މަޖިލީހުގެ އިދިކޮޅު ލީޑަރަކީ ސަލީމް: ނަޝީދު

ރައްޔިތުންގެ މަޖިލީހުގެ އިދިކޮޅު ލީޑަރަކީ އޭދަފުށީ ދާއިރާގެ މެންބަރު އަހުމަދު ސަލީމު (ރެޑްވޭވް ސަލީމް) ކަން، ރައްޔިތުންގެ މަޖިލީހުގެ ރައީސް މުހައްމަދު ނަޝީދު އިއުލާން ކުރައްވައިފިއެވެ.

މިއަހަރަށް ރައްޔިތުންގެ މަޖިލިސް ހުޅުވި ޖަލްސާގައި ރައީސުލްޖުމްހޫރިއްޔާ ރިޔާސީ ބަޔާން އިއްވެވުމާއި ގުޅިގެން ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވީ ރިޔާސީ ބަޔާނަށް ރައްދެއް ދޭންޖެހޭނީ އިދިކޮޅު ލީޑަރު ކަމަށާއި ނަމަވެސް މަޖިލީހުގައި އިދިކޮޅު ލީޑަރަކީ ކޮބައިކަން ސާފު ނުވާކަމަށެވެ. އަދި އިދިކޮޅު ލީޑަރަކީ ކޮބައިކަން އެނގެންޖެހޭ ކަމަށް ވިދާޅުވިއެވެ.

ނަޝީދުގެ އެވާހަކަފުޅަށް ރައްދު ދެއްވައި، މަޑުއްވަރީ ދާއިރާގެ މެންބަރު ވިދާޅުވެފައިވަނީ، މަޖިލީހުގައި އިދިކޮޅު ލީޑަރަކީ އަހުމަދު ސަލީމުކަން މަޖިލީހުގެ ރައީސް ނަޝީދަށް އެނގިވަޑައިނުގަތުމަކީ އެއީ އިދިކޮޅުގެ މައްސަލައެއް ނޫން ކަމަށެވެ.

ސަލީމް މައިނޯރިޓީ ލީޑަރުގެ ގޮތުގައި ހަމަޖެހިގެން ދިޔައީ، ފަރެސްމާތޮޑާ ދާއިރާގެ މެމްބަރު ހުސައިން މުހައްމަދު ލަތީފް ޕީޕީއެމްއާ ގުޅިވަޑައިގެން، އެކަމުގެ ހުރިހާ ލިޔުންތައް މަޖިލީހަށް ހުށަހެޅުމުން، މަޖިލީހުގައި ޕީޕީއެމް ތަމްސީލުކުރައްވާ މެމްބަރުންގެ އަދަދު ހަޔަކަށް އެރުމާ ގުޅިގެންނެވެ.

މީގެ ކުރިން ޕީޕީއެމް އަދި ޖުމްހޫރީ ޕާޓީންވެސް ކޮންޓްރޯލުކުރަމުން އައީ ކޮންމެ ޕާޓީއަކުންވެސް ފަސް ގޮނޑިއެވެ. އަދި އިދިކޮޅު ޕީއެންސީއިން ތިން ގޮނޑި ކޮންޓްރޯލުކުރި އިރު، މޯލްޑިވްސް ޑިވެލޮޕްމަންޓް އެލަޔަންސުން ކޮންޓްރޯލުކުރީ ދެ ގޮނޑިއެވެ.

މަޖިލީހުގެ ގަވައިދު ބުނާ ގޮތުން މަޖިލީހުގެ އިދިކޮޅު ލީޑަރަކީ މަޖިލީހުގައި އެންމެ ގިނަ ގޮނޑި ތަމްސީލުކުރާ ޕާޓީ ފިޔަވާ ދެން އެންމެ ގިނަ ގޮނޑި ތަމްސީލުކުރާ ޕާޓީގެ ޕާލަމެންޓްރީ ގްރޫޕުގެ ލީޑަރެވެ.

މަޖިލީހުގެ އިދިކޮޅު ލީޑަރަކަށް ސަލީމު ހަމަޖެހިގެން ދިއުމާއި ގުޅިގެން އާދަމް ޝަރީފު މިއަދު ކުރެއްވި ޓުވީޓެއްގައި ވަނީ ސަލީމަށް މަރުހަބާ ދަންނަވާފައެވެ. ޝަރީފުގެ ޓުވީޓުގައި ވިދާޅުވީ އިދިކޮޅު ލީޑަރަކަށް ސަލީމު ހަމަޖެހިގެން ދިއުމަކީ ސަރުކާރު ޖަވާބުދާރީ ކުރުވުމަށް ކުރަމުންދާ މަސައްކަތްތައް އިތުރަށް ވަރުގަވެސް ޝަރީފު ވިދާޅުވިއެވެ.