ގާާސިމްގެ ގާާތިލް އަދުހަމްގެ މައްސަލަ ކޯޓަށް ފޮނުވައިފި

ހުޅުމާލޭގައި ވަރަށް އަނިޔާވެރިކޮށް މަރާލެވުނު ޓެކްސީ ޑްރައިވަރެއްކަމުގައިވާ ގާސިމް ހަސަން މަރާލިކަމަށް އިއުތިރާފުވި އަދުހަމް މުހައްމަދުގެ މައްޗަށް ދައުވާ އުފުލުމަށް ކްރިމިނަލް ކޯޓަށް ފޮނުވައިފިއެވެ.

ޕްރޮސެކިއުޓަރ ޖެނެރަލްގެ އޮފީހުން އަދުހަމްގެ މައްޗަށް އުފުލާފައިވާ ދައުވާތަކަކީ  ބިރު ދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާ ކުރުމުގެ ގާނޫނުގެ ދަށުން، ތޫނު އެއްޗެއް ބޭނުން ކޮށްގެން ގަސްދުގައި މީހަކު މެރުމުގެ ދައުވާއެވެ. މި މައްސަލައިގައި ދައުވާކުރުމަށް ފޮނުވާފައިވަނީ އިއްޔެއެވެ.

ފުލުހުން ބުނީ، ގާސިމް މަރާލި ކަމަށް އިއުތިރާފުވެފައިވާ ޅ. ހިންނަވަރު، ބޮޑުހިޔާގެ، އުމުރުން 21 އަހަރުގެ އަދުހަމް މުހައްމަދު ޓެކްސީއަށް އެރީ އެއާޕޯޓުން ޓެކްސީ ކިޔޫއިން ކަމަށެވެ. ޓެކްސީއަށް އެރުމުގެ ކުރިން އޭނާ ބަލާފައިވަނީ އުމުރުން ދުވަސްވީ މީހުންނަށް ކަމަށް ފުލުހުން ބުންޏެވެ.

ޓެކްސީއަށް އރުމަށްފަހު ހުޅުމާލެ ހާފްވެއާ ހައުސްއަށް ގެންގޮސް ދިނުމަށް އެދުމުން، އެތަނަށް ގެންގޮސް ދިނުމުން އެވަގުތު އޭނާއަތުގައި އެތަނުގެ ކާޑު ނެތް ކަމަށާއި ކާޑު ބަލައި އެހެން ތަނަކަށް ދިއުމަށް އަދުހަމް އެދުނު ކަމަށް ފުލުހުން ބުންޏެވެ.

އެގޮތުން ހުޅުމާލޭގެ އެކި ސަރަހައްދުތަކުގައި ދުއްވުމަށްފަހު، 20:54 ހާއިރު، އަނބުރާ ހާފުވެއާ ހައުސް އަށް ގެންގޮސް ދިނުމަށް އަދުހަމް އެދުނު ކަމަށް ފުލުހުން ބުންޏެވެ.

ފުލުހުން ބުނީ ހާފުވެއާ ހައުސް އަށް ދިއުމަށް ނިންމީ އެސަރަހައްދަކީ އަނދިރި ހިސާބަކަށް ވުމުން ކަމަށް ބެލެވޭ ކަމަށެވެ.

އެގޮތުން ހާފުވެއާ ހައުސް އަށް ދެވަނަ ފަހަރަށް ގޮސް ގޯޅި އަޅާން އުމުނު ވަގުތު އަދުހަމްގެ ޖީބުގައި އޮތް ވަޅި، ކަނާތުން ނެގުމަށްފަހު، ވައަތުން ގާސިމުގެ ކަރާއި ދިމާކޮށް، ބިރުދެއްކި ކަމަށާއި އެވަގުތު ގާސިމް ޓެކްސީގެ ދޮރުހުޅުވައި، ހަޅޭއްލަވަމުން ދާތީ އެ އަޑު ކަނޑުވައިލުމަށް ގާސިމުގެ ކަރަށް ހަރާލީ ކަމަށް އަދުހަމް އިއުތިރާފުވެފައިވާކަމަށެވެ. ވަޅީ ހަރާފައިވަނީ އެއް ފަހަރު ކަމަށް ފުލުހުން ބުންޏެވެ.

އެވަގުތު ގާސިމު ސަލާމަތްވުމަށް ކުރި މަސައްކަތުގައި ދެއަތުން ވަޅީގައި ހިފުމުގެ ސަބަބުން ދެ އަތް ޒަހަމްވެފައި ހުރި ކަމަށް ފުލުހުން ބުންޏެވެ.

ފުލުހުން ބުނި ގޮތުގައި އަދުހަމް އެވަގުތު އެސަރަހައްދުގެ ވަލުތެރެއަށް ވަދެ، ލައިގެން ހުރި ގަމީސް ބަދަލު ކުރުމަށްފަހު މާލެ ދިޔަކަމަށާއި ގަމީހަކީ މީހަކު ދިން ގަމީހެއް ކަމަށެވެ. އަދި ވަޅި ހޯދީ މަސްކަނޑަން ކަމަށްބުނެ ގެޔަކުން ކަމަށާއި އެކަމުގައި އެއްވެސް މީހެއްގެ ބައިވެރިވުމެއް އޮތްކަމަށް ތަހުގީގަށް އެނގިފައި ނުވާކަމަށް ފުލުހުން ބުނެއެވެ.

ފުލުހުން ބުނީ ގާސިމްގެ ގާތިލް އަދުހަމް މުހައްމަދުގެ މަގްސަދަކީ ފޭރުން ކަމަށް އޭނާ ބުނާ ކަމަށާ ވަޅިން ހަމަލާދިނީ ފޭރެން ކުރި މަސައްކަތް ނާކާމިޔާބުވުމުން ކަމަށެވެ. އަދި ވަޅިއެއް ހިފައިގެން ނިކުމެ ފޭރެން މަސައްކަތް ކުރީ މަސްތުވުމަށާއި އެހެނިހެން ބޭނުން ތަކަށް ފައިސާ ހޯދުމަށް ކަމަށް އަދްހަމް ބުނެފައިވާ ކަމަށެވެ.