ޑިމޮކްރަސީ އެއްގައި ސިޔާސަތުތައް އިރުއިރުކޮޅާއި ބަދަލު ކުރާނަމަ ތަރައްޤީއެއް ނުލިބޭނެ: ރައީސް ޞާލިޙް
ޑިމޮކްރަސީ އެއްގައި ސިޔާސަތުތައް އިރުއިރުކޮޅާއި ބަދަލު ކުރާނަމަ ރައްޔިތުން ބޭނުންވާ ތަރައްޤީއެއް ނުލިބޭނެ ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.
ރައީސް ޞާލިޙް މިހެން ވިދާޅުވީ ރިޔާސީ ކެމްޕޭނަށް ގއ. އަތޮޅަށް އެމަނިކުފާނާއި އެމަނިކުފާނުގެ ޓީމުން ކުރައްވަމުން ގެންދަވާ ދަތުރުފުޅުގައި އެއަތޮޅުގެ ނިލަންދޫގައި ބޭއްވުނު ޖަލްސާގައި ވާހަކަފުޅު ދައްކަވަމުންނެވެ.
"ޑިމޮކްރަސީ އެއްގައި އިރުއިރުކޮޅާ ސިޔާސަތުތައް ބަދަލު ވުމަށް ފުރުސަތު ދޭ ކަމަށްވަންޏާ ރައްޔިތުން އެބޭނުންވާ ތަރައްޤީއެއް ނުލިބޭނެ" ރައީސް ޞާލިޙް ވިދާޅުވިއެވެ.
ރައީސް ވިދާޅުވީ ގިނަ މަސައްކަތްތަކެއް ފެށިފައިވާ ކަމަށާއި، އޭގެ ގިނަ މަސައްކަތްތައް ނިމިފައިވާ ކަމަށެވެ. އަދި ސިޔާސީ ހަލަބޮލިކަމުގެ ތެރެއިން ކޮންމެ ފަސްއަހަރަކުން ވެރިކަން ބަދަލު ވާކަމަށްވާނަމަ އެކަންކަން ނުވާނެ ކަމަށާއި އެކަން ތަޖުރިބާ ކުރެވިއްޖެ ކަމަށް ރައީސް ވިދާޅުވިއެވެ.
އެގޮތުން 2008ގައި އެމްޑީޕީ ވެރިކަމަށް އައިސް ކުރަންފެށި ރަނގަޅު މަސައްކަތްތައް އޭގެ އަނެއް ދައުރުގެ ރިޔާސީ ދައުރު ބަދަލުވުމާއި ގުޅިގެން ހުއްޓުނު ކަމަށް ރައީސް ޞާލިޙް ވިދާޅުވިއެވެ. ރަށްރަށާއި ދޭތެރޭގައި އަޅާލަންވާ މިންވަރަށް އަޅަލައިގެން ދެން އައި ރިޔާސީ ދައުރުގައި ކަންތައްތަކެއް ކުރެވިފައިވަ ނުވާ ކަމަށް ރައީސް ޞާލިޙް ވިދާޅުވިއެވެ.
ރައީސް ވިދާޅުވީ ކުރިއަށް އޮތް ދައުރުގައި ރަށްރަށުގައި ކުރިއަށް ގެންދިޔުމަށް ނިންމާފައިވާ ކަންކަން ކުރެވޭނެ ގޮތަކަށް ރައްޔިތުންގެ ވިސްނުން ބެހެއްޓެވުމަކީ މުހިންމު ކަމެއް ކަމަށެވެ. އެހެންނޫންނަމަ އަނެއްކާވެސް ދައުލަތުގެ ބަޖެޓުން ބޭކާރު އެތައް ޚަރަދެއް ކުރަން ޖެހޭނެ ކަމަށްވެސް ރައީސް ވިދާޅުވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
