އާސެނަލުން ހަތް މިނެޓް ތެރޭ ލިލް ކޮޅަށް ތިން ލަނޑު ޖަހައި ފެންވަރު ދައްކާލައިފި

ޔުއެފާ ޗެމްޕިއަންސްލީގްގައި ރޭ އާސެނަލް އާއި ފްރާންސްގެ ލިލް ބައްދަލުކުރިމެޗް އާސެނަލުން ކާމިޔާބުކޮށްފިއެވެ.

އާސެނަލްގެ އެމިރޭޓްސް ސްޓޭޑިއަމްގައި ކުޅުނު މިމެޗް ލިލްގެ މައްޗަށް އެޓީމް ކުރި ހޯދީ 3-0 ގެ ނަތީޖާއިންނެވެ. މެޗްގައި އާސެނަލުން ތިންލަނޑުވެސް ޖަހާފައިވަނީ ގާތްގާތުގައި އުފެއްދި ހަމަލާތަކާއެކު ހަތް މިނެޓް ތެރޭގައެވެ. މެޗް ފެށިގެން އާސެނަލަށް ލިލްގެ ޑިފެންސްލައިން ފޫ އަޅުވާލަން އުނދަގޫވި ނަމަވެސް، 60 މިނެޓް ތެރޭގައި އާސެނަލުން ވަނީ އެޓީމްގެ ފުރަތަމަ ލަނޑު ޖަހާފައެވެ. މި ގޯލް ކާމިޔާބުކޮށްދިނީ، މަޑުއޭކޭ ތަނަވަސްކޮށްދިން ފުރުސަތެއްގައި ޖޫރިއަން ޓިމްބާ އެވެ.

އާސެނަލްގެ ދެވަނަ ލަނޑު ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން ނިކުތް ބުކާޔޯ ސަކާގެ ދިން ބޯޅައަކުން އެބެރެޗީ އެޒޭއެވެ. އަދި އޭގެ ކުޑައިރުކޮޅެއް ފަހުން، މާޓިން އޮޑެގާޑް އަދި ކައި ހާވާޓްޒްއާ ގުޅިގެން އުފެއްދި ހަމަލާއަކުން އާސެނަލްގެ ތިންވަނަ ލަނޑު ކާމިޔާބުކޮށްދިނީ ސަކާއެވެ.

މި މެޗަށް އާސެނަލުން ނިކުތީ ބަދަލުތަކާއެކުގައެވެ. އެގޮތުން ރޫނޯ ގިމަރޭޒް އާއި އެޒޭއަށް ފުރަތަމަ އެގާރައިން ވަނީ ފުރުސަތު ދީފައެވެ. މެޗްގައި ލިލްއަށް މާބޮޑުކަމެއް ނުކުރެވުނެވެ. މެޗްގައި ލީލްގެ ބަދަލު ކުޅުންތެރިއެއްގެ ގޮތުގައި ކުޅެން އެރި އާސެނަލްގެ ކުރީގެ ފޯވާޑް އޮލިވިއޭ ޖިރޫއަށް އާސެނަލްގެ ސަޕޯޓަރުން ވަނީ ހޫނު މަރުހަބާއެއް ކިޔާފައެވެ. ލިލް އަތުން ލިބުނު މޮޅާއެކު އާސެނަލުން ވަނީ ޗެމްޕިއަންސްލީގްގައި ފޭސްގައި ބަލިނުވެ 14 މެޗް ހަމަކޮށްފައެވެ.