ޕްލާސްޓިކް ކޮތަޅުން ނަގާ ޓެކްސް 50 ލާރިއަށް ކުޑަ ކުރަން ހުށަހަޅައިފި

ކުނި މެނޭޖުކުރުމުގެ ޤާނޫނަށް ގެނައި އިޞްލާޙާއިއެކު މިހާރު ކޮތަޅަކުން ނަގަމުން އަންނަ 2 ރުފިޔާގެ ޓެކްސް، 50 ލާރިއަށް ކުޑަ ކުރުުމަށް އިސްލާހެއް ހުށަހަޅުއްވައިފި އެވެ.

މިއަދުގެ ރައްޔިތުންގެ މަޖިލީހުގެ ޖަލްސާގައި ކުނި މެނޭޖުކުރުމުގެ ޤާނޫނަށް އިސްލާހު ގެނައުމާއި ގުޅޭގޮތުން ސަރުކާރުން ހުށަހެޅި ބިލުގެ ބަހުސް ކުރިއަށް ގެންގޮސްފައިވާއިރު، ކޮތަޅަކުން ނަގާ ޓެކްސް 50 ލާރިއަށް ބަދަލުކުރުމުގެ އިސްލާހު ހުށަހަޅުއްވާފައިވަނީ ރައްޔިތުންގެ މަޖިލީހުގެ ހޯރަފުށީ ދާއިރާގެ މެމްބަރު އަހުމަދު ސަލީމެވެ.

މި ބިލަށް ވާހަކަ ދައްކަވަމުން ސަލީމް ވިދާޅުވީ ބިލަށް މިހާރު ހުށަހަޅާފައިވާ އިސްލާހާ އެއްގޮތަށް ގަނޑުކޮށް 50 ކޮތަޅަށްވުރެ ގިނައިން ގަންނަ އިރު ޓެކްސް ނުނަގާގޮތަށް ހެދުމުން ހޯލް ސޭލްކޮށް ވިޔަފާރި ކުރާ ފަރާތްތައް ނޫން އެހެން ފަރާތްތަކުންވެސް އެފަދައިން ގަނޑުކޮށް ކޮތަޅު ގަތުމުގެ ފުރުސަތު އޮތް ކަމަށެވެ. އެހެން ކަމަށް ވެއްޖެ ނަމަ، ޕްލާސްޓިކް މަދު ކުރުމަށް ހިފާފައިވާ އަމާޒަށް ވާސިލް ނުވެވޭނެކަން އޭނާ ފާހަގަކުރެއްވިއެވެ.

އަދި މީގެ އިތުރުން، ޕްލާސްޓިކު ކޮތަޅަކުން ދެ ރުފިޔާ ނަގަން ފެށީ، ވަރަށް ބޮޑަށް ތަކެތީގެ އަގުތައްވެސް ބޮޑުވެފައިވާ ދަނޑިވަޅެއްގައި ކަން ފާހަގަ ކުރައްވައި ސަލީމް ވަނީ އޭގެ ސަބަބުން ރައްޔިތުންނަށް ވަރަށް ބޮޑު ތަކުލީފެއް އުފުލަން ޖެހުނުކަންވެސް ފާހަގަ ކުރައްވާފައެވެ.

ހަމަ އެހެންމެ، އެ ބިލަށް މިހާރު ހުށަހެޅިފައިވާ އިސްލާހުތަކަށް ބަލާއިރު، ކުދި ވިޔަފާރިތަކަށް ވަރަށް ބޮޑު ތަކުލީފެއް އުފުލަން ޖެހޭނެ ކަންވެސް އޭނާ ފާހަގަކުރެއްވިއެވެ.

ވުމާއެކު އޭނާ ވަނީ ކޮތަޅުން ނަގާ ފީއާއި ގުޅިގެން އެކަމަށް ހައްލު ތަކެއް ގެނައުމަށް ގިނަ އިސްލާހު ތަކެއް ހުށަހަޅުއްވާފައެވެ. އެގޮތުން ހުށަހެޅުއްްވި އިސްލާހުތަކުގެ ތެރޭގައި؛

- ރޯމަސް އުފުލުމާއި ކުނިވާ ޒާތު ކުނި އުކައިލުން ފަދަ ކަންކަމަށް ގަނޑުކޮށް ކޮތަޅު ގަތުމަކީ ފީ ނެގުމުގައި އިސްތިސްނާ ހާލަތްތަކުގެ ގޮތުގައި ކަނޑައެޅުން.

- ރީޓެއިލް ފިހާރަތަކާއި ސައިހޮޓާތަކަށް އިދާރީ ގޮތުން ބުރަ ނުވާ ގޮތަކަށް ފީ ނެގުމުގެ ނިޒާމު ބަދަލު ކުރުން

- ކޮތަޅަކަށް ނެގޭ ރުފީޔާގެ އަދަދު މިހާރަށް ވުރެ ދަށްކޮށް، 50 ލާރިއަށް ކޮތަޅުން ނަގާ ފީ ކުޑަ ކުރުން

ސަލީމް ވަނީ ޓެކްސް ނެގުމަށް ބަދަލުތަކެއް ގެނައި ނަމަވެސް މިއީ އަހަރުން އަހަރަށްވެސް ބަދަލު ގެނެވޭ ކަމެއްގެ ގޮތުގައި ކުރެވިދާނެ ކަމެއްކަމަށެވެ.

ވިޔަފާރީގެ މުއާމަލާތްތަކުގައި ބޭނުންކުރާ ޕްލާސްޓިކް ކޮތަޅުން 2 ރުފިޔާގެ ފީއެއް ނަގަން ފެށީ މިދިޔަ އަހަރުގެ ޑިސެމްބަރުމަހުގެ 18 ވަނަ ދުވަހު ތަސްދީޤުކުރެއްވި ކުނި މެނޭޖުކުރުމުގެ ޤާނޫނުގެ ދަށުންނެވެ. އެ ގާނޫނުގައި އޮތްގޮތުން، ކޮތަޅުން ފީ ނަގަން ފަށަންޖެހޭނީ ޤާނޫނަށް އަމަލުކުރަން ފަށާތާ 4 މަސް ހަމަވާ ދުވަހުން ފެށިގެނެވެ.

ކޮތަޅުން 2 ރުފިޔާގެ ޓެކްސްއެއް ނެގުމަށް ޤާނޫނަށް ގެނައި އިސްލާހާއިއެކު އާންމުންގެ ބޮޑެތި ކަންބޮޑުވުންތަކެއް އޭރު ހުށަހެޅުމުން ސަރުކާރުން ވަނީ ޤަނޫނު އިސްލާހު ކުރުމަށް މެއި މަހުގެ ތެރޭގައި ހުށަހެޅާފައެވެ. ނަމަވެސް، މަޖިލީހުގައި އުފެދުނު ސިޔާސީ ހަލަބޮލިކަމުގެ ތެރޭގައި މި މަސައްކަތް އޮތީ ނުކުރެވި މަޑު ޖެހިފައެވެ.