީހުން އެއްވެ އުޅޭ ތަންތަނަށް ނުދިއުން.

3) ހުން އައުމާއެކު ގައިގައި ރަތް ބިހިތަކެއް ނަގައިފިނަމަ، ލަސްނުކޮށް ޑޮކްޓަރަށް ދެއްކުން.

4) މިފަދަ އަލާމާތްތައް ފެނިގެން ހޮސްޕިޓަލަށް އަންނައިރު، އެހެން މީހުންނަށް ބަލި ފެތުރުނަ ނުދިނުމަށްޓަކައި މާސްކު އެޅުން.

ހޮނިހިރުދުވަހު އެޗްޕީއޭއިން އާއްމުކުރި ތަފާސްހިސާބުގައި ވާގޮތުން، ހިމަބިއްސަށް ޕޮޒިޓިވްވި މީހުންގެ ތެރެއިން ގިނައީ 18 އަހަރުން މަތީގެ މީހުންނެވެ. އަދިޖުމްލަ 543 ކޮންޓެކްޓުން ފާހަގަކުރެވިފައިވާއިރު އެކްޓިވް 173 ކޮންޓެކްޓުން މޮނިޓާ ކުރެވެމުންދާ ކަމަށް އެ އެޖެންސީން ބުނެފައިވެއެވެ.

ހިމަބިހީގެ ކޭސްއެއް ފެނިއްޖެނަމަ، އާއްމުކޮށް އަމަލުކުރާ އުސޫލުގެ މަތިން ބަލި ޖެހުނު ގޮތް ދެނެގަތުމަށް ކޭސް އިންވެސްޓިގޭޝަން ހެދުމާއި، ބަލިޖެހުނު މީހާއާ ދިމާވި މީހުން ދެނެގަތުމަށް ކޮންޓެކްޓް ޓްރޭސިން ހެދުމުގެ މަސައްކަތް އެޗްޕީއޭއިން ކުރަމުންދާ ކަމަށް އެ އެޖެންސީން ބުނެއެވެ.

އެހެންކަމުން، ބަލި ފެތުރުން ކޮންޓްރޯލުކުރުމަށް ޚާއްޞަ ވެކްސިން ދިނުމުގެ ޕްރޮގްރާމެއް އެޗްޕީއޭއިން މިހާރު ވަނީ ފަށާފައެވެ.