ޑރ.މުއިއްޒު ފުރަތަަމަ ކެންޕެއިން ހަރަކާތް މިއަދު ހުޅުމާލޭ ދެވަނަ ފިޔަވަހިން!

އިދިކޮޅު ޕީޕީއެމް/ޕީއެންސީ ކޯލިޝަންގެ ރިޔާސީ ކެންޑިޑޭޓް ޑރ. މުހައްމަދު މުޢިއްޒު ގެ ފުރަތަަމަ ކެންޕެއިން ހަރަކާތް ހުޅުމާލޭ ދެވަނަ ފިޔަވަހިން މިއަދު ފެށިގެންދާނެ ކަމަށް އެ ކޯލިޝަނުން ބުނެފިއެވެ.

އިދިކޮޅުން ބުނީ، އެ ކޯލިޝަންގެ ރިޔާސީ ކެންޑިޑޭޓް ޑރ. މުއިއްޒު އާއި، ރަނިންމޭޓް، ފަރެސްމާތޮޑާ ދާއިރާގެ މެންބަރު ހުސައިން މުހައްމަދު ލަތީފްގެ ރިޔާސީ ކެމްޕޭނަށް އެ ދެބޭފުޅުން މިއަދު ހުޅުމާލޭ ދެވަނަ ފިޔަވަހީގައި ދޮރުން ދޮރަށް ހިންގަވާނެ ކަމަށެވެ. އަދި މި ކެންޕެއިނުގައި ލީޑަރޝިޕްގެ ބޭފުޅުން ވެސް ބައިވެރިވެ ވަޑައިގަންނަވާނެ ކަމަށް ބުނެފައިވެއެވެ.

މުޢިއްޒު ގެ ދޮރުން ދޮރަށް ކެމްޕެއިން ފެށިގެންދާނީ ދެވަނަ ފިޔަވަހީގެ ހިޔާ (އަތިރިމަތި ފަޅި) ބަސްހުއްޓި ސަރަހައްދުން މިއަދު ހަވީރު 16:15 ގައި ކަމަށްވެސް އިދިކޮޅުުން ބުނެފައިވެއެވެ.

ޑރ. މުއިއްޒު އަކީ ކުރީގެ ރައީސް ޔާމީން އަބްދުލްގައްޔޫމަށް ރިޔާސީ އިންތިހާބުގައި ވާދަނުކުރެއްވުމުން އެމަނިކުފާނުގެ ބަދަލުގައި ކަނޑައެޅުނު ބެކްއަޕް ކެންޑިޑޭޓެވެ. މުއިއްޒުގެ ކެންޕެއިން ސްލޯގަންއަށްވެސް ބޭނުން ކުރަނީ ރައީސް ޔާމީންގެ ސްލޯގަން އަކަށް ކަނޑައެޅި "ދިވެހީންގެ ރާއްޖެ" އެވެ.

ކެނޑިޑޭޓެއްގެ ގޮތުގައި ކަނޑައެޅުމަށްފަހު އެންމެ ފުރަތަަމަ ބޭއްވުނު ނޫސްވެރިންގެ ބައްދަލުވުމުގައި މުއިއްޒުވަނީ އޭނާގެ މަސައްކަތަކަށް ވާނީ، ރައީސް ޔާމީންގެ ތަރައްގީގެ ލެގަސީ ދެމެހެއްޓުން ކަމަށް ވިދާޅުވެފައެވެ.