މަޖިލީހުގައި އިންނެވީ ކޮންސްޓްރަކްޝަން މިނިސްޓަރެއް ނޫންކަން މެންބަރުންނަ ހަނދުމަކޮށްދީފި

މިއަދު ރައްޔިތުންގެ މަޖިލީހަށް ވަޑައިގެން އިންނެވީ އެޑިއުކޭޝަން މިނިސްޓަރު ކަމަށާ، ކޮންސްޓްރަކްޝަން މިނިސްޓަރެއް ނޫން ކަމަށް، މަޖިލީހުގެ މެންބަރުންނަށް މަޖިލީހުގެ ރައީސް މުހައްމަދު ނަޝީދު ހަނދުމަކޮށްދެއްވައިފިއެވެ.

މިހާރު ކުރިއަށްދާ ރައްޔިތުންގެ މަޖިލީހުގެ ޖަލްސާގައި، އެޑިއުކޭޝަން މިނިސްޓަރު ޑރ. ޢާއިޝަތު ޢަލީ އާއި ސުވާލުކުރެއްވުމަށް މެންބަރުންނަށް ވަނީ ފުރުސަތު އަރުއްވާފައެވެ. އެ ފުރުސަތު ގެ ބޭނުން ހިއްޕަވައި ގިނަ މެންބަރުން ކުރައްވާފައިވަނީ، މެންބަރުންގެ ދާއިރާގެ ރަށްތަކުގެ ސުކޫލުތަކުގައި ކުރިއަށްދާ، އަދި ގެންދިޔުމަށް ހަމަޖެހިފައިވާ އުމްރާނީ ތަރައްގީގެ މަޝްރޫއުތައް ކުރިއަށް ގޮސްފައިވާ ހިސާބާއި ގުޅޭ ސުވާލެވެ.

އެ ސުވާލުގެ ޖަވާބުގައި މިނިސްޓަރުވެސް ވަނީ، އެ ސުކޫލުތަކުގައި އިމާރާތް ކުރަމުންދާ އިމާރާތް ތަކުގެ، ކޮންސްޓްރަކްޝަން މަސައްކަތް ކުރިއަށް ގޮސްފައިވާ ހިސާބުގެ ތަފްސީލް ހިއްސާކުރައްވާފައެވެ.

އެކަމާއި ގުޅިގެން މަޖިލީހުގެ ރިޔާސަތުގައި އިންނަވައި ރައީސް ނަޝީދު ވިދާޅުވީ، މަޖިލީހަށް މިއަދު ހާޒިރު ކުރައްވާފައިވަނީ އެޑިއުކޭޝަން މިނިސްޓަރު ކަމަށާ، އެ މިނިސްޓަރާއި ސުވާލު ކުރައްވަން ޖެހޭނީ އެ ދާއިރާއިން ކަމަށެވެ.

"މެންބަރުންގެ އަރިހުގައި އަޅުގަނޑު ދަންނަވާލަން ޖެހޭ، މިއަދު މަޖިލީހަށް ވަޑައިގެން އިންނެވީ އެޑިއުކޭޝަން މިނިސްޓަރު. ކޮންސްޓްރަކްޝަން މިނިސްޓަރެއް ނޫން. އެ މިނިސްޓްރީ އަކާއި ގުޅުންހުރި ކަންކަމާއި ގުޅޭގޮތުން ސުވާލު ކުރައްވަން ޖެހިވަޑައިގަންނަވާނީވެސް. މަޖިލީހުގެ މެންބަރުން ކަންބޮޑުވެލައްވާ ހަމައެކަނި ކަމަކީ ރަށްރަށުގައި ކިހާ މިންވަރަކަށްތޯ ކޮންކްރީޓް އަޅަމުންދާނީ، ބެއްލެވުން ކަމުގައި ވަނީ ނަމަ، މިއަދު ތިޔަބޭފުޅުން ސުވާލުކުރައްވަން ގެންނަވާފައި ތި އިންނެވީ އެކަމާއި ގުޅޭ މިނިސްޓަރެއް ނޫން."

މަޖިލީހުގެ ރައީސް މުހައްމަދު ނަޝީދު

މިއާއެކު ނަޝީދު ވަނީ، ދަރިވަރުންގެ އަޚްލާޤާއި އަދި މިނޫންވެސް ތަޢުލީމާއި ގުޅުންހުރި ކަންކަންވެސް އެ މިނިސްޓްރީން ކުރަމުން ގެންދާ ކަނޑ މެންބަރުންނަށް ހަނދުމަކޮށްދެއްވާފައެވެ.

"މި ދިވެހިރާއްޖޭގެ އެއްލައްކައާއި ގާތްކުރާ އަދަދުގެ ދަރިވަރުންނަށް ތަޢުލީމް ދިނުމާއި، ބެލެހެއްޓުމާއި، އަޚްލާގީ ގޮތުން ރަނގަޅު ޖީލެއް އުފެއްދުމުގައި ހިވާގި މަސައްކަތް ކުރައްވާ ވުޒާރާއެއް އަދި މިނިސްޓަރެއް މިނިސްޓަރަކީ. އަޅުގަނޑު އިއްޒަތްތެރި މެންބަރުންނަށް މިކަން ފާހަގަކޮށްދިނުމުގެ ބޭނުން އޮތް ކަމަށް ދެކެން."

މަޖިލީހުގެ ރައީސް މުހައްމަދު ނަޝީދު

ރައީސް ނަޝީދުގެ އެ ވާހަކަފުޅަށްފަހުގައިވެސް ކުރެންދޫ ދާއިރާގެ މެންބަރު އަބްދުލްޣަނީ ކުރެއްވި ސުވާލުގައިވެސް އެ ދާއިރާގެ ސުކޫލެއްގެ އިމާރާތަކާއި ގުޅޭ ސުވާލެއް ކުރައްވާފައެވެ.

"އިއްޒަތްތެރި ވަޒީރު ބޭނުންފުޅު ނަމަ މިސުވާލު ތަކަށް ޖަވާބު ދެއްވަމުން ގެންދަވާ. ޓިނުގެ އަދަދާއި ކޮންކްރީޓް ގެ އަދަދާއި، ކުޑަ ދޮރުފެ އަދަދާއި ދިޔަ ދޮވީގެ އަދަދާއި މި ބާވަތުގެ ވާހަކަތައް." މެންބަރު އަބްދުލްޣަނީގެ ސުވާލާއި ގުޅިގެން ރައީސް ނަޝީދު ވިދާޅުވި އެވެ.