ސޭޝެލްސްގެ ރައީސްގެ ދެކަނބަލުން ރާއްޖެ ވަޑައިގަންނަވާތީ ހުޅުލޭގެ ފަޅާއި މަގުތައް ބަންދުކުރަނީ

ސޭޝެލްސްގެ ރައީސް ވޭވަލް ރަމްކަލަވަން އާއި އެމަނިކުފާނުގެ އަނބިކަނބަލުން ލިންޑާ ރަމްކަލަވަން މި މަހުގެ 11 އިން 14 އަށް ރާއްޖެއަށް ކުރައްވާ ދަތުރުފުޅަށް ވެލާނާ އިންޓަނޭޝަނަލް އެއާރޕޯޓް (ވީއައިއޭ) ހިންގަމުންދާ ހުޅުލޭގެ ފަޅާއި ބައެއް މަގުތައް ބަންދު ކުރާނެކަމަށް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)އިން ބުނެފިއެވެ.

އެގޮތުން ސޭޝެލްސްގެ ރައީސް އާއި އެމަނިކުފާނުގެ އަނބިކަނބަލުން މާދަމާ ރާއްޖެ ވަޑައިގަންނަވަން ހަމަޖެހިފައިވާއިރު މާދަމަ މެންދުރު 14:00 ކުން ހަވީރު 16:00 ގެ ނިޔަލަށް ހުޅުލެ ފަޅާއި މަގުތައް ބަންދު ވާނެ ކަމަށް އެމްއޭސީއެލް އިން ކުރި ޓްވީޓެއްގައި ވަނީ ބުނެފައެވެ.

މިއާއިއެކު މި ދަތުރުފުޅު ނިންމަވާލެއްވުމަށްފަހު އެނބުރި ސޭޝެލްސްއަށް ވަޑައިގަތުމަށް ހަމަ ޖެހިފައިވާ ދުވަސް، 14 ޖޫން ގައި، ހަވީރު 17:00 އިން އިރުއޮއްސި 18:00 ގެ ނިޔަލަށް އެ މަގުތަކާއި ފަޅު ބަންދު ވާނެ ކަމަށް އެމްއެސީއެލްއިން ވަނީ ބުނެފައެވެ.

މި ގަޑިތަކުގައި ބަންދު ކޮށްފައިވާ މަގުގެ ސަރަހައްދުގައި ހިމެނޭނީ އިންޓަނޭޝަނަލް ޓާމިނަލްގެ އުތުރު ކަނުން ފެށިގެން ޑޮމެސްޓިކް ޓާމިނަލްގެ ކަނާއި ހަމައަށް ކަމަށް އެ ކުންފުނިން ވަނީ ބުނެފައެވެ.

އަދި ފަޅު ސަރަހައްދުގައި ކަނޑު އުޅަނދުފަހަރުތަކަށް ހަމައެކަނި ވަދެވޭނީ ފަޅުގެ އެންމެ ދެކުނު ސަރަހައްދަށް (C) އަށް ކަމަށް ވެސް އެ ކުންފުނިން ވަނީ ބުނެފައެވެ.

މި ދެ ދުވަހުގެ މި ގަޑިތަކުގައި ޑޮމެސްޓިކް އެއާލައިންތަކުން ފުރާ ފަސިންޖަރުން މި ގަޑިތަކުގެ ކުރިން ޗެކިން މަރުހަލާ ނިންމުމަށް ސަމާލު ކަން ދިނުމަށް އެމްއޭސީއެލް އިން ވަނީ އެދިފައެވެ.

މިއާއިއެކު މި ގަޑިތަކުގައި އެމްޓީސީސީގެ ބަސް މަޑު ކުރާނީ ވެސްޓް ޕާކް އޭރިއާ (A) އަދި އެމްއޭސީއެލް ފެރީވެސް މަޑުކުރާނީ ވެސްޓް ޕާކާއި ކައިރީގައި އޮތް ހާބަރ ސަރަހައްދު (B) އަށް ކަމުގައި އެ ކުންފުނިން ބުންޏެވެ.

މީގެ އިތުރުން އެމްއޭސީއެލް ވަނީ މި ގަޑުތަކުގައި މަގުތައް ބޭނުން ކުރާ ރައްޔިތުންނާއި އުޅަނދުތައް ސެކިއުރިޓީ ބަލަހައްޓާ ފަރާތްތަކުގެ އިރުޝާދުތަކާއި އެއްގޮތަށް އަމަލު ކުރައްވަން ޖެހޭނެ ކަމަށް ބުނެފައެވެ.

މިކަމުގެ ސަަބަބުން ދިމާވެދާނެ ދަތިތަކަށް އެމްއޭސީއެލް އިން ވަނީ މާފަށް އެދިފައެވެ.