ސުކޫލް ތަކަށް، ބަޖެޓް ކުރެވުނު 248 މަޝްރޫޢުގެ ތެރެއިން ނިންމުނީ 48 މަޝްރޫޢު

މިސަރުކާރުގެ ވެރިކަމަށް އައިސް މި ވީ ހަތަރު އަހަރު ތެރޭގައި ސުކޫލް ތަކުގެ ޢުމްރާނީ ތަރައްޤީގެ ޖުމުލަ 248 މަޝްރޫޢުއެއް ބަޖެޓް ކުރެވިފައިވާ ކަމަށާ އޭގެ ތެރެއިން ޖުމުލަ 48 މަޝްރޫޢުއެއް އެއްކޮށް ނިންމާލެވިފައިވާ ކަމަށް އެޑިޔުކޭޝަން މިނިސްޓަރ ޑރ. ޢާއިޝަތު ޢަލީ ވިދާޅުވެއްޖެއެވެ.

މިހާރު ކުރިއަށްދާ ރައްޔިތުންގެ މަޖިލީހުގެ ޖަލްސާގައި، ހޯރަފުށީ ދާއިރާގެ މެންބަރު ސަލީމް ވަނީ ސަރުކާރުން މިހާތަނަށް ނިންމާފައިވާ އަދި ކުރެވެމުންދާ ޕްރޮޖެކްޓް ތަކާއި ގުޅޭ ގޮތުން މިނިސްޓަރާއި ސުވާލު ކުރައްވާފައެވެ.

އެ ސުވާލަށް ޖަވާބު ދެއްވަމުން މިނިސްޓަރު ވިދާޅުވީ، މިިިސަރުކާރުން ވެރިކަމަށް އައުމަށްފަހު، ހިނގި ފުރަތަމަ 100 ދުވަހުގެ ތެރޭގައި، ރާއްޖޭގެ ސުކޫލުތައް އެއްދަންފަޅިއަށް ނުވާއި ބޭނުންވާނެ ކަންކަން ދެނެގަނެވުނު ކަމަށެވެ. އަދި އެ ޕްލޭންއާއި އެއްގޮތަށް ސުކޫލު ތަކުގެ ކަންކަން ބަޖެޓް ކުރެވި، އެ މަސައްކަތްތައް ކުރިއަށްދާ ކަމަށް މިނިސްޓަރު ވިދާޅުވި އެވެ.

އެގޮތުން މި ހަތަރު އަހަރު ތެރޭގައި ޖުމުލަ 248 ޕްރޮޖެކްޓެއް ބަޖެޓް ކުރެވިފައި ވާކަމަށާ އައި އޭގެ ތެރެއިން 48 ޕްރޮޖެކްޓެއްގެ މަސައްކަތް އެއްކޮށް ނިންމާލެވިފައިވާ ކަމަށް ޑރ. ޢާއިޝަތު ޢަލީ ވިދާޅުވިއެވެ.

"މުޅިއެކު 248 ޕްރޮޖެކްޓް ބަޖެޓް ކުރެވިފައި ވަނީ. އޭގެ ތެރޭގައި އެބަ ހިމެނޭ 1780 ކްލާސްރޫމާއި، 95 މަލްޓިޕާޕަސް ހޯލް، އަދި 590 އެހެން ޕްރޮޖެކްޓް ތައް. އޭގެ ތެރޭގައި ސްކޫލް ލެބް އާއި ފާޚާނާއާއި، ލެބޯޓްރީސް، ލައިބްރަރީ އާއި މިކަހަލަ ބައިވަރު އޮފީސް އިމާރާތާއި އިމާރާތްތައް ހިމެނިގެންދޭ. އޭގެ ތެރެއިން މިހާރު މުޅިއެކު ނިމި، 48 ޕްރޮޖެކްޓެއް، އެ އިމާރާތް ތަކުގެ ބޭނުންވެސް މިހާރު ކުރެވެމުންދަނީ. 114 ޕްރޮޖެކްޓެއްގެ މަސައްކަތް ކުރިއަށް ދަނީ. ދެން ކުރިއަށް އޮތް އަހަރާއި އަންނަން އޮތް އަހަރުގެ ތެރޭގައި މި މަސައްކަތް ތައް ނިމިގެންދާނެ. ދެން ބާކީ ހުރި މަސައްކަތް ތައް ކޮންޓްރެކްޓް ކުރުމުގެ މަރުހަލާ ތެރޭގައި ކުރިއަށް ދަނީ." މިިސަރުކާރުން ސުކޫލް ތަކުގައި ކުރިއަށް ގެންދާ ޢުމްރާނީ ތަރައްޤީގެ މަޝްރޫޢުތަކާއި ގުޅޭގޮތުން މައުލޫމާތު ދެއްވަމުން ޑރ. ޢާއިޝަތު ޢަލީ ވިދާޅުވިއެވެ.