ނަތީޖާއަކީ ހައިރާންވާފަދަ ނަތީޖާއެއް، ގޯސްތައް ރަނގަޅުކޮށް ދެވަނަ ބުރު ކާމިޔާބު ވެދާނެ!
ރިޔާސީ އިންތިޚާބުގެ ނަތީޖާއަކީ ހައިރާންވާފަދަ ނަތީޖާއެއް ކަމަށާއި، ހެދުނު ގޯސްތައް ރަނގަޅުކޮށް ދެވަނަ ބުރު ކާމިޔާބު ވެދާނެ ކަމަށް މި ސަރުކާރުގެ ޔޫތް މިނިސްޓަރ އަޙްމަދު މަޙްލޫފް ވިދާޅުވެއްޖެއެވެ.
މަޙްލޫފް މިހެން ވިދާޅުވީ އޭނާ ކުރެއްވެވި ޓްވީޓެއްގައެވެ.
" މިނަތީޖާއަކީ ސިޔާސީ ޙަޔާތުގައި އަޅުގަނޑަށް އެންމެ ބޮޑު ހައިރާންކަމެއް ލިބުނު ފަހަރު"
ޔޫތް މިނިސްޓަރ އަޙްމަދު މަޙްލޫފް
މަޙްލޫފް ވިދާޅުވީ މިޙަޤީޤަތް ޤަބޫލުކޮށް އަދި ހަޖަމުކޮށްގެން، ހެދިފައިހުރި ގޯސްތައް ރަނގަޅުކޮށްގެން ދެވަނަ ބުރުގައި ރައީސް ޞާލިޙަށް މި އިންތިޚާބު ކާމިޔާބުވެދާނެ ކަމަށެވެ.
2008 ވަނަ އަހަރުގެ ފުރަތަމަ ބުރުގައި ރައީސް މައުމޫން 45% ހޯއްދެވިއިރު ދެވަނަ ބުރު ކާމިޔާބުކުރެއްވީ ފުރަތަމަ ބުރުގައި 25% ހޯއްދެވި ރައީސް މުޙައްމަދު ނަޝީދު ކަމަށް މަޙްލޫފް ވިދާޅުވެފައެވެ. މީގެއިތުރުން މަޙްލޫފް ވިދާޅުވީ 2013ގެ އިންތިޚާބުގައި ފުރަތަމަ ބުރުގައި ރައީސް ނަޝީދު 47% ހޯއްދަވާފައިވަނިކޮށް ފަހަތުން އަރާ ދެވަނަ ބުރު ކާމިޔާބުކުރެއްވީ ފުރަތަމަ ބުރުގައި 25% ހޯއްދެވީ ރައީސް ޔާމީން ޢަބްދުލް ޤައްޔޫމް ކަމަށެވެ.
" ތާރީޙުގައި ކަންހިނގާފައި އޮތްގޮތަށް ބަލާއިރު إِنْ شَاءَ ٱللَّٰهُ ދެވަނަ ބުރު އަޅުގަނޑުމެންނަށް ކާމިޔާބު ކުރެވޭނެ، ގަދައަޅާ މަސައްކަތްކުރަމާ ހިންގަވާ"
އަޙްމަދު މަޙްލޫފް
ރިޔާސީ އިންތިޚާބުގެ ދެވަނަ ބުރުގެ ވޯޓުލުން ބޭއްވުމަށް ހަމަޖެހިފައިވަނީ މި ސެޕްޓެމްބަރ މަހުގެ 30 ވަނަ ދުވަހުއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
