2024ގެ ދިރާސީ އަހަރަށް އަރަބިއްޔާގެ އާ އިމާރާތް ނިމޭނެ: މިނިސްޓަރު
2024 ވަނަ އަހަރުގެ ދިރާސީ އަހަރަށް އަރަބިއްޔާ ސްކޫލުގެ އާ އިމާރާތް ނިމޭނެ ކަމަށް އެޑިއުކޭޗަން މިނިސްޓަރ ޑރ. އައިޝަތު އަލީ ވިދާޅުވެއްޖެއެވެ.
މިނިސްޓަރު މިހެން ވިދާޅުވީ، މިއަދު ރައްޔިތުންގެ މަޖިލީހުގެ ތަޅުމުގައި މަހިބަދޫ ދާއިރާގެ މެމަބަރު އަހުމަދު ޠާރިޤް ކުރެއްވި ސުވާލަށް ޖަވާބު ދެއްވަމުންނެވެ.
ޠާރިޤް ވިދާޅުވީ، އަރަބިއްޔާ ސްކޫލަށް މާލޭގައި އާ އިމާރާތެއް އެޅުމަށް ކޮންޓްރެކްޓަރާ ހަވާލު ކޮށްފައި ވާކަމަށް 2022 ވަނަ އަހަރު އިއުލާނު ކޮށްފައިވާ ކަމަށާއި އެ އިމާރާތް ކޮންޓްރެކްޓް ކޮށްފައި ވަނީ ކޮން އަގެއްގައި، ކޮން މުއްދަތަކަށް ނިންމުމަށްތޯއާއި މިހާރު މަސައްކަތް ނިމިފައި ވަނީ ކިހާވަރަކަށް ތޯ، އަދި ސްކޫލް ބޭނުންކުރަން ފެށޭނެ ދުވަހެއް އެނގިލައްވާތޯއެވެ.
ޖަވާބުގައި މިނިސްޓަރު ވިދާޅުވީ، އަރަބިއްޔާ ސްކޫލުގެ އާ އިމާރާތް އެޅުމަށް ޑިޒައިން އެންޑް ބިޑް އުސޫލުން އަމީން ކޮންސްޓްރަކްޝަން ޕްރައިވެޓް ލިމިޓެޑާ ހަވާލު ކޮށްފައިވާ ކަމަށާއި މި ޕްރޮޖެކްޓް އެވޯޑް ކުރެވުނީ މިދިޔަ އަހަރުގެ ސެޕްޓެމްބަރު މަހުގެ 29 ވަނަ ދުވަހު ކަމަށެވެ.
އަދި ޕްރޮޖެކްޓްގެ އަގަކީ 168 މިލިއަން ރުފިޔާ ކަމަށެވެ.
މިނިސްޓަރ ވިދާޅުވީ އިމާރާތުގެ ކޮންސެޕްޓް ކުރެހުން އެއްކޮށް ނިމިފައިވާ ކަމަށާއި އަދި މިހާރު ކުރިއަށް ދަނީ ޑީޓެއިލްޑް ޑްރޯވިން ނިންމުމުގެ ކަންތައްތައް ކަމަށެވެ.
މި މަހުގެ ނިޔަލަށް އެ މަސައްކަތް ނިމޭނެކަން ފާހަގަ ކުރައްވައި މިނިސްޓަރު ވިދާޅުވީ އެތަނުގެ އަމަލީ މަސައްކަތް މިއަދު ފަށާނެ ކަމަށެވެ.
ޝެޑިއުލްއާ އެއްގޮތަށް މަސައްކަތް ކުރިއަށް ދާ ނަމަ، 2024 ވަނަ އަހަރުގެ ދިރާސީ އާ އަހަރަށް ސްކޫލުގެ މަސައްކަތް ނިމޭނެ ކަމަށް މިނިސްޓަރު ވިދާޅުވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
