އުމުރުގެ ދުވަސްތަކަށް ނިމުމެއް އަންނާނެ އިރެއް ނޭނގޭ؛ ވެހޭތާ ފެންނަގާ!: ޚުތުބާ

އިންސާނާގެ ޢުމުރުގެ ދުވަސްތަކަށް ނިމުމެއް އަންނާނެ ކަމަށާ އެހެން ނަމަވެސް އެއީ ކޮންއިރަކު، ކޮންތާކު، ކިހިނެއް ކަމެއް އެކަކަށްވެސް ނޭނގޭ ކަން މިއަދުގެ ހުކުރު ޚުތުބާގައި ހަނދާންކޮށްދީފައެވެ.

ޝަޢުބާން މަހުގައި ހެޔޮ ޢަމަލު ކުރުމުގެ މައްޗަށް އަލިއަޅުވާލައި މިއަދު އިއްވި ހުތުބާގައި ބުނީ، މި މަހަކީ ހުރިހާ ގޮތަކުން ޚާއްސަ މަހެއް ކަމަށެވެ.

"މި މަހަކީ އެތައް ގޮތަކުން ޚާއްސަ މަހެކެވެ. ރަމަޟާން މަހަށް މަރްޙަބާ ކިޔުމަށް ތައްޔާރުވަމުން އަންނަ މައްސަރަކަށް ވުމުންނެވެ. ޝަޢުބާން މަހުގެ ހަނދު ފެނުމާއެކު، ރޯދައިގެ މާތްކަމާއި، ރޭއަޅުކަމާއި ހެޔޮ ޢަމަލުތައް ކޮންމެ މުސްލިމެއްގެ ހިތަށް ވަންނާތީއެވެ. ޝައުބާންމަހު، އަޅުކަމުގައި ހީވާގިވުމަކީ، ރަމަޟާމަހު އަޅުކަމުގައި މަޝްޣޫލުވުމަށް ލިބޭ ތަމްރީނެއް ކަމުގައި ވާތީއެވެ." ޚުތުބާގައި ބުނެފައިވެއެވެ.

މިއާއެކު ޚުތުބާގައި ބުނީ ސިއްޙީ ގޮތުންނާއި ޢުމުރުގެ ގޮތުން، އެކި މީހުންގެ ޙާލަތު ތަފާތު ކަމަށާ، އެހެންކަމުން އެމީހަކަށް ކުޅަދާނަވީ މިންވަރަކުން ހެޔޮ ޢަމަލު ކުރުމަށް ޚުތުބާގައި ނަސޭހަތްތެރިވެފައިވެއެވެ.

"މާތް ނަބިއްޔާ ގެ އިރުޝާދުފުޅުތަކަށް ބަލާއިރު، މާތްالله ގެ ޙަޟްރަތުގައި ހެޔޮ ޢަމަލުތަކުގެ ތެރެއިން އެންމެ ހެޔޮކަންބޮޑީ ދެމިހުންނަނިވި ގޮތުގައި ކުރެވޭ ހެޔޮ ޢަމަލެވެ." ޚުތުބާގައި ބުނެފައިވެއެވެ.

މީގެ އިތުރުން ޚުތުބާގައި ވަނީ ކޮންމެ މީހެއްގެ ހަޔާތަށްވެސް ނިމުމެއް އަންނާނެކަމަށާ، އެހެންނަމަވެސް އެ ނިމުން އަންނާނީ ކޮންއިރަކު، ކިހިނެއް، ކޮންތާކު ހުއްޓާކަން އެއްވެސް މީހަކަށް ނޭނގޭ ކަން ހަނދާންކޮށްދީފައެވެ.

އެހެންކަމުން، ވެހޭތާ ފެންނަގައި ދުނިޔޭގައި ލިބިފައިވާ މި ފުރުސަތުގެ ބޭނުން ހެޔޮގޮތުގައި ހިފައި ހެޔޮ ޢަމަލު ކުރުމުގައި އަވަދިނެތި އުޅެވޭތޯ މަސައްކަތް ކުރުމަށް ވަނީ ނަސޭހަތްތެރިވެފައެވެ.

އެހެނީ ގިނަ ގިނައިން ހެޔޮ ޢަމަލު ކުރުމަކީ ގަސްތަކާއި ނުލައި އަހަރެމެންނަށް ކުރެވޭ ފާފަތަކުން ސަލާމަތް ކުރައްވާނޭ ކަމެއް ކަމަށްވެސް ޚުތުބާގައި ބުނެފައިވެއެވެ. އެހެންކަމުން މިފަދަ ބަރަކާތްތެރި މޫސުމެއްގައި ރަސޫލާ ޞޢވ ނަމޫނާ ދައްކަވާފައިވާ ފަދައިން ހެޔޮ ޢަމަލު ކުރުމުގައި ދެމި ތިބުމަށް ޚުތުބާގައި ވަނީ ނަސޭހަތްތެރިވެފައެވެ.