މިހާތަނަށް ކޯލިޝަނާ ގުޅޭ އެއްވެސް ނިންމުމެއް ނެތް: ޑރ. މުޢިއްޒު

އިންތިހާބު މިހާތަނަށް އެއްވެސް ބަޔަކާއި އެކު ކޯލިޝަން ހެދުމަށް ނިންމާފައި ނުވާ ކަމަށާ، އެކަމާއި ގުޅޭ ގޮތުން ގޮތް ނިންމާނީ ލީޑަރޝިޕުން މަޝްވަރާކުރުމަށް ފަހު ކަމަށް، ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒު ވިދާޅުވެއްޖެއެވެ.

ރިޔާސީ އިންތިހާބުގެ ފުރަތަމަ ބުރު އިއްޔެ ނިމިގެން ގޮސްފައިވާއިރު, 15,000 އަށްވުރެ ގިނަ ވޯޓުގެ ބޮޑު ފަރަގަކުން، އެ އިންތިހާބު ކާމިޔާބު ކުރައްވާފައިވަނީ ޑރ. މުޢިއްޒު އެވެ. އެއީ ހަތް ޕަސެންޓުގެ ފަރަގެކެވެ.

މުއިއްޒަށް ލިބިވަޑައިގެންނެވީ 100,122 ވޯޓެވެ. އެއީ 46.07 ޕަސެންޓެވެ. ރައީސް ސާލިހަށް 84,997 ވޯޓު ލިބިވަޑައިގެންނެވިއެވެ. އެއީ 39.11 ޕަސެންޓް ވޯޓެވެ.

މި ނަތީޖާ އާއި އެކު ދެވަނަ ބުރަކަށް އިންތިހާބު ގޮސްފައިވާއިރު، އިންތިހާބުގެ ނަތީޖާ އާ، ކުރިއަށް އޮތް ދެވަނަބުރާއި ގުޅޭ ގޮތުން ނޫސްވެރިން ކުރި ސުވާލު ތަކަށް ޖަވާބު ދެއްވަމުން ޑރ. މުޢިއްޒު ވިދާޅުވީ، އިންތިހާބުގެ ނަތީޖާއާމެދު ވަރަށް ބޮޑަށް ހިތްހަމަޖެހިވަޑައިގަންނަވާ ކަމަށެވެ. އެހެނީ، މި އިންތިޚާބުގައި އެފަދަ ނަތީޖާއެއް ނެރެވިފައި އެވަނީ، ސަރުކާރާއި އެކި ފަރާތްތަކުގެ ނުފޫޒުތަކާއި ފިއްތުންތަކާއި އެކު އެކު ކަމަށްވެސް އޭނާ ވިދާޅުވި އެވެ.

އަދި ރައްޔިތުން އެމަނިކުފާނަށް ދެއްވި ތާއީދަށް މުޢިއްޒު ވަނީ ޝުކުރު އަދާކުރައްވާފައެވެ.

"އާދެ، ވަރަށް ބޮޑަށް ޝުކުރު ދަންނަވަން ދިވެހި ލޮބުވެތި ރައްޔިތުންނަށް އަޅުގަނޑުމެންނަށް ކުރެއްވި އިތުބާރާއި ދެއްވި ތާއީދަށްޓަކައި. ހަގީގަތުގައި މިއީ އަޅުގަނޑުމެން ވަރަށް އުފާކުރާ ދުވަހެއް. އެކިއެކި ނުފޫޒުތަކާއި ފިއްތުންތަކާ އެކު އެކި ކަންކަމުގެ ކުރިމަތީގައި ދިވެހި ލޮބުވެތި ރައްޔިތުން ގައުމީ ފިކުރެއްގަ ނުކުމެވަޑައިގެން މި ދެއްކެވީ ވަރަށް ވަރުގަދަ މިސާލެއް. އޭގެން އަޅުގަނޑުމެންނަށް ވަރަށް ބޮޑު ހިތްވަރެއް ލިބިގެން ދަނީ،"

ޑރ. މުހައްމަދު މުޢިއްޒު

މިއާއެކު މުޢިއްޒު ވިދާޅުވީ، ދެވަނަބުރާއި ދެމެދު ދެތިން ހަފްތާއެއްހާ ދުވަސް އޮތް އިރު، އުއްމީދަކީ ވޭހާވެސް ގިނަ ރައްޔިތުންނާ ގާތުން ކެންޕެއިން ކުރެއްވުން ކަމަށެވެ. އަދި އިރާދަފުޅުން ދެވަނަ ބުރުވެސް ކާމިޔާބު ވާނެ ކަމުގެ ޔަގީންކަން އޮތް ކަމަށް ވިދާޅުވި އެވެ.

"އަޅުގަނޑުމެން އުންމީދު ކުރަނީ ދެވަނަ ރައުންޑްގައި އިރާދަކުރެއްވިއްޔާއ، އަޅުގަނޑުމެންނަށް ޔަގީން އިންޝާ الله އަޅުގަނޑުމެންނަށް ރައްޔިތުންގެ ފުރިހަމަ އިތުބާރާއެކީގައި ކާމިޔާބު ވާނެ ކަމަށް،"

ޑރ. މުހައްމަދު މުޢިއްޒު

ދެވަނަ ބުރުގައި އެކުގައި ކޯލިޝަން ހެދުމާ ބެހޭ ގޮތުން މަޝްވަރާ ކުރާނަންތޯ ސުވާލު ކުރުމުން މުއިއްޒު ވިދާޅުވީ ލީޑަޝިޕުން އެކަމާ މަޝްވަރާކޮށް ގޮތެއް ނިންމާނެ ކަމަށާއި މިހާތަނަށް ކޯލިޝަނާ ގުޅޭ އެއްވެސް ނިންމުމެއް ނެތް ކަމަށެވެ.

"(ކޯލިޝަން ހެދުމާއިމެދު) ލީޑާޝިޕުގައި މަޝްވަރާ ކުރާނެ. އަޅުގަނޑުމެން އެދެނީ ދިވެހިންގެ ރާއްޖެ ދިވެހިންނަށް ލިބުމަށް. އަޅުގަނޑުމެން ބޭނުން ވަނީ ދިވެހިންގެ ރާއްޖެ ހޯދުމަށް ދިވެހި ގައުމަށްޓަކައި މިއަދު އޮތް ހާލަތުން ކުރިއަށް ގެންދިއުމަށް ދިވެހިންގެ މަސްލަހަތު އިސްކޮށްގެން މި ގައުމަށް މިނިވަންކަން ޔަގީންވެ، ތަރައްގީ ކަށަވަރުވެ އިގުތިސޯދު ކޮޅަށް ޖަހާނެ ގޮތެއް. މި ކަންކަމާއިގެން ކުރިއަށް އޮތް ދެތިން ހަފުތާ ވެސް މަސައްކަތް ކުރާނީ،" މުއިއްޒު ވިދާޅުވިއެވެ.

ރިޔާސީ އިންތިހާބު ދެވަނަ ބުރަކަށް ގޮސްފައިވާއިރު، ދެވަނަ ބުރުގެ ވޯޓުލުން އޮންނާނީ މިމަހު 30 ވާ ހޮނިހިރު ދުވަހު އެވެ.