ގުޅިން ރައީސް ޞާލިހަށް ހޫނު މަރުޙަބާއެއް!

ގުރައިދޫ ދާއިރާގެ ބައި-އިލެކްޝަނުގައި ވާދަކުރައްވާ އެމްޑީޕީގެ ކެންޑިޑޭޓު އިބްރާހިމް ޝާޒުގެ ކެމްޕޭނަށް ރައީސުލްޖުމްޙޫރިއްޔާ އިބްރާހިމް މުޙައްމަދު ޞާލިހު ކ. ގުޅިއަށް ވަޑައިގަތުމުން އެ ރަށުން އެމަނިކުފާނަށް ހޫނު މަރުހަބާއެއް ދަންނަވައިފި އެވެ.

ރައީސް ޞާލިހު ގުޅިއަށް ވަޑައިގެންފައިވަނީ މިއަދު ހަވީރުގައެވެ. އެމަނިކުފާނު އެ ރަށަށް ވަޑައިގެންނެވިއިރު އެމަނިކުފާނަށް މަރުހަބާ ދެންނެވުމަށް އެމަނިކުފާނުގެ އިސްތިގުބާލުގައި ގިނަ އަދަދެއްގެ އާންމު ރައްޔިތުން ތިބި މަންޒަރު ވަނީ ފެނިގެން ގޮސްފައެވެ.

ރައީސް ޞާލިހުގެ މި ދަތުރުފުޅުގައި އެމަނިކުފާނުގެ އަރިހުގައި އެމްޑީޕީގެ ކެންޑިޑޭޓު ޝާޒުގެ އިތުރުން ސަރުކާރުގެ ބައެއް ވަޒީރުންވެސް ބައިވެރިވެވަޑައިގެންނެވި އެވެ.

ގުޅިން ރައީސް ޞާލިހަށް ހޫނު މަރުހަބާއެއް ކިޔާފައިވާއިރު، މިއަދު އެމަނިކުފާނު ވަނީ އެ ރައްޔިތުންނާއި މުޚާތަބުކުރައްވާ ބައި-އިލެކްޝަނާއި ގުޅިގެން ވާހަކަފުޅު ދައްކަވާފައެވެ.

މި އިންތިޚާބުގައި ސަރުކާރަށް ވާގިވެރިވާނެ އަދި ސަރުކާރާއި ގުޅިގެން މަސައްކަތް ކުރައްވާނެ ކެންޑިޑޭޓަކަށް ވޯޓިދެއްވުމަށް ރައީސް ޞާލިހު ވަނީ އެދިވަޑައިގެންފަ އެވެ.

ދާއިރާގެ ރައްޔިތުންނާއި ގުޅުންހުރި މަސައްކަތްތައް އެންމެ އެކަށީގެންވާ ގޮތެއްގައި ކުރެވޭނީ ސަރުކާރާއި ގުޅޭ ކެންޑިޑޭޓެއް ހޮވައިގެންކަނަށް ރައީސް ޞާލިހު ފާހަގަކުރެއްވިއެވެ.

ގުރައިދޫ ދާއިރާގެ ބައި-އިލެކްޝަން މި މަހުގެ 15 ގައި ބޭއްވުމަށް ހަމަޖެހިފައިވާއިރު މި އިންތިޚާބުގައި އެމްޑީޕީގެ އިތުރުން ޕީޕީއެމް އަދި އެމްއެންޕީން ވާދަކުރުމަށް ވަނީ ނިންމާފައެވެ.

މި އިންތިޚާބަކީ ރިޔާސީ އިންތިޚާބު ބޯމަތިވެފައި ވަނިކޮށް ބާއްވާ އިންތިޚާބެއް ކަމަށް ވެފައި ރާއްޖޭގައި އޮތް އެންމެ ބޮޑު ދެ ސިޔާސީ ޕާޓީން ވާދަކުރާއިރު، މި އިންތިޚާބުގެ ކެމްޕޭނު ވަރަށް ފޯރިއާއެކު ކުރިއަށްދާކަން ފާހަގަކޮށްލެވެއެވެ.

އަދި މިއީ ރިޔާސީ އިންތިޚާބުގެ ކުރިން ސިޔާސީ ޕާޓީތަކަށް އޮތް ޓާއީދު ވަޒަންކޮށްލަން ލިބޭ ފުރުސަތެއްގެ ގޮތުގައި ސިޔާސީ މަޝްރަހު ދިރާސާކުރައްވާ ފަރާތްތައް ގެންދަވަނީ ސިފަ ކުރައްވަމުންނެވެ.